ភ្នំពេញ៖ កម្លាំងសមត្ថកិច្ចនគរបាលខេត្តពោធិ៍សែនជ័យសហការជាមួយនគរបាលស្នងការរាជធានីភ្នំពេញបាននិងកំពុងឡោមព័ទ្ធក្រុមចោរប្លន់រថយន្តឡិចស៊ីសមួយគ្រឿង ពណ៌ខ្មៅ ពាក់ស្លាកលេខភ្នំពេញ2S-9925 ដែលកំពុងបើកគេចមកលាក់ខ្លួននៅចំណុចជិតរោងចក្រGGK ស្ថិតនៅម្ដុំវត្តជន្លង់ម្លូរ សង្កាត់ភ្លើងឆេះរទេះ ខណ្ឌពោធិ៍សែនជ័យ។

លោក យឹម សារ៉ាន អធិការនគរបាលខណ្ឌពោធិ៍សែនជ័យបានប្រាប់ នគរដ្រេហ្គនថា មុននេះបន្ដិចនាព្រឹកថ្ងៃទី១៦ ខែឧសភា ឆ្នាំ២០១៦ មានករណីចោរប្លន់រថយន្តឡិចស៊ីស៤៧០ចេញពីចំណុចផ្លូវកប់ស្រូវរួចគេចខ្លួនមកកាន់ចំណុចខាងលើនេះ ទើបកម្លាំងរបស់លោកកំពុងប្រាញ់ចាប់ខណៈទទួលបានព័ត៌មានថា ក្រុមចោរប្លន់ប្រដាប់កាំភ្លើង។

លោកអធិការបន្តថា មុនដំបូងក្រុមចោរប្លន់បានប្រើរូបភាពជាការមកទិញរថយន្តនិងសុំបើកសាក ប៉ុន្តែពួកគេបានដកកាំភ្លើងភ្ជង់យករថយន្តនេះតែម្តង។

ពេលនេះសមត្ថកិច្ចកំពុងធ្វើការឡោមព័ទ្ធបន្ទាប់ពីឃាត់បានរថយន្ត និងតាមប្រមាញ់ក្រុមចោរប្លន់៕

ដោយ៖ តាឡឹម