លោក David Beckham និងតារាប្រដាល់ Tyson Fury បានចូលរួមគោរពវិញ្ញាណក្ខន្ធ ដល់ម្ចាស់ក្សត្រី Elizabeth II នៅថ្ងៃព្រះរាជពិធីបុណ្យព្រះសពជាផ្លូវការនៅអង់គ្លេស។ អតីតកីឡាករទាំង២បានចូលគោរពចំពោះព្រះមហាក្សត្រដែលកាន់អំណាចយូរបំផុតរបស់ចក្រភពអង់គ្លេស ជាមួយនឹងបុគ្គលិកលក្ខណៈកីឡា និងអង្គការនានាចូលរួមរំលែកទុក្ខផងដែរ។
អតីតប្រធានក្រុមបាល់ទាត់ជម្រើសជាតិអង់គ្លេស Beckham បានចងចាំព្រះនាងថា ជាអ្នកដឹកនាំតែមួយគត់ បំផុសគំនិត និងយកចិត្តទុកដាក់។ ចំណែកម្ចាស់ខ្សែក្រវ៉ាត់ប្រដាល់ទម្ងន់ធ្ងន់ Fury បានបួងសួងសូមព្រះនាងបានសម្រាកនៅឋានសួគ៌ជានិច្ច។
Beckham ដែលបានតម្រង់ជួររយៈពេល១៣ម៉ោងដើម្បីចូលរូមគោរពព្រះវិញ្ញាណក្ខន្ធម្ចាស់ក្សត្រីដែលកំពុងប្រារព្ធធ្វើឡើងនៅក្នុងរដ្ឋ Westminster Hall នោះបានសរសេរនៅលើ Instagram ថា “ម្ចាស់ក្សត្រីរបស់យើងបានសម្រាកនៅផ្ទះហើយ។ សប្តាហ៍នេះពិភពលោកបានកាន់ទុក្ខចំពោះការបាត់បង់អ្នកដឹកនាំដ៏ពិសេស បំផុសគំនិត និងយកចិត្តទុកដាក់។ មនុស្សមកពីគ្រប់មជ្ឈដ្ឋានបានមកជួបជុំគ្នារាប់ពាន់នាក់ដើម្បីបង្ហាញការដឹងគុណចំពោះព្រះមហាក្សត្រិយានីជាទីគោរពស្រឡាញ់របស់យើង។ ទន្ទឹមនឹងពិធីបុណ្យនិងប្រពៃណីដ៏មិនគួរឲ្យជឿ ពួកយើងបានមើលការសោកសង្រេងរបស់គ្រួសារដែលប្រកបដោយក្តីស្រឡាញ់ចំពោះម្តាយ ជីដូននិងជីដូនជីតា ដោយសេចក្តីថ្លៃថ្នូរ និងការលះបង់។ កេរដំណែលនៃការបម្រើរបស់នាង និងការលះបង់ចំពោះកាតព្វកិច្ចនឹងស្ថិតស្ថេរ”។
កាលពីព្រឹកថ្ងៃចន្ទអ្នកប្រដាល់ទម្ងន់ធ្ងន់ Fury បានបង្ហោះវីដេអូតាមអ៊ីនធើណេតដោយគាត់បាននិយាយថា “ខ្ញុំបានបិទប្រព័ន្ធផ្សព្វផ្សាយសង្គមអស់រយៈពេល១០ថ្ងៃចុងក្រោយនៃការកាន់ទុក្ខក្នុងការគោរពចំពោះព្រះមហាក្សត្រិយានីរបស់យើងដែលបានស្លាប់។ ខ្ញុំសង្ឃឹមថា ពិធីបុណ្យសពនឹងទៅដោយសុខសាន្ត ចូលរួមរំលែកទុក្ខដល់ក្រុមគ្រួសារពេញលេញ និងសូមឲ្យនាងបានទៅឋានសួគ៌អស់កល្បជានិច្ច”។
លីកបាល់ទាត់អង់គ្លេសបានសរសេរនៅលើទំព័រ Twitter របស់ខ្លួនថា “នៅថ្ងៃនៃពិធីបុណ្យសពរបស់ព្រះមហាក្សត្រិយានីElizabeth II, EFL និងក្លិបរបស់ខ្លួនចង់ចូលរួមជាមួយប្រទេសជាតិដើម្បីឆ្លុះបញ្ចាំងពីជីវិតដ៏គួរឱ្យកត់សំគាល់របស់ម្ចាស់ក្សត្រីក្នុងការបម្រើប្រទេស និងគំនិតរបស់យើងគឺជាមួយគ្រួសាររាជវង្ស”។
ទន្ទឹមនឹងនេះដែរក្រុម Southampton នៃក្របខ័ណ្ឌ Premier League បានបង្ហោះរូបថតនៃព្រះមហាក្សត្រិយានីប្រគល់ពានរង្វាន់ FA Cup ដល់ប្រធានក្រុមរបស់ពួកគេគឺលោក Peter Rodrigues បន្ទាប់ពីជ័យជម្នះចុងក្រោយលើក្រុម Manchester United កាលពីឆ្នាំ១៩៧៦ នៅកីឡដ្ឋាន Wembley ដែលជាលើកចុងក្រោយដែលនាងបានបង្ហាញពានរង្វាន់។
ការប្រណាំងសេះ ជាកីឡាដែលព្រះនាងពេញចិត្ត ដើមឡើយមានការប្រជុំដែលបានគ្រោងទុកនៅ Leicester, Warwick, Hamilton Park និង Wolverhampton នៅថ្ងៃចន្ទ មុនពេលកាលបរិច្ឆេទនៃពិធីបុណ្យសពត្រូវបានបញ្ជាក់។ អត្តពលិកកីឡាគួរឱ្យកត់សម្គាល់មួយចំនួនបានចូលរួមក្នុងពិធីបុណ្យសពនៅឯ Westminster Abbey រួមទាំងអ្នកគ្រប់គ្រងការប្រណាំងរបស់ព្រះមហាក្សត្រិយានី John Warren ដែលកាលពីថ្ងៃសៅរ៍បានពណ៌នាអំពី “សមត្ថភាពដ៏អស្ចារ្យរបស់ព្រះនាងក្នុងការទទួលបានសេចក្តីរីករាយយ៉ាងខ្លាំងពីសេះណាមួយ ទោះបីជាសេះនោះអាចសម្រេចបានកម្រិតណាក៏ដោយ” ។
កាលពីថ្ងៃសៅរ៍ ក្លិបនៅ Premier League និង Women’s Super League បានចូលរួមគោរពវិញ្ញាណក្ខន្ធដល់ម្ចាស់ក្សត្រីខណៈដែលការប្រកួតបានត្រលប់មកសកម្មភាពចុងសប្តាហ៍វិញជាលើកដំបូងចាប់តាំងពីការសោយទិវង្គតរបស់ព្រះនាង ៕ (រូបភាព ៖BBC Sport)
