ភ្នំពេញ៖ ក្រសួងមហាផ្ទៃគ្រោងទិញរថយន្តពន្លត់អគ្គិភ័យដែលអាចពន្លត់នៅលើអគារខ្ពស់បន្ថែម បន្ទាប់ពីទិញរថយន្តពន្លត់អគ្គិភ័យពីប្រទេសចិន១១៣គ្រឿងហើយ នោះ ។ នេះជាការអះអាងរបស់លោក ខៀវ សុភ័គ អ្នកនាំពាក្យក្រសួងមហាផ្ទៃ ។
នៅក្នុងពិធីប្រគល់ទទួលរថយន្តពន្លត់អគ្គិភ័យប្រភេទ ISUZU ម៉ាក FTR ចំនួន១១៣គ្រឿង ចំណុះផ្ទុកទឹក៦.០០០ លីត្រ គុណភាព១០០ភាគរយ ផលិត នៅប្រទេសចិន នៅថ្ងៃទី១៧ ខែឧសភា ឆ្នាំ២០១៦ នៅមជ្ឈមណ្ឌលកោះពេជ្រ លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថា នៅថ្ងៃខាងមុខរាជរដ្ឋាភិបាលគ្រោងនឹងបញ្ជា ទិញរថយន្តពន្លត់អគ្គិភ័យ ដែលមានសមត្ថភាពពន្លត់អគ្គិភ័យលើសំណង់អគារខ្ពស់ បន្ថែម ខណៈសំណង់អគារខ្ពស់ៗនៅក្នុងរាជធានីភ្នំពេញកំពុងបន្តរីកដុះដាលជា ច្រើនកន្លែង ។
តាមការគ្រោងទុករាជរដ្ឋាភិបាលបាន បញ្ចេញថវិកាប្រមាណ៤.០០០លានរៀល ដើម្បីបញ្ជាទិញរថយន្តពន្លត់អគ្គិភ័យនោះ ប៉ុន្តែក្រោយពីការដាក់ដេញថ្លៃក្នុងចំណោមក្រុមហ៊ុន៦គឺមានក្រុមហ៊ុនខេអិនអិនតែ មួយគត់ហ៊ានដេញថ្លៃទម្លាក់ថ្លៃមកនៅត្រឹមប្រមាណ៨៦.០០០ដុល្លារអាមេរិក ក្នុង មួយគ្រឿង ពោលគឺក្នុងចំណោមរថយន្ត ១១៣គ្រឿង គឺបានចំណាយថវិកាសរុប ប្រមាណ៣៩ពាន់លានរៀល ។
បច្ចុប្បន្នទូទាំងប្រទេសមានកម្លាំងនគរបាលពន្លត់អគ្គិភ័យសរុបប្រមាណ៥០០នាក់ មានរថយន្តពន្លត់អគ្គិភ័យ១២៨គ្រឿង និង ទើបទិញថ្មីចំនួន១១៣គ្រឿង សរុប២៤១ គ្រឿង ។
តាមរបាយការណ៍អគ្គស្នងការដ្ឋាន នគរបាលជាតិបញ្ជាក់ថា ក្នុងរយៈពេល៣ ខែចាប់ពីខែមករា ដល់មីនា ឆ្នាំ២០១៦នេះ មានអគ្គិភ័យកើតឡើងនៅទូទាំងប្រទេស២០៨លើក កើនឡើងជិត៣០លើក បើ ធៀបនឹងរយៈពេលដូចគ្នាឆ្នាំ២០១៥ ៕
ដោយ៖ ហេង សូរិយា
