ភ្នំពេញ៖ បើយោងតាមការបញ្ជាក់ពីនាយឧត្តមសេនីយ៍ ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ ថ្លែងឱ្យដឹងនៅព្រឹកថ្ងៃចន្ទទី១០ ខែតុលា ឆ្នាំ២០២២នេះថា៖ សមត្ថកិច្ចកម្ពុជា គិតចាប់ពីម៉ោង ៣៖០០ នាថ្ងៃទី០៨ ដល់វេលាម៉ោង ៣៖០០ កាលពីថ្ងៃទី០៩ ខែតុលាម្សិលមិញនេះ បានទទួលសំណើចំនួន ៣ករណីទៀត ដែលស្នើឲ្យជួយសង្រ្គោះជនបរទេស និងខ្មែរសរុបទាំងអស់ចំនួន ១៥នាក់។
លោកអ្នកនាំពាក្យ បានថ្លែងបន្តថា សំណើទាំង៣ករណីនេះ រួមមាន ស្នើឲ្យសង្រ្គោះជនជាតិខ្មែរម្នាក់ និងវៀតណាម ១៤នាក់។
នាយឧត្តមសេនីយ៍ ខៀវ សុភ័គ បានគូសបញ្ជាក់ថា៖ បច្ចុប្បន្នភាពស្រាវជ្រាវ តាមបញ្ជីតាមដាន គិតត្រឹមថ្ងៃទី៩ ខែតុលា ឆ្នាំ២០២២ រួមមាន៖
១៖ សំណើក្នុងបញ្ជីតាមដានរបស់សម្តេចក្រឡាហោម សរុប ៤៤១ករណី មានមនុស្ស ១១០៧នាក់ មាន ១៣សញ្ជាតិ
២៖ ស្រាវជ្រាវអង្កេតបឋមបាន ២៥៦សំណើ នៅសល់ ១៨៥សំណើ (រកឃើញ ៥៩០នាក់, ឃាត់ខ្លួន ៦៧នាក់, បិទក្រុមហ៊ុន ៥ទីតាំង, និងផ្អាកអាជីវកម្ម ក៏ដូចជាស្រាវជ្រាវក្រុមហ៊ុន ៤ទីតាំង)។
សូមរម្លឹកថា សម្តេចក្រឡាហោម ស ខេង ថ្មីៗនេះ បានចេញលិខិតមួយអំពាវនាវដល់សាធារណជនជាតិ-អន្តរជាតិ ស្ថានតំណាងបរទេសប្រចាំកម្ពុជា និងអាជ្ញាធរមានសមត្ថកិច្ចនៃបណ្ដាប្រទេសពាក់ព័ន្ធ បន្តសហការផ្តល់ព័ត៌មានពាក់ព័ន្ធអំពើជួញដូរមនុស្ស និងឧក្រិដ្ឋកម្មឆ្លងដែនផ្សេងទៀត ដើម្បីបង្ការទប់ស្កាត់ និងបង្ក្រាបបានទាន់ពេលវេលាប្រកបដោយប្រសិទ្ធភាព។
រាជរដ្ឋាភិបាលកម្ពុជា ក៏បានបន្តប្តេជ្ញាចិត្តប្រកប ដោយឆន្ទៈមោះមុត ក្នុងការអនុវត្តតាមច្បាប់ជាធរមាន ដើម្បីប្រយុទ្ធប្រឆាំងអំពើឆបោក-ជំរិតទារប្រាក់ តាមប្រព័ន្ធបច្ចេកវិទ្យា បទល្មើសគ្រឿងញៀន បទល្មើសសម្អាតប្រាក់ ល្បែងស៊ីសងអនឡាញខុសច្បាប់ ព្រមទាំងបន្តផ្តល់ការគាំពារ និងជួយសង្គ្រោះ ទាំងពលរដ្ឋកម្ពុជាដែលរងគ្រោះដោយអំពើជួញដូរនៅឯបរទេស និងសង្គ្រោះជនបរទេសដែលរងគ្រោះដោយអំពើជួញដូរនៅកម្ពុជានេះ៕
ដោយ៖សហការី
