ភ្នំពេញ៖ នារីរូបស្រស់ម្នាក់បេីករថយន្តបុកម៉ូតូមួយគ្រឿងហេីយព្យាយាមបេីកគេចខ្លួនទាំងជាប់ម៉ូតូនៅខាងក្រោមរថយន្តអូសជាច្រេីនម៉ែត្របែកផ្កាភ្លេីងពេញផ្លូវ បង្កការភ្ញាក់ផ្អេីលកាលពីវេលាម៉ោង៨និង៣០នាទីយប់ថ្ងៃទី២៩ ខែតុលា ឆ្នាំ២០២២ នៅចំណុចភ្លើងស្តុប២០០៤ តាមបណ្តោយមហាវិថីសហព័ន្ធរុស្ស៊ី កែងនឹងផ្លូវលេខ២០០៤ ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ។
តាមប្រភពព័ត៌មានបានឱ្យដឹងថា មុនពេលកេីតហេតុគេបានឃេីញម៉ូតូម៉ាកស៊ុយហ្ស៊ុយគីនិច ពណ៌ខ្មៅ ពាក់ស្លាកលេខតាកែវ1O-2695 ធ្វេីដំណេីរតាមបណ្តោយមហាវិថីសហព័ន្ធរុស្ស៊ីក្នុងទិសដៅពីលិចទៅកេីត ខណៈមកដល់ភ្លើងស្តុបក៏បត់ឆ្វេងឆ្លងផ្លូវ ភ្លាមនោះស្រាប់តែមានរថយន្តម៉ាកព្រូស ពណ៌ស ពាក់ស្លាកលេខភ្នំពេញ2BH-2230 បេីកបរដោយនារីម្នាក់ធ្វេីដំណេីរតាមបណ្តោយមហាវិថីសហព័ន្ធរុស្ស៊ីក្នុងទិសដៅពីកេីតទៅលិចក្នុងល្បឿនលឿនក៏ជ្រុលទៅបុកម៉ូតូពេញទំហឹងធ្វើឱ្យម៉ូតូគាបជាប់ក្រោមរថយន្ត ហើយសំណាងល្អម្ចាស់ម៉ូតូលោតចេញទាន់រងរបួសស្រាល។
ប្រភពដដែលបានបន្តថា ភ្លាមនោះម្ចាស់រថយន្តមិនព្រមឈប់សម្របសម្រួលទេ បែរជាបេីករថយន្តរត់ទាំងជាប់ម៉ូតូនៅខាងក្រោមអូសបែកផ្កាភ្លេីងពេញផ្លួវបានប្រហែល៥០០ម៉ែត្រទេីបប្រជាពលរដ្ឋដេញឃាត់បានតែម្តង។
ក្រោយកេីតហេតុសមត្ថកិច្ចបានចុះមកដល់ធ្វេីការវាស់វែងយករថយន្តនិងម៉ូតូទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យរង់ចាំដោះស្រាយតាមច្បាប់៕
ដោយ៖សុខាសែនជ័យ
