ភ្នំពេញ ៖ នៅថ្ងៃទី២១ ខែវិច្ឆិកា ឆ្នាំ២០២២លោក ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡាបានធ្វើសន្និសីទសារព័ត៌មានស្ដីពី ដំណើរការរៀបចំការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២២។
លោករដ្ឋមន្ត្រីបានបញ្ជាក់ថាបេក្ខជនទូទាំងប្រទេសមានជាង១២ម៉ឺននាក់ហើយប្រសិនបើមានអ្នកកើតជំងឺកូវីដ- ១៩នឹងត្រូវដាក់ឱ្យប្រឡងដោយឡែក។
ក្នុងសន្និសីទសារព័ត៌មានលោកបណ្ឌិត សភាចារ្យ ហង់ ជួនណារ៉ុន បានថ្លែងថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នឹងធ្វើឡើងនៅថ្ងៃទី៥ និងទី៦ ខែធ្នូ ឆ្នាំ២០២២ ដែលមានបេក្ខជនចូលរួមប្រឡងជាង១២ម៉ឺននាក់ហើយគ្រោងប្រកាសលទ្ធផលសម្រាប់ រាជធានីភ្នំពេញ និងខេត្តកណ្ដាល នៅថ្ងៃទី២៧ ខែធ្នូ ហើយបណ្តាខេត្តផ្សេងៗ នៅថ្ងៃទី២៨ ខែធ្នូ ឆ្នាំ២០២២។លោកបន្ថែមថា ការប្រឡងនេះមានការចូលរួមសង្កេតការណ៍ពីស្ថាប័នផ្សេងៗដូចបណ្ដាឆ្នាំមុនៗដែរ។
លោករដ្ឋមន្ត្រី ហង់ ជួនណារ៉ុន មានបញ្ជាក់ថា ចំពោះបេក្ខជនប្រឡង បាក់ឌុប មានជំងឺកូវីដ-១៩ នឹងត្រូវរៀបចំទីតាំងប្រឡងដាច់ដោយឡែក ដើម្បីកុំឲ្យបង្កការព្រួយបារម្ភ ដល់បេក្ខជនដទៃ ។ លោកបញ្ជាក់ថាអ្វីៗក្រសួងបានរៀបចំរួចរាល់អស់ហើយដោយមិនឲ្យបេក្ខជនមានកង្វល់ចំពោះបញ្ហាជំងឺកូវីដ-១៩នោះទេ។
សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នឹងធ្វើឡើងនៅថ្ងៃទី៥ និងទី៦ ខែធ្នូ ឆ្នាំ២០២២ ដែលមានបេក្ខជនចូលរួមប្រឡងជាង ១២ម៉ឺននាក់។ ចំពោះលទ្ធផលគ្រោងនឹងប្រកាសនៅថ្ងៃទី២៧ធ្នូ សម្រាប់រាជធានីភ្នំពេញ និងខេត្តកណ្ដាល ហើយខេត្តផ្សេងៗ នឹងប្រកាសនៅថ្ងៃទី២៨ ខែធ្នូ ឆ្នាំ២០២២៕
ដោយ៖ សូរិយា
