ខេត្តបន្ទាយមានជ័យៈប្រជាកសិករនៅភូមិនាងកេត ឃុំប្ញស្សីក្រោក សំណូមពរសុំឲ្យមន្ត្រីជំនាញនៃមន្ទីរកសិកម្មខេត្តមេត្តាចុះជួយផ្ដល់នូវបច្ចេកទេសផ្សេងៗពីការធ្វើស្រែប្រាំង
ក្នុងទិសដៅចូលរួមអនុវត្តគោលនយោបាយកសិកម្មរបស់រាជរដ្ឋាភិបាលមន្ទីរកសិកម្មខេត្តបន្ទាយមានជ័យ បានបន្តជំរុញប្រជាកសិករប្រកបរបរធ្វើស្រែប្រាំងហៅថាបណ្ដេញទឹកនៅ២០២២ លើផ្ទៃដីដែលមានស្រាប់ក្នុងគោលដៅបង្កើនជាផលិតកម្ម បង្កើនជាការងារ បង្កើនប្រាក់ចំណូល និងបង្កើននាំចេញកសិផល ពិសេសនាំចេញអង្ករទៅបរទេសដើម្បីបង្កើតនូវសេដ្ឋកិច្ចគ្រួសាររបស់ពួកគាត់បានមួយកម្រិតបន្ថែមទៀត ។
ជាក់ស្ដែង ប្រជាកសិកររស់នៅភូមិនាងកេត នៅក្នុងឃុំឫស្សីក្រោក ស្រុកមង្គលបុរី បាននិងកំពុងមមាញឹកធ្វើស្រែប្រដេញទឹកនៅឆ្នាំ២០២២ ដោយពួកគាត់សង្ឃឹមថា និងបានទទួលផលដើម្បីបង្កើនជីវភាពក្នុងគ្រួសារ បើយោងទៅតាមអាកាសធាតុនៅចុងឆ្នាំ២០២២ នេះនៅមានភ្លៀងធ្លាក់ជាអន្លើៗបង្កឲ្យមានទឹកតម្កល់ទុកសម្រាប់ប្រើប្រាស់ អាចនិយាយបានថាជារួមឆ្នាំនេះមិនខ្វល់ពីបញ្ហាខ្វះទឹកនោះឡើយ ប៉ុន្តែសំខាន់គឺយើងត្រូវរក្សាទឹកទុកកុំឲ្យហូរធ្លាក់ទៅអស់។ ប្រជាកសិករមួយចំនួនបានប្រាប់អ្នកសារព័ត៌មានឲ្យដឹងថា៖ ពួកគាត់កំពុងមមាញឹកធ្វើស្រែប្រាំងគឺធ្វើទៅតាមលក្ខណៈបែបធម្មជាតិ ពុំមាននូវបច្ចេកទេសគ្រប់គ្រាន់នោះទេ ដូចនេះពួកគាត់សំណូមពរសុំឲ្យមន្ត្រីជំនាញនៃមន្ទីរកសិកម្មខេត្តមេត្តាចុះជួយផ្ដល់នូវបច្ចេកទេសផ្សេងៗដូចជាការធ្វើដី ប្រើប្រាស់ពូជ ការប្រើប្រាស់ជី និងការប្រើប្រាស់ថ្នាំបាញ់។ប្រជាកសិករបានបន្តថា៖ ពួកគាត់បានធ្វើស្រែប្រាំងនៅតំបន់នេះរយៈពេល៧ឆ្នាំមកហើយ ពុំដែលមាន មន្ត្រីជំនាញបច្ចេកទេសកសិកម្ម ចុះមកពន្យល់ណែនាំឬផ្ដល់នូវបច្ចេកទេសអ្វីនោះឡើយពួកគាត់ធ្វើទៅតាមបែបលក្ខណៈធម្មជាតិតែប៉ុណ្ណោះ៕វណ្ណា
