ភ្នំពេញ៖ ខ្សែភាពយន្តកំប្លែងថ្មីរបស់ផលិតកម្ម LD Picture រឿង «Hello Phnom Penh» បានប្រកាសដាក់បញ្ចាំងជាផ្លូវការហើយកាលពីល្ងាចថ្ងៃទី៣០ ខែឧសភា នេះ។ កម្មវិធីប្រកាសចាក់បញ្ចាំងនេះត្រូវបានធ្វើឡើនៅរោងភាពយន្តទំនើប Legend ផ្សារស្ទឹងមានជ័យក្រោមវត្តមានសិល្បករសិល្បការិនីជាច្រើនរូប។
តារាសម្ដែងដែលបានបង្ហាញខ្លួននៅក្នុងពិធីនោះ រួមមានតួឯកស្រី គៀត សុវណ្ណាឡាង លោក លឹម ជាឡាយ កញ្ញា សុភ័ណ្ឌ លីនដា លោកប៊ីអាយជី លោកស៊ឹម សោភ័ណ្ឌ លោក Pey Pey Dy និងតារាសម្ដែងដែលជាតួអង្គក្នុងរឿង និងភ្ញៀវកិត្តិយសដែលជាតារាបួនដប់រូបផ្សេងទៀត។
លោក លៀក លីណា តំណាងផលិតកម្ម LD Picture បានអះអាងថា ការសម្ពោធរឿង «Hello Phnom Penh » ក្រុមផលិតករនិងតារាសម្ដែងបានកំណត់យកថ្ងៃចុងសប្ដាហ៍កាលពីសប្ដាហ៍មុននោះទេ ប៉ុន្តែដោយសារតែខាងរោងកុនទំនេររោងនៅអំឡុងថ្ងៃច័ន្ទ និងតម្រូវឲ្យបើកសម្ពោធនៅថ្ងៃនោះវិញទើបបណ្ដាលឲ្យផលិតករ និងតួសម្ដែងភាគច្រើនមិនអាចមកបាន។
លោកបញ្ជាក់ថា ខ្សែរឿងនេះត្រូវបានសម្ងំថតយូរហើយដោយថតតំាងពីសួនកម្សាន្តឌ្រីមលែនដ៍នៅបើកដំណើរការនោះទៅទៀត។ រឿង «Hello Phnom Penh » បង្ហាញពីភាពភ្លើតភ្លើនរបស់តួអង្គ៣រូបរួមមាន លោកលឹម ជាឡាយ លោកប៊ីអាយជី និងនាយគ្រឿន បានលួចមកលេងភ្នំពេញ ហើយឈ្លក់វង្វែងនឹងបរិយាកាសនៅក្នុងទីក្រុង ហើយក៏បង្កើតឲ្យមានឆុតឆាកអស់សំណើច និងសាច់រឿងជាមួយតួអង្គស្រីដែលជានារីបម្រើការនៅក្នុងហាង KTV និងកន្លែងផឹកស៊ី។ លោករំពឹងទុកដែរថា ខ្សែភាពយន្តនេះនឹងទទួលបានការគាំទ្រច្រើនពីទស្សនិកជនមិនខុសពីស្នាដៃផលិតរឿងមុនៗរបស់ផលិតកម្ម LD Picture នោះទេ។
តារាសម្តែងស្រីកញ្ញា គៀត សុវណ្ណាឡាង បានបញ្ជាក់ថា ក្រោយវិលមកកាន់ការសម្តែងខ្សែភាពយន្តវិញនាងសង្កេតឃើញថា សន្ទុះនៃការគាំទ្រនាងមានកាន់តែខ្លាំង។ តួឯករឿង «Hello Phnom Penh» រូបនេះបន្តថា សម្រាបខ្សែភាពយន្តនេះគឺនាងពិតជាពេញចិត្តនឹងឈុតឆាកជាច្រើនដែលសម្តែងរូមជាមួយនឹងសិល្បករដទៃពិសេសតួឯកប្រុស លោក លឹម ជាឡាយ ដែលធ្លាប់សម្តែងរួមគ្នាក្នុងរឿង «ម៉ែដោះក្រមុំ»។ នាងបន្តថា មានឈុតឆាកកំប្លែងច្រើនដែលអាចធ្វើឲ្យអ្នកទស្សនាសើច ខណៈដែលតួសម្តែងមួយចំនួនធំសុទ្ធតែជាតារាសម្តែងល្បីឈ្មោះ និងពូកែកំប្លែង ហើយនាងពិតជាសប្បាយរីករាយក្នុងការចូលរួមសម្តែងជាមួយពួកគាត់។ នាងមិនហ៊ានបញ្ជាក់អំពីក្តីរំពឹងយ៉ាងណាទេប៉ុន្តែគឺទុកឲ្យទស្សនិកជនជាអ្នកដាក់ពិន្ទុក្នុងការសម្តែងនិងសាច់រឿងទាំងមូលចុះ។
តួឯកប្រុសលោក លឹម ជាឡាយ បញ្ជាក់ថា លោកពិតជារីករាយដែលស្នាដៃសម្តែងរបស់លោករួមទាំងតារាជាច្រើនទៀតប្រកាសចាក់បញ្ចាំងជាផ្លូវការនៅពេលនេះ។ លោកថា ទោះបីជាមានឈុតឆាកជាច្រើនតម្រូវឲ្យលោកសម្តែងជាតួបែបកំប្លែងក៏វាមិនបង្កជាផលលំបាកខ្លាំងសម្រាប់រូបលោកនោះទេ។ លោកបញ្ជាក់ដែរថា ក្នុងរឿងនេះលោកសម្តែងាតួអង្គអ្នកនៅស្រុកស្រែ ធ្វើដំណើរផ្សងព្រេងទៅទីក្រុងជាមួយមិត្តពីរនាក់ទៀតគឺ លោក BIG និង នាយគ្រឿន ដែលពួកលោកសុទ្ធតែមិនសូវស្គាល់រាជធានីភ្នំពេញច្បាស់ ប៉ុន្តែលោកបានជួបស្នេហានៅទីក្រុងនោះតែម្តង។ លោករំពឹងថា ខ្សែភាពយន្តនេះនឹងទទួលបានការគាំទ្រច្រើនពីទស្សនិកជន។
គួរបញ្ជាក់ដែរថា ខ្សែភាពយន្តរឿង «Hello Phnom Penh » ត្រូវចាក់បញ្ចាំងជាផ្លូវការនៅគ្រប់រោងភាពយន្តទំនើបនៅរាជធានីភ្នំពេញ និងខេត្តសៀមរាបចាប់ពីថ្ងៃទី១ ខែមិថុនា ឆ្នាំ២០១៦ នេះតទៅ៕
ដោយ៖ វឌ្ឍនា
