ខេត្តបន្ទាយមានជ័យ៖ ក្មេងស្រីម្នាក់នៅពីក្រោមផាលត្រាក់ទ័រ ម្ចាស់មិនឃើញ ទម្លាក់ផាលលើសង្កត់ចំក្បាលស្លាប់ ភ្លាមៗនៅនឹងកន្លែងកើតហេតុ កាលពីម៉ោង៧ព្រឹកថ្ងៃទី៣០ ខែឧសភា ឆ្នាំ២០១៦ នៅក្នុងភូមិត្របាំងធ្លក ឃុំបន្ទាយឆ្មាស្រុកថ្មពួក ខេត្តបន្ទាយមានជ័យ។
ក្មេងស្ររងគ្រោះមានឈ្មោះ ភក្រ សុផារី រស់នៅក្នុងភូមិ ឃុំកើតហេតុ ។
សមត្ថកិច្ចប្រាប់ថា មុនកើតហេតុ ក្មេងស្រីរងគ្រោះបានដើរទៅលេងខាងក្រោយ ខាងក្រោមផាលត្រាក់ទ័រ ដោយអ្នកបើកបរត្រាកទ័រមានឈ្មោះ ធឿន ជឿន ភេទប្រុស អាយុ៣០ឆ្នាំ មានទីលំនៅក្នុងភូមិផ្សារថ្មី ឃុំគំរូ ស្រុកថ្មពួក បានលើងទៅបញ្ជាត្រាក់ទ័រម៉ាកគូបូតា ពណ៌ក្រហម ថយក្រោយដើម្បីបំពាក់ផាលទៅភ្ជួរដី ដោយមិនបានឃើញក្មេងរងគ្រោះ នៅពីក្រោយ ក៏ទម្លាក់ ផាលចុះក្រោម សង្កត់ចំក្មេងបណ្ដាលឲ្យបែកក្បាល ស្លាប់ភ្លាមៗនៅកន្លែងកើតហេតុតែម្ដង ។
សូមបញ្ជាក់ថា កន្លងមក សមត្ថកិច្ចនគរបាលស្រុកថ្មពួក ហាក់បីដូចជាមានចេតនា លាក់បាំងរឿងក្នុងមូលដ្ឋាន គ្រាន់តែករណីត្រាក់ទ័រមួយគ្រឿង បានថយក្រោយ កិនបុរសម្នាក់ស្លាប់ ក៏អធិការស្រុកមិនបានប្រាប់កំណត់ហេតុដែរ ដោយឲ្យសុំលោកស្នងការខេត្តទៅវិញ ។
ចំណែកសពក្មេងរងគ្រោះ សមត្ថកិច្ចបានប្រគល់ឲ្យសាច់ញាតិ យកទៅធ្វើបុណ្យតាមប្រពៃណីខ្មែរ ៕
ដោយ៖ វណ្ណា
