សារព័ត៌មាន New York Post បានផ្សាយថា ក្រុមប្រឹក្សាទីក្រុង Kharkov (អ៊ុយក្រែន) ទើបតែបានបង្ហោះរូបភាពនៃដើមឈើណូអែលដែលដាក់នៅស្ថានីយ៍រថភ្លើងក្រោមដី កណ្តាលទីក្រុង។ ខុសពីឆ្នាំមុន ប្រជាជននៅក្នុងទីក្រុងភាគខាងកើតអ៊ុយក្រែននេះនឹងប្រារព្ធពិធីបុណ្យណូអែល និងឆ្នាំថ្មីនៅក្រោមដី ដើម្បីជៀសវាងការវាយប្រហារដោយមីស៊ីលពីរុស្ស៊ី។

យោងតាមរដ្ឋាភិបាលទីក្រុង Kharkov ព្រឹត្តិការណ៍បុណ្យណូអែល និងឆ្នាំថ្មី សម្រាប់ពលរដ្ឋ និងកុមារនៅទូទាំងទីក្រុង នឹងត្រូវធ្វើឡើងនៅស្ថានីយ៍រថភ្លើងក្រោមដី រួមជាមួយនឹងការប្រគុំតន្ត្រីតូចមួយផងដែរ។

កាលពីឆ្នាំមុន ដើមណូអែលរបស់ Kharkov ជាធម្មតាត្រូវបានគេដាក់នៅទីលាន Freedom Square ប៉ុន្តែជាមួយនឹងស្ថានភាពជម្លោះនាពេលបច្ចុប្បន្ន ព្រឹត្តិការណ៍ប្រារព្ធពិធីត្រូវបានបង្ខំឱ្យធ្វើឡើងនៅក្រោមដីដើម្បីសុវត្ថិភាព។

កងកម្លាំងប្រដាប់អាវុធរបស់អ៊ុយក្រែនបានកាន់កាប់តំបន់ Kharkov មកវិញ បន្ទាប់ពីមានការប្រយុទ្ធជាច្រើនខែ។ ទោះបីជាយ៉ាងណាក៏ដោយ តំបន់នេះ និងតំបន់ជុំវិញនៅតែស្ថិតក្រោមការវាយប្រហារដោយមីស៊ីលពីរុស្ស៊ី៕ ដោយ​ធីរីណា

រូប​ថត​ :​twitter