ភ្នំពេញៈ  នគរបាលខណ្ឌឫស្សីកែវបានឃាត់ខ្លួនជនសង្ស័យ៣នាក់បន្ទាប់ពីធ្វើសកម្មភាពលួចម៉ូតូម៉ាកស៊ុយហ្សុ៊យគី
ប៊ីតប៊យបានសម្រេចតែរត់មិនរួច នៅថ្ងៃទី១៥ ខែធ្នូ ឆ្នាំ២០២២ វេលាម៉ោង២ៈ០៤នាទីទៀបភ្លឺ នៅត្រង់ចំណុចបុរីលឹមឈាងហាក់ ផ្លូវលេខ១០០៣ ក្រុមទី៥ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

ជនរងគ្រោះឈ្មោះ គឹម បញ្ញារ័តន៍ ភេទប្រុស អាយុ៣១ឆ្នាំ ជនជាតិខ្មែរ មានទីលំនៅកន្លែងកើតហេតុ មុខរបរអ្នកសារព័ត៌មាន។

ជនសង្ស័យទី១-ឈ្មោះ សុខ ជា ហៅ ណាន ភេទប្រុស អាយុ!២១ឆ្នាំ ជនជាតិខ្មែរ ស្នាក់នៅតាមដីឡូត៍ ក្នុងក្រុម៨ ភូមិស្វាយប៉ាក សង្កាត់ស្វាយប៉ាក មុខរបរមិនពិតប្រាកដ(មានសារធាតុញៀន) ឃាត់ខ្លួន។ ២-ឈ្មោះ សាយ រតនា ហៅ លាន ភេទប្រុស អាយុ២៧ឆ្នាំ ជនជាតិខ្មែរ ស្នាក់នៅតាមដីឡូត៍ក្នុងក្រុម៨ ភូមិស្វាយប៉ាក សង្កាត់ស្វាយប៉ាក(មានសារធាតុញៀន) ឃាត់ខ្លួន ។ ៣-ឈ្មោះ ហាន ភេទប្រុស អាយុប្រហែលជាង៣០ឆ្នាំ (គេចខ្លួន)។
សម្ភារដកហូតមានម៉ូតូ០១គ្រឿងម៉ាកស៊ុយហ្សុ៊យគីប៊ីតប៊យ ពណ៌សលាយខ្មៅ ពាក់ស្លាកលេខ ភ្នំពេញ១i-៤១៦៨
ជារបស់ជនរងគ្រោះ( ប្រគល់ឱ្យជនរងគ្រោះវិញ)។

លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវបានឱ្យដឹងថា មុនពេលកើតហេតុនៅថ្ងៃ ខែ ឆ្នាំ វេលាម៉ោងកើតហេតុខាងលើ ជនរងគ្រោះបានទុកម៉ូតូនៅមុខផ្ទះ ហើយត្រូវបានជនសង្ស័យចូលធ្វើសកម្មភាពលួចយកតែម្តង។ ក្រោយពីទទួលពាក្យបណ្តឹង
របស់ជនរងគ្រោះនិងមានការសហការពីជនរងគ្រោះ រហូតដល់ម៉ោង១៥ៈ១២នាទី ថ្ងៃ ខែ ឆ្នាំដដែលកម្លាំងសមត្ថកិច្ចបានឈានទៅឃាត់ខ្លួនជនសង្ស័យបាននៅចំណុចដីឡូត៍ ផ្លូវបេតុង ក្រុម៨ ភូមិស្វាយប៉ាក សង្កាត់ស្វាយប៉ាក។

នៅចំពោះមុខ កម្លាំងជំនាញខណ្ឌ
កំពុងកសាងសំណុំរឿងបញ្ជួនទៅសាលាដំបូងរាជធានីភ្នំពេញដើម្បីអនុវត្តតាមនីតិវិធី ៕ ដោយ៖ ជីណា