ក្រុមជម្រើជាតិអាហ្សង់ទីនបានយកឈ្នះបារាំងដោយបាល់ប៉េណាល់ទីកាត់សេចក្តី ៤–២ ក្រោយលទ្ធផលប្រកួត១២០នាទីស្មើគ្នា៣ទល់៣ ដើម្បីគ្រងជើងឯក FIFA World Cup 2022 នៅប្រទេសកាតាកាលពីរាត្រីថ្ងៃទី១៨ ខែធ្នូ ឆ្នាំ២០២២នេះ។

 ក្នុងការប្រកួតតង់ទី១ អាហ្សង់ទីនមានការគ្រប់គ្រងបាល់បានច្រើនជា ហើយ Lionel Messi បានស៊ុតទាត់ប៉េណាល់ទីសម្រេចនៅនាទី២៣ និង Angel Di Maria បន្ថែមគ្រាប់ទី៣នៅនាទី៣៦។ ចូលដល់តង់ទី២ នៅនាទី៨០ ខ្សែប្រយុទ្ធ Kylian Mbappe ទាត់បាល់ប៉េណាលទីតាមពីក្រោយ១គ្រាប់វិញ ហើយ២នាទីក្រោយមកបានបន្ថែម១គ្រាប់ទៀតដែលធ្វើឲ្យលទ្ធផលស្មើ ២–២។

 ចូលដល់ម៉ោងបន្ថែម១៥នាទី២ដង គឺ Messi និង Mbappe រកបានម្នាក់មួយគ្រាប់បន្ថែមទៀត ដែលនាំឲ្យមានលទ្ធផលស្មើ ៣–៣មុននឹងអាហ្សង់ទីនឈ្នះដោយប៉េណាល់ទីក្នុងលទ្ធផល៤គ្រាប់ទល់នឹង២គ្រាប់។ នេះជាការឈ្នះពានលើកទី៣របស់ក្រុមមកពីតំបន់អាមេរិកឡាទីនមួយនេះក្រោយរង់ចាំអស់៣៦ឆ្នាំពោលគឺតាំងពីឆ្នាំ១៩៨៦មក។

 ការប្រកួតដណ្តើមពានរង្វាន់បាល់ទាត់ពិភពលោក World Cup 2022 កាលពីរាត្រីថ្ងៃទី១៨នោះ អាហ្សង់ទីនបើកការវាយសម្រុកខ្លាំងលើបារាំងចាប់តាំងពីដើមវគ្គតែម្តងដោយត្រឹម ១០នាទីដំបូងពួកគេរកបានឱកាសស៊ុតបាល់សំដៅទី ៣លើក និងការដាក់សម្ពាធជាបន្តបន្ទាប់លើបារាំង។ បារាំងក្នុងវគ្គទីមួយគ្មានឱកាសស៊ុតសំដៅសំណាញ់ទីអាហ្សង់ទីនសូម្បីតែមួយលើក។ ឈានដល់នាទី២០អាហ្សង់ទីនទទួលបានឱកាសមាសបាល់ពិន័យ១១ម៉ែត្រក្រោយកីឡាករបារាំង Ousmane Dembele បានបង្កកំហុសក្នុងប្រអប់គ្រោះថ្នាក់លើ Angel Di Maria ហើយខ្សែប្រយុទ្ធឆ្នើម Lionel Messi ជាអ្នកសម្រេចស៊ុតបាល់ពិន័យ ១១ម៉ែត្របញ្ចូលទីលើបារាំងនាំមុខ ១–០។ ទោះនាំមុខប៉ុន្តែអាហ្សង់ទីននៅតែបន្តទម្រង់លេងដ៏ល្អរបស់ខ្លួនទល់បារាំងដោយការការពារមិនធ្វេរប្រហែលឱ្យបារាំងមានឱកាសនាំបាល់លេងដល់មុខតំបន់គ្រោះថ្នាក់ខ្លួនបានឡើយ។ គ្រាប់បាល់ទីពីរសម្រាប់ក្រុមមកពីអាម៉េរិកខាងត្បូងបានកើតឡើងបន្ថែមដោយខ្សែបម្រើប្រយុទ្ធ Angel Di Maria នៅនាទី៣៦ ដែលជាបាល់វាយបកក្រោយឆ្មក់យកបាល់បានពីកីឡាករបារាំង។ បញ្ចប់ការប្រកួតក្នុងវគ្គទីមួយអាហ្សង់ទីននាំមុខបណ្តោះអាសន្នលើបារាំង ២–០។ 

 ចាប់ផ្តើមការប្រកួតតង់ទី២អាហ្សង់ទីននៅតែបន្តដាក់សម្ពាធខ្លាំងលើបារាំង និងការសម្រុកខ្លាំងនៅតំបន់ប្រអប់គ្រោះថ្នាក់របស់បារាំងជារឿយៗ ប៉ុន្តែឱកាសរកគ្រាប់បាល់បន្ថែមស៊ុតលើបារាំងមិនកើតមានឡើយ ខណៈដែលបារាំងបានផ្លាស់ប្តូរកីឡាករសំខាន់មួយចំនួនចេញ និងកីឡាករថ្មីចូល។ ចូលដល់នាទីទី៧៥ បារាំងរកបានឱកាសស៊ុតសំដៅទីលើអាហ្សង់ទីនបានត្រឹមតែ២លើកប៉ុណ្ណោះហើយជាស្ថិតិដ៏តិចបំផុតសម្រាប់បារាំងក្នុងការប្រកួត។ បារាំងរកបានឱកាសស៊ុតបាល់ពិន័យ១១ម៉ែត្រត្រឹមនាទី៧៨ ក្រោយកីឡាករអាហ្សង់ទីនបង្កកំហុសក្នុងប្រអប់គ្រោះថ្នាក់ Kylian Mbappe សម្រេចសំណាញ់ទីនាទី៨០ តាមបាន១គ្រាប់ឱ្យបារាំងវិញហើយត្រឹមតែ១នាទីប៉ុណ្ណោះ Kylian Mbappe ក៏រកបានឱកាសស៊ុតបន្ថែមគ្រាប់បាល់តាមស្មើ ២–២ ដោយ Kylian Mbappe ដដែលនៅនាទី៨១។ 

 លទ្ធផលអាហ្សង់ទីនស្មើ ២–២ លើបារាំងបានបន្តអូសបន្លាយរហូតដល់បញ្ចប់ការប្រកួត ក្រុមទាំងសងខាងឈានដល់ការប្រកួតបន្ថែម ១៥នាទី ២ដងដើម្បីកាត់សេចក្តីស្វែករកជើងឯក World Cup 2022។ អាហ្សង់បន្ថែមឱកាសឈ្នះពានរង្វាន់របស់ខ្លួនលើកដំបូងក្នុងរយៈពេល៣៦ឆ្នាំក្រោយ Messi ស៊ុតបន្ថែមគ្រាប់ទី៣នៅនាទី១០៩ យ៉ាងណាមិញហៀបបញ្ចប់ការប្រកួតបារាំងទទួលបានបាល់ពិន័យ១១ម៉ែត្រសារជាថ្មីជាឱកាសតាមស្មើ ៣–៣ វិញ។ បញ្ចប់បន្ថែម១៥នាទី២ដងក្រុមទាំងពីរឈានជើងដល់ការស៊ុតបាល់កាត់សេចក្តី១១ម៉ែត្រ។ ពេលនោះហើយដែលអាហ្សង់ទីនធ្វើបានល្អដោយស៊ុតបាល់ចូល៤គ្រាប់យកឈ្នះបារាំងដែលស៊ុតចូលតែ២គ្រាប់ ក្នុងលទ្ធផល ៤–២។

 ជ័យជម្នះលើបារាំងនជបានជួយឱ្យអាហ្សង់ទីនឈ្នះពានរង្វាន់ World Cup ជាលើកទី៣ក្នុងប្រវត្តិសាស្ត្រខ្លួន និងជាលើកដំបូងក្នុងរយៈពេល៣៦ឆ្នាំចាប់តាំងពីឆ្នាំ១៩៨៦ មកដែលពួកគេបានឈ្នះលើកចុងក្រោយ។ ខ្សែប្រយុទ្ធឆ្នើម Lionel Messi សម្រេចក្តីស្រមៃខ្លួនឈ្នះពានរង្វាន់បាល់ទាត់ពិភពលោកដែលខ្លួនបានតាមប្រម៉ាញ់ជាយូឆ្នាំមកហើយក្នុងអាជីពជាកីឡាករបាល់ទាត់ដ៏កំពូល។ជាមួយគ្នានោះក្រៅពី ទទួលបានពានរង្វាន់ជើងឯកបាល់ទាត់ពិភពលោក World Cup ក្រុមអាហ្សង់ទីនក៏នឹងទទួលបានប្រាក់រង្វាន់ចំនួន៤២លានដុល្លារផង ខណៈដែកក្រុមជើងឯករងបារាំងនឹងទទួលបានប្រាក់រង្វាន់ចំនួន៣០លានដុល្លារ៕ (រូបភាព ៖ FIFA World Cup)