ក្រោយការខិតខំរបស់ក្រុមហ៊ុនបារំាងដែលបានបញ្ចូននាវាមុជទឹកទៅស្វែករកប្រអប់ខ្មៅយន្តហោះដឹកអ្នកដំណើររបស់អេហ្ស៊ីបដែលបានជួបគ្រោះថ្នាក់ដែនសមុទ្រមេឌីទែរ៉ាណេ ពេលនេះមានសញ្ញាហើយ។ ក្រុមហ៊ុនរុករក Alseamar កំពុងសម្តៅទៅកាន់ទីតាំងដែលផ្តល់សញ្ញាទាំងនោះ។ ការស្រង់ប្រអប់ខ្មៅនោះនឹងត្រូវចំណាយពេលជាច្រើនថ្ងៃទៀត។
ប្រអប់ខ្មៅដែលរកឃើញនោះនឹងលាតត្រដាងពីការពិតថាយន្តហោះមានហេតុការអ្វីរងការវាយប្រហារភេរវកម្មដូចការប្រកាសរបស់ក្រុម IS ឬក៏ជួបគ្រោះថ្នាក់អ្វីផ្សេង។
ប្រធានការិយាល័យស៊ើបអង្កេតនិងវិភាគរបស់បារាំងលោក រ៉េមី យូទី បានអះអាងថា ដំណឹងថ្មីនេះជាលទ្ធផលនៃកិច្ចសហប្រតិបត្តិការរួមគ្នាយ៉ាងស្វិតស្វាញរវាងបារាំង និងអេហ្ស៊ីប ហើយថា នេះគ្រាន់ជាជំហ៊ានដំបូងប៉ុណ្ណោះ។ ចំណែកក្រសួងអាកាសចរណ៍ស៊ីវិលអេហ្ស៊ីបបានប្រកាសឲ្យដឹងថា គេត្រូវរង់ចាំប្រមាណ ១សប្តាហ៍ទៀតទើបអាចស្រង់ប្រអប់ខ្មៅទាំងពីរឡើងលើគោកបាន។
សូមរំលឹកជូនឡើងវិញថា យន្តហោះអេហ្ស៊ីបដែលមានជើងហោះហើរលេខ MS ៨០៤ បានហោះចេញពីទីក្រុងប៉ារីសទៅកាន់ប្រទេសអេហ្ស៊ីបក្នុងថ្ងៃទី១៩ ខែឧសភា ឆ្នាំ២០១៦ ស្រាប់តែធ្លាក់ក្នុងសមុទ្រក្នុងថ្ងៃដដែលនាពេលកំពុងហោះហើរដោយមិនដឹងមូលហេតុច្បាស់លាស់។ ព្រឹត្តិការណ៍ធ្លាក់កាលនោះបានបណ្តាលឲ្យស្លាប់មនុស្សទាំង ៦៦នាក់ដែលស្ថិតក្នុងយន្តហោះនោះ។
តាំងពីពេលនោះមក ការស៊ើបអង្កេតនិងយុទ្ធនាការស្វែងរកប្រអប់ខ្មៅទាំងពីររបស់យន្តហោះបានចាប់ផ្តើមរវាងបារាំង និងអេហ្ស៊ីប ដោយមានការចូលរួមពីក្រុមអ្នកជំនាញរបស់ក្រុមហ៊ុនផលិតយន្តហោះ Airbus ផងដែរ។ នាវាបារាំងបានប្រើម៉ាស៊ីនមុជទឹកដែលអាចចាប់បានសញ្ញាផ្តល់ដោយប្រអប់ខ្មៅក្នុងជម្រៅទឹកពី ៤,០០០ ទៅ ៥,០០០ម៉ែត្រ។
គួរបញ្ជាក់ថា ដូចជានៅក្នុងគ្រោះថ្នាក់យន្តហោះផ្សេងដែរ ប្រអប់ខ្មៅទាំងពីរដែលបំពាក់នៅក្នុងយន្តហោះ គឺជាសាក្សីសំខាន់ណាស់សម្រាប់ក្រុមអ្នកស៊ើបអង្កេតដើម្បីស្វែងយល់ការពិត និងមូលហេតុនៃគ្រោះថ្នាក់។ គឺប្រអប់ខ្មៅទាំងពីរនោះហើយដែលជាថតកិច្ចសន្ទនារវាងអ្នកបើកបរ និងថតរាល់ដំណើរការរបស់ម៉ាស៊ីនតាំងពីពេលឡើង ពេលហោះ និងពេលចុះ៕
ប្រែសម្រួល៖ សាធី
