ភ្នំពេញ : បើកទំព័រសករាជថ្មី ឆ្នាំ២០២៣ ភ្លាមពុទ្ធោអើយ មានរឿងរ៉ាវថ្មីទៀតហើយ ! ចេតិយបុរាណ មានអាយុកាលជា១០០ឆ្នាំ ក្នុងវត្តបទុមវតី ត្រូវបានគេវាយស្ទើរបាត់រូបរាងដើម តើនរណាជាអ្នកទទួលខុសត្រូវ ? ។ បើយោងតាមផេក facebook មួយដែលមានឈ្មោះថា , ( មរតកកម្ពុជា ) បានសរសេរថា, កំហុសភិក្ខុសង្ឃទេ ចេតិយបុរាណមួយ ក្នុងវត្តបទុមវតី ត្រូវបានវាយបំបែក ដោយសារការយល់ «ច្រឡំ»,…។ facebook ដដែលបានលើកឡើងថា, (អត់ដឹងអីផង)? ក្នុងនោះថែមទាំង បរិយាយរបៀបចំអក និងសោកស្តាយ ជាគំនិតអភិរក្សនិយម ស្រឡាញ់សម្បត្តិវប្បធម៌ជាតិ ក៏បានសរសេរ Surprise ធ្ងន់ៗថា, (ហេប ភី ញូ យារ ០១.០១.២០២៣)! អាទិត្យមុន ខំប្រាប់និស្សិតជិត៤០០នាក់ និងនិស្សិតថ្នាក់ផ្សេងៗទៀតជាច្រើនរៀងរាល់ឆ្នាំ ដែលរៀនមុខវិជ្ជាស្ថាបត្យកម្មប្រពៃណីនិងសំណង់នៅតាមវត្ត ឲ្យទៅមើលការតុបតែងរចនាវិចិត្រចេតិយមានបិទ «ផ្កាចាន» នៅសល់ក្នុងរវាងស.វ.ទី១៩និងដើមស.វ.ទី២០ (នៅមានតិចតួចណាស់)។ កន្លែងដែលនៅជិតជាងគេគឺ ចេតិយក្នុងវត្តបទុមវតី ក្នុងព.ស.២៤៤៣, ម.ស.១៨២២ (គ.ស.១៩០០) 📝 ឥឡូវនិស្សិតមិនទាន់បានមើលផង វិនាសអន្តធានទៅហើយ ប្អូនៗអ្ហើយ! 😵💫 អនិច្ចា វដ្តសង្ខារា… (និស្សិតដែលសរសេរនិក្ខេបបទថ្នាក់អនុបណ្ឌិតជាមួយសាលានៅប្រទេសបារាំង អំពីចេតិយបិទផ្កាចាននៅស្រុកខ្មែរ មិនទាន់បានចប់សព្វគ្រប់ ដើម្បីតម្កល់ទុកជាឯកសារផង ក៏ទទួលអនិច្ចកម្មទៅហើយដែរ) 😞 Cr: Preap Chanmara ។
បើតាមសារព័ត៌មានក្នុងស្រុក១ បានដកស្រង់ សម្ដេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណៈសង្ឃនាយក បានមានបន្ទូលថា ដំបូងឡើយព្រះសង្ឃដែលជាគណៈគ្រប់គ្រងវត្ត បានប្រាប់ភិក្ខុសង្ឃមួយព្រះអង្គ ឱ្យដឹកនាំជាងទៅជួសជុល និងរៀបចំឥដ្ឋកន្សែង នៅទីតាំងជាប់ចេតិយបុរាណនោះឱ្យបានស្អាត ប៉ុន្តែភិក្ខុសង្ឃដែលដឹកនាំការជួសជុលនោះ ស្ដាប់មិនច្បាស់ បែរជាប្រាប់ជាងឱ្យវាយចេតិយបុរាណទៅវិញ។
«លោក(ព្រះសង្ឃ) ចាត់ចែងឱ្យរៀបចំឥដ្ឋកន្សែងខាងក្រោម ប៉ុន្តែគាត់(ភិក្ខុសង្ឃ)បែរជាច្រឡំទៅរុះចេតិយចាស់។ គាត់ស្មានតែលោកឱ្យរុះ ប៉ុន្តែមិនមានអ្នកណាឱ្យរុះផងហ្នឹង គ្មានអ្នកណាឱ្យប៉ះពាល់ផងហ្នឹង។ មានភិក្ខុមួយអង្គនៅទីនោះ ដឹកនាំប្រាប់ឱ្យវ៉ៃ ទើបបានជាជាងហ៊ានវ៉ៃ»។ នេះជាការអះអាងរបស់ព្រះអង្គ ឃឹម សន នៅថ្ងៃទី២ខែមករា ឆ្នាំ២០២៣នេះ ។ បន្ទាប់ពី សម្ដេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណៈសង្ឃនាយក បានមានបន្ទូល បែបនេះប្រាប់សារព័ត៌មាន គេក៏ពុំដឹងថា, ចំណាត់ការបន្ត ខាងជំនាញក្រសួងវប្បធម៌និងវិចិត្រសិល្បៈ ត្រូវធ្វើកិច្ចការនេះ ដោយរបៀបណាទៀត ? ប៉ុន្តែប្រភពខ្លះបានបញ្ជាក់ថា, មន្ត្រីខាងក្រសួងវប្បធម៌ និង វិចិត្រសិល្បៈ បានមកហាមឃាត់ ទើបចេតិយបុរាណដែលមាន អាយុកាល ជាង១០០ឆ្នាំ នៅសល់បានត្រឹមហ្នឹង ៕
ដោយ : សិលា
