ភ្នំពេញ៖ បុរសម្នាក់ត្រូវបានគេប្រទះឃើញដេកស្លាប់ម្នាក់ឯងនៅក្នុងបន្ទប់ជួលស្ថិតនៅក្នុងភូមិទ្រា៤ សង្កាត់ស្ទឹងមានជ័យ ខណ្ឌមានជ័យ នៅវេលាម៉ោង៦ព្រឹក ថ្ងៃទី៤ ខែមិថុនា ឆ្នាំ២០១៦នេះ។

សាកសពបុរសរងគ្រោះមានឈ្មោះ នូ សារ៉ាក់ អាយុ៣៣ឆ្នាំ មុខរបរជាងម៉ាស៊ីនត្រជាក់ មានស្រុកកំណើតនៅភូមិក្រាំងអំពិល ឃុំក្រាំងស្វាយ ស្រុកព្រៃកប្បាស ខេត្តតាកែវ។

ប្រភពពីកន្លែងកើតហេតុអ្នករស់នៅជិតខាងម្នាក់បានប្រាប់ថា កាលពីល្ងាចម្សិលមិញគេបានឃើញបុរសរូបនោះមកពីធ្វើការហើយគាត់សំរាកបាត់ទៅ។ លុះដល់ព្រឹកឡើងទើបកើតករណីភ្ញាក់ផ្អើលបែបនេះទៅ។

សមត្ថកិច្ចនៅកន្លែងកើតហេតុក៏បានបញ្ជាក់ថា ក្រោយធ្វើកោសល្យវិច័យរួចឲ្យដឹងថា បុរសរូបនេះខ្សល់គបណ្តាលឲ្យស្លាប់ មិនពាក់ព័ន្ធករណីអ្វីផ្សេងឡើយ ហើយសមត្ថកិច្ចក៏បានប្រគល់សពឲ្យគ្រួសារយកទៅធ្វើបុណ្យតាមប្រពៃណីនៅស្រុកកំណើត៕

ដោយ៖ តាឡឹម