ភ្នំពេញ៖ អគ្គិភ័យបានឆាបឆេះផ្ទះប្រជាពលរដ្ឋមួយកន្លែងបណ្តាលឱ្យរងការខូចខាតសម្ភារៈមួយចំនួនធំបង្កការភ្ញាក់ផ្អេីលកាលពីវេលាម៉ោង១៥ និង០០នាទី រសៀលថ្ងៃទី០៤ ខែមករា ឆ្នាំ២០២៣ នៅចំណុចបុរីម៉នរ៉ានី ផ្ទះលេខB1 ផ្លូវលេខ០៥ ភូមិស្វាយ សង្កាត់ស្នោ ខណ្ឌកំបូល។
តាមប្រភពព័ត៌មានបានឱ្យដឹងថា មុនពេលកេីតហេតុម្ចាស់បានដាក់ដាំទឹកនៅចង្ក្រានផ្នែកខាងក្រោយហេីយមកអង្គុយលេងនៅខាងក្នុងផ្ទះបន្ទាប់មកស្រាប់តែឮសំលេងផ្ទុះហ្គាសបង្កជាអណ្តាតភ្លេីងយ៉ាងសន្ធោសន្ធៅទេីបផ្អេីលឆោឡោ ដល់ប្រជាពលរដ្ឋដែលរស់នៅក្បែររាយការណ៍ទៅសមត្ថកិច្ច ចេញរថយន្តពន្លត់អគ្គិភ័យ ជាច្រេីនគ្រឿងមកអន្តរាគមន៍ភ្លាមៗ។
ក្នុងវង្វង់ប្រតិបត្តិការបង្ការគ្រោះអគ្គិភ័យខាងលេីនេះ ប្រេីប្រាស់រថយន្តពន្លត់អគ្គិភ័យចំនួន៦គ្រឿង ឡានទឹករបស់បុរីម៉ន រ៉ានីចំនួន ៣គ្រឿង ឡានទឹកសង្ឃឹមថ្មី ២គ្រឿង និងរថយន្តពន្លត់អគ្គិភ័យ របស់ស្នងការនគរបាលរាជធានីចំនួន១គ្រឿង ហេីយអគ្គិភ័យក៏រលត់ទៅវិញ ដោយមិនមានមនុស្សរងរបួសនោះទេ ចំណែកសម្ភារៈដែលខូចខាតនៅខាងក្នុងចង្ក្រានបាយ ផ្នែកខាងក្រោយខូចខាតទាំងស្រុង៕ដោយ៖សុខាសែនជ័យ
