អង់គ្លេសកំពុងពិចារណាផ្គត់ផ្គង់រថក្រោះដល់អ៊ុយក្រែនជាលើកដំបូងដើម្បីជួយដល់ប្រទេសនេះតទល់ជាមួយរុស្ស៊ី។

សារព័ត៌មាន Sky News បានរាយការណ៍ថា រដ្ឋាភិបាលអង់គ្លេសរបស់នាយករដ្ឋមន្ត្រី Rishi Sunak បានពិភាក្សាអំពីការប្រគល់រថក្រោះ Challenger២ ចំនួន១០គ្រឿងទៅកាន់ទីក្រុង Kiev ។ ការប្រកាសជាផ្លូវការអាចនឹងធ្វើឡើងនៅថ្ងៃទី ២០ ខែមករា។
សារព័ត៌មាន Sky News បានរាយការណ៍ថា ចក្រភពអង់គ្លេស កំពុងពិចារណាផ្ដល់រថក្រោះប្រយុទ្ធជាច្រើនគ្រឿងឱ្យអ៊ុយក្រែនយកទៅប្រើប្រាស់នៅក្នុងសង្រ្គាមប្រឆាំងនឹងការឈ្លានពានរបស់រុស្ស៉ី បន្ទាប់ពីសហរដ្ឋអាមេរិក អាល្លឺម៉ង់ និងបារាំងប្រកាសផ្ដល់រថក្រោះធុនតូចដល់ទីក្រុងកៀវ។ នេះបើតាមការដកស្រង់កការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី១០ ខែមករា ឆ្នាំ២០២៣។
ដោយផ្អែកលើប្រភពដែលខ្លួនទទួលបានពីក្រុមមន្ត្រីលោកខាងលិចក្នុងលក្ខខណ្ឌមិនបញ្ចេញឈ្មោះ សារព័ត៌មាន Sky News បានឱ្យដឹងទៀតថា កិច្ចពិភាក្សាពីផែនការផ្ដល់រថក្រោះប្រយុទ្ធឱ្យអ៊ុយក្រែនកើតមានឡើងកាលពីប៉ុន្មានសប្ដាហ៍កន្លងទៅនេះ ហើយរថក្រោះដែលកំពុងស្ថិតក្នុងការពិចារណា គឺជាប្រភេទរថក្រោះប្រយុទ្ធ Challenger 2។
ការផ្គត់ផ្គង់រថក្រោះប្រយុទ្ធឱ្យអ៊ុយក្រែន ជានិមិត្តរូបដ៏សំខាន់មួយដែលបង្ហាញពីការប្ដេជ្ញាចិត្តគាំទ្ររបស់លោកខាងលិចចំពោះអ៊ុយក្រែន។ ប៉ុន្តែបើតាម Sky News រដ្ឋាភិបាលចក្រភពអង់គ្លេសមិនទាន់ធ្វើការសម្រេចចិត្តចុងក្រោយណាមួយលើការផ្ដល់រថក្រោះប្រយុទ្ធឱ្យអ៊ុយក្រែននៅឡើយទេ ខណៈដែលទីក្រុងឡុងដ៍ត្រូវបានគេរំពឹងថា អាចនឹងផ្ដល់រថក្រោះប្រយុទ្ធ Challenger 2 ចំនួន ១០គ្រឿងឱ្យទីក្រុងកៀវ ក្នុងករណីមានការសម្រេចចិត្តជាផ្លូវការ។
គួរបញ្ជាក់ថា Challenger 2 គឺជារថក្រោះប្រយុទ្ធដែលមានសមត្ថភាពកម្ទេចរថក្រោះ និងត្រូវបានដាក់ឱ្យកងទ័ពអង់គ្លេសប្រើប្រាស់ចាប់តាំងពីឆ្នាំ១៩៩៤មក។ រថក្រោះប្រយុទ្ធនេះក៏ធ្លាប់ធ្វើប្រតិបត្តិការនៅក្នុងសង្រ្គាមនៅបូស្នី កូសូវ៉ូ និងអ៉ីរ៉ាក់ផងដែរ៕ ដោយធីរីណា

រូប​ថត​ :​ REUTERS​