ភ្នំពេញ៖ ជន២នាក់ក្នុងចំណោមពក្ខពួក៤នាក់ត្រូវកម្លាំងនគរបាលខណ្ឌដូនពេញឃាត់ខ្លួនបន្ទាប់ពីជនសង្ស័យទាំងនោះបានធ្វើសកម្មភាពឆក់ទូរស័ព្ទប្រជាពលរដ្ឋនៅតាមដងផ្លូវម្តុំផ្សារកាប់គោ សង្កាត់ទន្លេបាសាក់ ខណ្ឌចំការមន បានសម្រេចហើយបានយកទូរស័ព្ទដៃមកបញ្ចាំនៅកុងស៊ីម្តុំផ្សារកណ្តាល ផ្លូវ១៤៨ ខណ្ឌដូនពេញ។
ហេតុការឃាត់ខ្លួនជនសង្ស័យខាងល់នេះបានធ្វើឡើងនៅវេលាម៉ោង១ និង៣០នាទីរសៀលថ្ងៃទី៦ ខែមិថុនា ឆ្នាំ២០១៦ ស្ថិតនៅចំណុចផ្លូវ១៤៨ សង្កាត់ផ្សារកណ្តាលទី២ ខណ្ឌដូនពេញ។
តាមប្រភពព័ត៌មានពីសមត្ថកិច្ចជំហ៊ានដំបូងបានឲ្យដឹងថា នៅមុនពេលឃាត់ខ្លួនជនសង្ស័យទាំង២នាក់ខាងលើនេះគឺកម្លាំងនគរបាលកងអន្តរាគមន៍ខណ្ឌដូនពេញកំពុងតែជិះល្បាតក្នុងមូលដ្ឋានក៏ប្រទះឃើញជនសង្ស័យទាំង៤នាក់ជិះម៉ូតូ២គ្រឿង មួយគ្រឿងម៉ាកឡេត ពណ៌ស និងមួយគ្រឿងទៀតម៉ាក ហុងដា សេ១២៥ ពណ៌ខ្មៅ បាននាំគ្នាយកទូរស័ព្ទដែលខ្លួនឆក់បានទៅបញ្ចាំក៏ត្រូវសមត្ថកិច្ចសាកសួរធ្វើឲ្យជនសង្ស័យទាំងនោះភ័យ រត់ក៏ត្រូវសមត្ថកិច្ចឃាត់ខ្លួនបាន២នាក់ និងម៉ូតូ២គ្រឿង ចំណែកឯបក្ខពួក២នាក់រត់គេចខ្លួនបាត់។
បច្ចុប្បន្នជនសង្ស័យទាំង២នាក់កំពុងធ្វើការសាកសួរនៅអធិការដ្ឋាននគរបាលខណ្ឌដូនពេញ និងដកហូតបានម៉ូតូ២គ្រឿង និងបញ្ជូនសង្ស័យទៅឲ្យសមត្ថកិច្ចខណ្ឌដូនពេញវិញ៕
ដោយ៖ ស ដារ៉ា
