បើទោះបីពេលនេះទឹកជំនន់នៅដងទន្លេសែនបានស្រកចុះហើយក្តី ប៉ុន្តែការជនលិចនោះបានសម្លាប់មនុស្ស ៤នាក់ ហើយ២៤នាក់ទៀតរងរបួស។ នេះបើតាមការថ្លែងរបស់នាយករដ្ឋមន្ត្រីបារាំងនៅថ្ងៃទី៤ ខែមិថុនា នេះ។ នៅថ្ងៃសៅរ៍នេះទឹកទន្លេសែនប៉ារីសបានស្រកចុះមកវិញ បន្ទាប់ពីបានឡើងដល់កម្រិតខ្ពស់ខ្លាំង ៦.១០ម៉ែត្រ កាលពីយប់ថ្ងៃសុក្រ ចូលព្រឹកថ្ងៃសៅរ៍កន្លងទៅនេះ។
មន្ត្រីគ្រប់គ្រងគ្រោះមន្តរាយបារាំងបានឲ្យដឹងថា ក្នុងចំណោមជនរងគ្រោះដែលស្លាប់ក្នុងហេតុការណ៍ទឹកជំនន់ទន្លេសែននៅបារាំងមានមនុស្សចាស់ៗ៣នាក់អាយុពី៦០ឆ្នាំ ដល់៨៦ឆ្នាំ និងក្មេងប្រុសម្នាក់ អាយុ៣ឆ្នាំ។ ក្មេងតួចបានស្លាប់នៅផ្ទះជាន់ក្រោមដីកាលពីចុងសប្តាហ៍មុននៅឃុំតូចមួយក្នុងតំបន់ Bourgogne Franche Comté ភាគខាងកើតប្រទេស។
កាលពីយប់ថ្ងៃសុក្រចូលព្រឹកថ្ងៃសៅរ៍ កម្ពស់ទឹកបានឡើងដល់កម្រិតខ្ពស់ ៦.១០ម៉ែត្រជាកម្រិតខ្ពស់ខ្លាំង។ ប៉ុន្តែថ្ងៃសៅរ៍នេះកម្ពស់ទឹកបានស្ថិតក្នុងកម្រិតមួយថេរ ហើយបានចាប់ស្រកទៅវិញ។ យោងតាមចៅហ្វាយក្រុងប៉ារីស លោកស្រី អាន ហ៊ីដាល់ហ្កូ ពេលនេះទឹកទន្លេមិនប្រឈមនឹងកម្ពស់ខ្ពស់ជាងនេះទៀតទេ។ ទឹកមានតែត្រូវស្រកទៅវិញប៉ុណ្ណោះ។ តាំងពីមានហេតុការណ៍ជំនន់មកមនុស្ស ២០,០០០នាក់ត្រូវបានជម្លៀសក្នុងនោះមាន ១៧,៥០០នាក់ ជាប្រជាជនតំបន់ក្រុងប៉ារីស។ ការធ្វើដំណើរតាមផ្លូវរថភ្លើងក្រោមដីជួបការរអាក់រអួលខ្លាំង។ យោងតាមនាយករដ្ឋមន្ត្រីបារាំង លោក ម៉ានុយអែល វ៉ាល់ បារាំងត្រូវការពេលច្រើនថ្ងៃទៀត ទំរាំស្ថានការណ៍វិលមករកភាពប្រក្រតីវិញ។
សប្តាហ៍ក្រោយរដ្ឋាភិបាលបារាំងនឹងរៀបចំកិច្ចប្រជុំជាច្រើនក្នុងនោះមានកិច្ចប្រជុំអន្តរក្រសួងដើម្បីពិភាក្សាពីបញ្ហាគ្រោះមហន្តរាយធម្មជាតិនិងកសិកម្ម៕
ប្រែសម្រួល៖ សាធី
