អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌ និងជាអ្នកសម្របសម្រួលជំនួយសង្គ្រោះបន្ទាន់កាលពីម្សិលមិញ (២៥ មករា) បានព្រមានថា ប្រជាជនអាហ្វហ្គានីស្ថានប្រហែល ៦ លាននាក់កំពុងរងគ្រោះដោយសារភាពអត់ឃ្លានក្នុងរដូវរងា ដែលជាកំណត់ត្រាមិនធ្លាប់មានក្នុងរយៈពេល ១៥ ឆ្នាំកន្លងមក។
លោក Martin Griffiths អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌បាននិយាយថា “អ្វីៗកាន់តែពិបាកទៅៗ ដោយសារអាកាសធាតុកាន់តែអាក្រក់ទៅៗ”។ បច្ចុប្បន្នសីតុណ្ហភាពទាបដែលកត់ត្រាបានបណ្តាលឱ្យមនុស្សមួយចំនួនបាត់បង់ជីវិត។ លោកបានព្រមានថា ប្រសិនបើអង្គការមនុស្សធម៌មិនធ្វើអន្តរាគមន៍ភ្លាមៗទេ ចំនួនមនុស្សដែលស្លាប់ដោយសារការអត់ឃ្លាននឹង«ពិបាកទាយទុកមុន»។
យោងតាមមន្ត្រីរដ្ឋាភិបាលអាហ្វហ្គានីស្ថានបានឱ្យដឹងថា មនុស្សជាង១៥០នាក់បានស្លាប់នៅរដូវរងានេះ នៅពេលដែលសីតុណ្ហភាពធ្លាក់ចុះដល់ដក 34 អង្សាសេ ចំពេលមានវិបត្តិសេដ្ឋកិច្ចធ្ងន់ធ្ងរ។
កាលពីខែមុន ក្រុមជំនួយជាច្រើនបានផ្អាកប្រតិបត្តិការមួយផ្នែកក្នុងប្រទេសអាហ្វហ្គានីស្ថាន បន្ទាប់ពីការសម្រេចចិត្តរបស់ពួកតាលីបង់ក្នុងការហាមឃាត់បុគ្គលិកស្រីពីការងារ ដែលធ្វើឱ្យវាមិនអាចទៅរួចទេសម្រាប់ទីភ្នាក់ងារដើម្បីដំណើរការកម្មវិធីជំនួយជាច្រើននៅក្នុងប្រទេស។ អង្គការសហប្រជាជាតិ ក៏កំពុងពិភាក្សាជាមួយមន្ត្រីតាលីបង់ដើម្បីទទួលបានបទបញ្ជាអភ័យឯកសិទ្ធិ ដើម្បីធានាប្រតិបត្តិការរបស់អង្គការមនុស្សធម៌៕ ដោយធីរីណា
រូបថត : Reuters
