ខេត្តព្រះសីហនុ៖ បុរសចំនួន៣នាក់ ត្រូវបានកម្លាំងសមត្ថកិច្ចល្បាតធ្វើការឃាត់ខ្លួន បន្ទាប់ពីពួកគេបានជិះម៉ូតូចំនួន២គ្រឿង រួមជាមួយដាវសាមូរ៉ៃធ្វើការប្រដេញកាប់គ្នានៅលើដងផ្លូវ ក្នុងបំណងបង្កហិង្សាទៅលើភាគីម្ខាងទៀត នាវេលាយប់ថ្ងៃទី៧ ខែមិថុនា ឆ្នាំ២០១៦ ត្រង់ចំណុចភូមិ៣ ក្នុងសង្កាត់លេខ៤ ក្រុង-ខេត្តព្រះសីហនុ។

យោងតាមប្រភពពីសមត្ថកិច្ចមូលដ្ឋានដែលបានចុះសហការណ៍បានបង្ហើបឲ្យដឹងថា នៅវេលាម៉ោង ប្រមាណ១១និង៣០នាទីយប់ថ្ងៃទី៧ ខែមិថុនា ឆ្នាំ២០១៦ ខណៈកម្លាំងការិយាល័យព្រហ្មទណ្ឌនៃស្នងការដ្ឋានគរបាល កំពុងល្បាតនៅតាមផ្លូវក៏ជួបប្រទះ យុវជនចំនួន២ក្រុមបានជិះម៉ូតូដេញគ្នាពេញផ្លូវ ទើបកម្លាំងការិយាល័យព្រហ្មទណ្ឌធ្វើការទប់ស្កាត់ និងឃាត់ខ្លួនបានមនុស្សចំនួន៣នាក់  រួមជាមួយដាវសាមូរ៉ៃ១ដើម បញ្ជូនទៅកាន់ស្នងការដ្ឋានដើម្បីធ្វើការសាកសួរ តាមនីតិវិធីច្បាប់។

យុវជនទាំង៣នាក់ដែលសមត្ថកិច្ចឃាត់ខ្លួនមានទី១-ឈ្មោះ ផាន់ ដាឡែន ភេទប្រុស អាយុ៣៣ឆ្នាំ មុខរបរជាងម៉ូតូ ទី២-ឈ្មោះនាក់ធារ៉ា ភេទប្រុស អាយុ៣១ឆ្នាំ មុខរបរបើកបរដឹកខ្សាច់ និងទី៣-ឈ្មោះ ទុន វ៉ាន់ណា ភេទប្រុស អាយុ៣១ឆ្នាំ មុខរបរបុគ្គលិកហាងម្ហូបស្រស់។

បច្ចុប្បន្នយុវជនជើងខ្លាំងទាំង៣នាក់ត្រូវបានកម្លាំងសមត្ថកិច្ចជំនាញ ឃាត់ខ្លួនធ្វើការសាកសួរតាមនីតិវិធី៕

ដោយ៖ ឆ្លាម សមុទ្រ