ភ្នំពេញ៖ ប្តីប្រពន្ធមួយគូរដោយសារតែទាល់ពាក្យសម្ដីគ្នាបន្តិចបន្តួចរឿងមើលទូរទស្សន៍ និងមិនជួយធ្វើការគ្នា ប្រពន្ធខឹងដាច់ចិត្តដល់ថ្នាក់លើកកាំបិតចុងស្រួចចាក់ប្តីចំដើមទ្រូងខាងស្តាំ បណ្តាលឲ្យហូរឈាមស្រោចខ្លួន ។

ហេតុការណ៍នេះកើតឡើងកាលពីវេលាម៉ោង៩យប់ថ្ងៃទី៧ ខែមិថុនា ឆ្នាំ២០១៦ ស្ថិតនៅចំណុចផ្ទះមួយកន្លែង ភូមិព្រៃព្រីងខាងជើង សង្កាត់ចោមចៅ ខណ្ឌពោធិ័សែនជ័យ ។

បុរសជាប្តីមានឈ្មោះជ្រែង សុភា អាយុ៣៦ មុខរបររត់ឌុប ស្នាក់នៅកន្លែងកើតហេតុ ចំណែកប្រពន្ធរត់ទៅជាមួយកូនប្រុសតូចអាយុ៥ឆ្នាំ បន្ទាប់ពីកើតហេតុ។

តាមប្រភពពីបុរសរងគ្រោះបានប្រាប់ឲ្យដឹងថា នៅមុនពេលកើតហេតុរូបគាត់រត់ម៉ូតូឌុបតាំងពីព្រលឹមទល់ព្រលប់ ដល់ពេលមកផ្ទះវិញ ហូបបាយរួច ប្រពន្ធគាត់មើលទូរទស្សន៍ ហើយគាត់សុំមើលប៉ុស្តិ៍ទូរទស្សន៍ រឿងភាគឥណ្ឌា តែប្រពន្ធមិនព្រមដាក់ប៉ុស្តិ៍ឲ្យមើល ហើយប្រាប់ថាម៉េចរឿងនឹងសំខាន់ណាស់អី។ បុរសជាប្តីបន្តថា  «ចំណែកអូនឯងនៅតែផ្ទះគ្មានធ្វើអី  ម៉េចខ្ញុំខំរត់ម៉ូតូឌុបតាំងពីថ្ងៃដល់យប់ រកលុយចូលផ្ទះគ្រាន់តែចង់មើលរឿងប៉ុណ្ណឹងមិនបានទេអី» ហើយរូបគាត់ជាប្តីក៏ ខឹងបានទៅវាយ២ទៅ៣ដៃ ស្រាប់តែប្រពន្ធស្ទុះយកកាំបិតចិតបន្លែ ចាក់ចំដើមទ្រូងខាងស្តាំ បណ្តាលឲ្យបាញ់ឈាមហូរស្រោចពេលខ្លួនគួរឲ្យអាណិត ។ បន្ទាប់ពីចាក់រួចប្រពន្ធគាត់បានរត់ទៅជាមួយកូនប្រុសតូចអាយុ៥ម្នាក់ឲ្យគាត់នៅម្នាក់ឯង។

បើតាមប្រភពពីកន្លែងកើតហេតុបានឲ្យដឹងថា បុរសរងគ្រោះជាមនុស្សចិត្តល្អ ហើយស្លូតតាំងពីមកនៅទីនេះ ជាង២ឆ្នាំហើយ ឃើញតែប្រពន្ធគាត់រករឿង និងវាយគាត់រហូតនិងធ្លាប់បង្ករបួសស្នាមម្តងដែរ តែមិនធ្ងន់ធ្ងរដូចលើកនេះ ក្រោយពេលប្រពន្ធគាត់រត់ទៅបាត់ បុរសរងគ្រោះបានខំជិះម៉ូតូតាមរកប្រពន្ធទាំងខ្លួនរងរបួសទៀតផង។

ក្រោយពេលកើតហេតុ ត្រូវបានអ្នកជិតខាងជួយជូនទៅពេទ្យក្បែរនោះដែរតែពេទ្យមិនហ៊ានទទួលព្រោះរបួសធ្ងន់ពេក ទើបប្រជាពលរដ្ឋទូរស័ព្ទហៅរថយន្តក្រុមសង្គ្រោះបន្ទាន់ ៧១១ កងពល ៧០ដឹកទៅព្យាបាលនៅមន្ទីរពេទ្យព្រះកុសុមះ៕

ដោយ៖ សុខាសែនជ័យ