ក្រុមអធិរាជស Real Madrid បានឡើងទៅវគ្គពាក់កណ្តាលផ្តាច់ព្រ័ត្រនៃពានរង្វាន់ Copa del Rey រដូវកាលនេះ ដោយបានទម្លាក់គូប្រជែងដែលស្ថិតក្នុងទីក្រុង Madrid ជាមួយគ្នា Atletico Madrid ក្នុងជំនួបវគ្គ៨ក្រុមចុងក្រោយកាលពីរំលងអធ្រាត្រឈានចូលថ្ងៃទី២៧ ខែមករា ក្នុងលទ្ធផល ៣ទល់១ នៅម៉ោងបន្ថែមទាំងលំបាក។

 អតីតម្ចាស់ជើងឯក Copa del Rey ១៩លើក Real Madrid បានខកខានឈ្នះពាននេះតាំងឆ្នាំ២០១៤មក នៅពេលយកឈ្នះ FC Barcelona ២ទល់នឹង១ នៅវគ្គផ្តាច់ព្រ័ត្រ។ ក្រោយជ័យជម្នះនេះ Real Madrid បានឡើងទៅកាន់វគ្គ៤ក្រុមចុងក្រោយជាមួយBarcelona, Osasuna និង Athletic Bilbao ដែលនឹងចាប់ឆ្នោតជ្រើសរើសគូប្រកួតក្នុងវគ្គពាក់កណ្តាលផ្តាច់ព្រ័ត្រនាថ្ងៃទី៣០ខែមករា ឆ្នាំ២០២៣ខាងមុខ។

 ការប្រកួតរវាង Real Madrid នឹង Atletico Madrid នេះក្នុងតង់ទី១ ខ្សែប្រយុទ្ធ Alvaro Morata រកបានគ្រាប់នាំមុខឲ្យAtletico Madrid ពីការបញ្ជូនរបស់ Nahuel Molina ប៉ុន្តែ Real Madrid តាមបានស្មើ ១–១ មកវិញនៅចុងម៉ោងដោយRodrygo ក្នុងប្រកួតដែល Stefan Savic របស់ Atletico Madrid ត្រូវបានពិន័យកាតក្រហមនៅតង់ទី២ដែរ។

ខ្សែប្រយុទ្ធ Karim Benzema និង Vinicius Jr បានរួមចំណែករកបានម្នាក់១គ្រាប់ទៀតក្នុងម៉ោងថែម១៥នាទី២ដង ក្នុជួយឲ្យReal Madrid ឡើងទៅកាន់វគ្គ៤ក្រុមចុងក្រោយដែលខកខានរយៈពេល៩រដូវកាលមកហើយ។

ក្នុងពានរង្វាន់ Copa del Rey នេះក្រុម Barcelona ជាអ្នកឈ្នះច្រើនជាងគេដល់ទៅ៣១លើកមក, ក្រុម Athletico Bilbao ឈរលេខ២ ឈ្នះបានចំនួន២៣លើក, Real Madrid ឈ្នះបាន១៩លើក និង Osasuna បានត្រឹមរងជើងឯក១លើក។ សម្រាប់ការប្រកួតជើងទី១នឹងធ្វើឡើងនៅនាខែកុម្ភៈ និងជើងទី២ ដើមខែមីនា គ្រាដែលផ្តាច់ព្រ័ត្រនឹងធ្វើឡើងនាថ្ងៃទី៦ ខែឧសភាឆ្នាំ២០២៣៕ (រូបភាព ៖ BBC Sport)