ក្រុមប្រឹក្សាអូឡាំពិកអាស៊ី (OCA) បានអះអាងថា ខ្លួនបានផ្តល់ការអនុញ្ញាតឱ្យអត្តពលិករុស្ស៊ី និងបេឡារូសចូលរួមក្នុងកីឡាទ្វីបអាស៊ី ដែលជាជំហានដំបូងឆ្ពោះទៅរកពួកគេចូលរួមប្រកួតកីឡាអូឡាំពិករដូវក្តៅនៅទីក្រុងប៉ារីសឆ្នាំ២០២៤។

គណៈកម្មាធិការអូឡាំពិកអន្តរជាតិបានប្រកាសថា ផ្លូវសម្រាប់ការវិលត្រឡប់របស់អត្តពលិកមកពីប្រទេសទាំង២ដើម្បីប្រកួតប្រជែងក្រោមលក្ខខណ្ឌដ៏តឹងរឹងគួរតែត្រូវបានស្វែងរកបន្ថែមទៀត។

OCA បានប្រកាសនៅក្នុងសេចក្តីថ្លែងការណ៍មួយថា “OCA ជឿជាក់លើថាមពលបង្រួបបង្រួមនៃកីឡា ហើយអត្តពលិកទាំងអស់ ដោយមិនគិតពីសញ្ជាតិ ឬលិខិតឆ្លងដែនដែលពួកគេកាន់ គួរតែអាចប្រកួតប្រជែងក្នុងការប្រកួតកីឡា។ OCA បានផ្តល់ឱកាសឱ្យអត្តពលិករុស្ស៊ី និងបេឡារូសដែលមានសិទ្ធិចូលរួមក្នុងការប្រកួតនៅអាស៊ី រួមទាំងកីឡាទ្វីបអាស៊ី”។

ព្រឹត្តិការណ៍ Asian Games គឺជាការប្រកួតជម្រុះអូឡាំពិក ហើយការផ្លាស់ប្តូរនេះអាចជួយអត្តពលិកមកពីប្រទេសទាំង២ចូលរួមប្រកួតប្រជែងនៅព្រឹត្តិការណ៍អូឡាំពិកទីក្រុងប៉ារីសឆ្នាំ២០២៤។ វគ្គជម្រុះសម្រាប់ព្រឹត្តិការណ៍កីឡាអូឡាំពិកនៅទីក្រុងប៉ារីសក្នុងប្រភេទកីឡាមួយចំនួនបានចាប់ផ្តើមជាមួយនឹងព្រឹត្តិការណ៍ជាច្រើនទៀតពេញមួយឆ្នាំ។

ចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងខែកុម្ភៈ ស្ថាប័នកីឡាជាច្រើនបានផ្លាស់ប្តូរព្រឹត្តិការណ៍ និងផ្អាកក្រុម ឬអត្តពលិករុស្ស៊ី ខណៈដែលអ្នកឧបត្ថម្ភបានបញ្ចប់កិច្ចសន្យាដើម្បីតវ៉ាប្រឆាំងនឹងសង្គ្រាមនេះ។ ប្រទេសបេឡារូសគឺជាតំបន់សំខាន់មួយដែលគាំទ្រសម្រាប់ការលុកលុយ ដែលរុស្ស៊ីហៅថា “ប្រតិបត្តិការយោធាពិសេស”។

នៅក្នុងការហៅទូរស័ព្ទជាមួយប្រធាន IOC លោក Thomas Bach កាលពីខែធ្នូ ប្រធានាធិបតីអ៊ុយក្រែនលោក Volodymyr Zelenskiy បានប្រឆាំងនឹងគំនិតនៃអត្តពលិករុស្ស៊ីដែលចូលរួមក្នុងប្រភេទនៃបដាអព្យាក្រឹតណាមួយនៅក្នុងព្រឹត្តិការណ៍កីឡារដូវក្តៅឆ្នាំ២០២៤។ ព្រឹត្តិការណ៍កីឡាអាស៊ី Hangzhou ដែលមិនអាចធ្វើជាម្ចាស់ផ្ទះបានកាលពីឆ្នាំមុន ដោយសារជំងឺកូវីដ-១៩ នឹងប្រព្រឹត្តទៅនៅប្រទេសចិនចាប់ពីថ្ងៃទី២៣ ខែកញ្ញា ដល់ថ្ងៃទី៨ ខែតុលា ឆ្នាំ២០២៣ខាងមុខ ៕ (រូបភាព ៖ Reuters/CNA)