ខេត្តព្រះសីហនុ៖ ដោយមានការចង្អុលបង្ហាញពីសំណាក់ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ លោកវរសេនីយ៍ឯក គីម សុង នាយការិយាល័យនគរបាលចរាចរណ៍ផ្លូវគោក នៅថ្ងៃសៅរ៍ ១៣រោច ខែមាឃ ឆ្នាំខាល ចត្វាស័ក ពស ២៥៦៦ ត្រូវនឹងថ្ងៃទី១៨ ខែកុម្ភៈ ឆ្នាំ២០២៣នេះ បានដឹកនាំគ្រូបង្គោលនៃការិយាល័យនគរបាលចរាចរណ៍ផ្លូវគោក ធ្វេីបទបង្ហាញស្តីពីច្បាប់ចរាចរណ៍ផ្លូវគោក និងសុវត្ថិភាពក្នុងការបេីកបរ ក្នុងកម្មវិធីយុទ្ធនាការសុវត្ថិភាពឆ្នាំ២០២៣ ដល់សិស្សថ្នាក់អនុវិទ្យាល័យ ។
កម្មវិធីនេះបានរៀបចំឡេីងនៅក្នុងបរិវេនសាលាអនុវិទ្យាល័យ ហ៊ុន សែន ឃ្លាំងលើ ដែលស្ថិតនៅភូមិ០១ សង្កាត់០១ ក្រុង-ខេត្តព្រះសីហនុ ដោយមានការចូលរួមពីលោកអនុប្រធានមន្ទីរសាធារណការខេត្តព្រះសីហនុ លោកនាយកសាលាអនុវិទ្យាល័យ ហ៊ុន សែន ឃ្លាំងលើ និងលោកគ្រូ អ្នកគ្រូ អាណាព្យាបាលសិស្សានុសិស្ស ចំនួន១៣០០នាក់ ស្រី៧៥០នាក់ ។
សូមជម្រាបជូនថា កម្លាំងការិយាល័យនគរបាលចរាចរណ៍ផ្លូវគោក សហការជាមួយកម្លាំងការិយាល័យប្រឆាំងបទល្មើសគ្រឿងញៀន បានចុះរឹតបន្តឹងច្បាប់ស្តីពីចរាចរណ៍ផ្លូវគោក ត្រួតពិនិត្យជាតិស្រវឹងអ្នកបើកបរយានយន្ត ត្រួតពិនិត្យលក្ខណៈបច្ចេកទេសយានយន្ត ត្រួតពិនិត្យល្បឿន និងត្រួតពិនិត្យរកសារធាតុញៀនអ្នកបើកបររថយន្ត ដេីម្បីកាត់បន្ថយការគ្រោះថ្នាក់ចរាចរណ៍កេីតឡេីងជាយថាហេតុ នៅលើកំណាត់ផ្លូវជាតិលេខ៤ និងធ្វើការឃាត់រថយន្ត និងម៉ូតូ ដែលបើកបរបញ្រ្ចាសទិស នៅត្រង់ចំណុចរង្វង់មូលសីហរាជមុខបី ស្ថិតនៅភូមិ១ សង្កាត់១ ក្រុង-ខេត្តព្រះសីហនុ។
គួរបញ្ជាក់ថា ជារៀងរាល់ថ្ងៃ កម្លាំងការិយាល័យចរាចរណ៍ផ្លូវគោក បានចុះសម្រួលចរាចរណ៍ជូនសិស្សានុសិស្ស នៅតាមសាលារៀន ក្នុងភូមិសាស្រ្តក្រុងព្រះសីហនុផងដែរ៕ដោយ៖សហការី
