អ្នកចាត់ការក្រុម Chelsea លោក Graham Potter និយាយថា ប្រធានក្រុម Cesar Azpilicueta បានដឹងខ្លួន និងនិយាយរួចហើយនៅក្នុងមន្ទីរពេទ្យ បន្ទាប់ពីទទួលរងរបួសក្បាលអំឡុងពេលចាញ់ Southampton ក្នុងផ្ទះកាលពីថ្ងៃសៅរ៍ម្សិលមិញ។

 កីឡាករ Azpilicueta បានរងរបួសដេក គ្មាន ចលនា នៅ លើ ទីលាន បន្ទាប់ ពី ត្រូវកីឡាករ Sekou Mara ទាត់ភ្លាត់ចំ មុខ ខណៈកីឡាករ បម្រុងក្រុម Southampton រូបនេះព្យាយាម ទាត់ បាល់ដែលស្ថិតនៅលើក្បាលកីឡាករ Azpilicueta ។

 កីឡាករ Mara មើលទៅមានការសោកស្តាយនៅពេលដែលកីឡាករមកពីក្រុមទាំង២ និងបុគ្គលិកពេទ្យបានប្រញាប់ប្រញាល់ទៅរកជំនួយរបស់ខ្សែការពារវ័យ៣៣ឆ្នាំ Azpilicueta នៅកីឡដ្ឋាន Stamford Bridge ។

 កីឡាករ Azpilicueta បានទទួលការព្យាបាលដោយអុកស៊ីសែនអស់រយៈពេលជាច្រើននាទី មុនពេលត្រូវបានសែងចេញទោះបីជាគាត់ដឹងខ្លួននៅពេលគាត់ចាកចេញពីទីលានក៏ដោយ។

 លោក Potter បាននិយាយថា “វាជាពេលវេលាដ៏អាក្រក់មួយសម្រាប់ពួកយើង។ គាត់ ដឹង ខ្លួន នៅ មន្ទីរពេទ្យ ហើយ គាត់ កំពុងនិយាយ ជាមួយ ប្រពន្ធ គាត់។ យើង កំពុង តាម ដាន គាត់ ហើយ ធ្វើ ឲ្យ ប្រាកដ ថា គាត់ មិន អី ទេ។ ខ្ញុំ គិត ថា គាត់ សន្លប់ នៅពេល មួយ ដូច្នេះ វា ជា ការ ព្រួយ បារម្ភ សម្រាប់ អ្នក រាល់ គ្នា វា ជា រឿង ចៃដន្យ ប៉ុន្តែ វា ជា ការ ទាត់ ចំ មុខ អ្នក អាច មើលឃើញ ថា វា អាក្រក់ ប៉ុណ្ណា”។

 គួរបញ្ជាក់ថា ការស៊ុតបាល់ពិន័យ Free-kick របស់កីឡាករ James Ward-Prowse នៅតង់ទី១បានធ្វើឲ្យក្រុមតោខៀវរងការបរាជ័យលើកទី៥របស់ពួកគេក្នុងឆ្នាំ២០២៣នេះ ហើយធ្វើឲ្យក្រុមតោខៀវ Chelsea ចាញ់រហូតដល់១០ពិន្ទុពីលើក្រុមកំពូលតារាងPremier League ទាំង៤ជាមួយនឹងការប្រកួតលីកចំនួន១៥ដែលនៅសល់ ៕ (រូបភាព ៖ BBC Sport)