ភ្នំពេញ​ ៖​ បុរសម្នាក់បានរងរបួសធ្ងន់​ ហេីយត្រូវបានរថយន្តសាមុយដឹកបញ្ចូនយកទៅសង្គ្រោះនៅឯមន្ទីរពេទ្យភ្លាមៗ​ បន្ទាប់ពីមានរថយន្តស៊េរីទំនើបម៉ាកមែរ
សឺដេសមួយគ្រឿងបានបើកបុកម៉ូតូហុងដាស្គូពីរបស់ជនរងគ្រោះនៅត្រង់ចំណុចផ្លូវបំបែកជាបួនពេញទំហឹងនិងអូសជា
ច្រេីនម៉ែត្រ​ កាលពីវេលាម៉ោង១២និង ៥៥នាទីរំលងអធ្រាត្រឈានចូលថ្ងៃទី២៥ ខែកុម្ភៈ ឆ្នាំ២០២៣ នៅតាមបណ្ដោយផ្លូវR6 កែងនឹងផ្លូវR8  ស្ថិតក្នុងបរិវេណបឹងកក់ សង្កាត់ស្រះចក​ ខណ្ឌដូនពេញ រាជធានីភ្នំពេញ។

​     តាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុគេឃើញរថយន្តម៉ាក​មែរសឺដេសមួយគ្រឿង​ ពណ៌ប្រផេះ​ ពាក់ផ្លាកលេខភ្នំពេញ2AK-7653 បើកបរតាមបណ្ដោយផ្លូវR6 ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើផ្លូវបំបែកជាបួនក៏បានបុកជាមួយម៉ូតូមួយគ្រឿងម៉ាកហុងដាស្គូពី​ ពណ៌ស​ ពាក់ផ្លាកលេខភ្នំពេញ1II-3562ជិះដោយបុរសម្នាក់ធ្វើដំណើរតាមបណ្ដោយផ្លូវR8ក្នុងទិសដៅពីលិចទៅកើតចំពីចំហៀងពេញទំហឹងបណ្ដាលឱ្យម៉ូតូដួលអូសទៅអែបចិញ្ចើមផ្លូវរងការខូចខាតយ៉ាងដំណំ​ ចំណែកអ្នកបើកបរម៉ូតូរងរបួសធ្ងន់។
​     ក្រោយកើតហេតុភ្លាមៗ​ ជនរងគ្រោះត្រូវបានរថយន្តសាមុយដឹកយកទៅសង្គ្រោះនៅឯមន្ទីរពេទ្យ។ ចំណែករថយន្តនិងម៉ូតូ​ ត្រូវបានសមត្ថកិច្ចធ្វើការវាស់វែងយកទៅរក្សាទុករង់ចាំធ្វើការដោះស្រាយគ្នាតាមក្រោយបន្ត​ ៕​

ដោយ​ ៖​ ភារ៉ា​ ដង្កោ