ភ្នំពេញ៖ ទោះបីជាចំនួនអ្នកបើកមើលវីដេអូ​នៃការច្រៀងរបស់នាងមានចំនួនច្រើនលើសលប់ជាងបេក្ខជនដទៃក្តីក៏ បេក្ខជន The Voice Cambodia Season II  កញ្ញា រ៉េត ស៊ូហ្សាណា បានធ្លាក់ពីការប្រកួតក្នុងវគ្គពាក់កណ្តាលផ្តាច់ព្រ័តកាលពីរាត្រីថ្ងៃទី១២ ខែមិថុនា នេះ។ ការចាកចេញពីកម្មវិធីរបស់បេក្ខជនល្បីឈ្មោះនេះបន្ទាប់ពីកម្មវិធីតម្រូវឲ្យការឈានទៅវគ្គផ្តាច់ព្រ័តគឺត្រូវឆ្លងកាត់ការបោះឆ្នោតពីទស្សនិកជន។

កូនក្រុមរបស់តារាចម្រៀង ឱក សុគន្ធកញ្ញា ត្រូវបានគេចាត់ទុកថា ជាក្រុមដែលទទួលបានការចាប់អារម្មណ៍ខ្លាំងជាគេពីទស្សនិកជន។ កន្លងមកនៅលើបណ្ដាញហ្វេសប៊ុកមានការរិះគន់ថា Coach ឱក សុគន្ធកញ្ញា មានភាពមិនយុត្តិធម៌ព្រោះតែឲ្យ រ៉េត ស៊ូហ្សាណា ច្រៀងបទដែលមានតុងទាបនិងជាបទចម្រៀងជាភាសាអង់គ្លេស ហើយឲ្យ ថែល ថៃ ច្រៀងបទស្រែកៗមានតុងខ្ពស់ពិបាកច្រៀង។ ប៉ុន្តែនៅពេលនេះការរិះគន់ត្រូវបានបញ្ចប់គ្រាដែល ស៊ូហ្សាណា ត្រូវបានទម្លាក់កាលពីយប់ថ្ងៃទី១២ ខែមិថុនា ក្នុងកម្មវិធី The Voice Cambodia Season II ដោយជើងខ្លាំង ថែល ថៃ ដែលជាប់ដោយការបោះឆ្នោតកាលពីសប្តាហ៍មុនដែរ។ ការបរាជ័យរបស់នាងក៏នឹងអាចធ្វើឲ្យអ្នករិះគន់ថា នាងនិយមច្រៀងបទជាភាសាអង់គ្លេសនោះស្ងប់ចិត្តផងដែរ ប៉ុន្តែក៏បានធ្វើឲ្យអ្នកគាំទ្រនាងជាច្រើនមិនអស់ចិត្ត។ ទោះជាយ៉ាងណាវាត្រូវបានគេចាត់ទុកថា ជារឿងធម្មតាក្នុងការប្រកួតប្រជែងដែលតម្រូវឲ្យមានអ្នកដើរចេញពីកម្មវិធីនេះ។

ក្រោយប្រកាសលទ្ធផលឲ្យ រ៉េត ស៊ូហ្សាណា ធ្លាក់ពីកម្មវិធីបានធ្វើឲ្យគ្រូបង្វឹក ឱក សុគន្ធកញ្ញា ត្រូវបង្ហូទឹកភ្នែក និងយំឱប រ៉េត ស៊ូហ្សាណា ។ មុនពេលចាកចេញពីកម្មវិធី រ៉េត ស៊ូហ្សាណា បានបង្ហូរទឹកភ្នែកឱបគ្រូបង្វឹកជាមួយនឹងអារម្មណ៍សោកស្តាយការបញ្ចប់វគ្គពាក់កណ្តាលផ្តាច់ព្រ័តនេះ។

ថែល ថៃ គឺជាបេក្ខជនតែម្នាក់ដែលមានប្រជាប្រិយភាពដែលមានសំឡេងធ្ងន់ល្អដែលធ្លាប់ទទួលបានសារគាំទ្រច្រើនពីទស្សនិកជន។ ក្រោយជាប់ទៅវគ្គផ្តាច់ព្រ័តបេក្ខជនរូបនេះទទួលបានប្រាក់រង្វាន់ ២ពាន់ដុល្លារ ដោយស្វ័យផងដែរ ។ ថែល ថៃ ក៏នឹងជួបជើងខ្លាំងបីនាក់ផ្សេងទៀតពីក្រុមរបស់ Coach ដទៃនៅសប្តាហ៍ក្រោយដើម្បីរកជើងខ្លាំងលើកពាន The Voice Cambodia រដូវកាលទី២ ។ បេក្ខជនដែល ថែល ថៃ ត្រូវជួបនៅវគ្គផ្តាច់ព្រ័តនាសប្តាហ៍ក្រោយនោះគឺបេក្ខនារី ឈីន រតនៈ ក្នុងក្រុមលោក ណុប បាយ៉ារិទ្ធិ, បេក្ខនារី សាន ស្រីឡៃ ក្នុងក្រុមរបស់អ្នកនាង ពេជ្រ សោភា និងបេក្ខជន ឃី សុឃុន ក្នុងក្រុមលោក ឆន សុវណ្ណរាជ ៕

ដោយ៖ វឌ្ឍនា