ខេត្តកណ្តាល៖ ទូកដឹកដែកនិងគ្រឿងសំណង់១គ្រឿងទម្ងន់ជាង ៣០០តោនបានលិចចូលក្នុងទន្លេបាត់ខ្លួនមនុស្ស២នាក់ម្តាយនិងកូនកាលពីវេលាម៉ោង៣និង៣០នាទីទៀបភ្លឺថ្ងៃទី១៣ ខែមិថុនា ឆ្នាំ២០១៦ នៅចនុចផែដែករបស់យាយលឹម ក្នុងភូមិខ្សុំ ឃុំបន្ទាយដែក ស្រុកកៀនស្វាយ ។

ជនរងគ្រោះដែលបាត់ខ្លួន២នាក់មានឈ្មោះ ចាំង ម៉ីថាន់ ភេទស្រី អាយុ២៨ឆ្នាំ ជនជាតិវៀតណាម មានទីលំនៅប្រទេសវៀតណាម និងម្នាក់ទៀតត្រូវជាកូនឈ្មោះ ផាម ជីធិន ភេទប្រុស អាយុ២ឆ្នាំ ។ ចំណែក៥នាក់ទៀតរួចផុតពីគ្រោះថ្នាក់ដល់ជីវិត ។

លោក ព្រើម ប៊ុនធឿន នាយប៉ុស្តិ៍នគរបាលបន្ទាយដែកបានឲ្យដឹងថា ទូកដែលលិចនេះជាប្រភេទទូកដឹកដែកនិងគ្រឿងសំណង់ទម្ងង់ជាង ៣០០តោននាំចូលពីប្រទេសវៀតណាម ហើយឈប់ចតនៅកំពង់ផែដែកស្រាប់តែនៅវេលាទៀបភ្លឺទូកបានផ្អៀងលិចចូលក្នុងទន្លេតែម្តង ហើយអ្នកនៅលើទូកចំនួន៥នាក់លោតចូលទឹកហែលមកច្រាំងដោយឡែក២នាក់ម្តាយនិងកូនដែលលង់លក់ក្នុងដំណេកលិចទៅតាមទូកបាត់តែម្តង។

បច្ចុប្បន្មម្ចាស់ទូកដឹកទំនិញបានជួលអ្នកមុជទឹកឲ្យមុជរាវរកជនរងគ្រោះ៕

ដោយ៖ សណ្តោស