ភ្នំពេញ៖ តេីវាជាភាពកុំខ្សោយ របស់អាជ្ញាធរមានសមត្ថកិច្ចមូលដ្ឋាន ឬក៏អំណាចទឹកប្រាក់ទេីបធ្វេីឱ្យអាជ្ញាធរទាំងនោះខ្វាក់ភ្នែក ខណៈមន្ត្រីជំនាញទាំងនោះ បាននិយាយថា បានចុះណែនាំជាច្រើនលើកច្រើនសារ រហូតដល់ទៅ ០៦ដងហេីយ ប៉ុន្តែគ្មានអ្នកបង្ក្រាប។
ជាក់ស្ដែងយោងតាមប្រភពព័ត៌មានពីសេចក្ដីរាយការណ៍របស់ប្រជាពលរដ្ឋ បានឱ្យដឹងថា ទីតាំងផ្សារទំនើបបឹងត្របែកផ្លាហ្សា ស្ថិតក្នុងសង្កាត់បឹងត្របែក ខណ្ឌចំការមន រាជធានីភ្នំពេញ បច្ចុប្បន្នកំពុងបង្កប់ល្បែងស៊ីសងហ្គេមបាញ់ត្រីយ៉ាងរលូន ដោយពួគាត់សង្កេតឃេីញថាមានមនុស្សគ្រប់វ័យបាននាំគ្នាចូលទៅលេងទាំងយប់ ទាំងថ្ងៃ។
សេចក្ដីរាយការណ៍ដដែលបន្តថា ទីតាំងល្បែងស៊ីសងខ្នាតធំមួយនេះ គេមើលឃើញមានអ្នកញៀនល្បែងចូលលេងទាំងយប់ ទាំងថ្ងៃមិនដាច់នោះទេ ដែលធ្វើឲ្យពួកគាត់មានការព្រួយបារម្ភពាក់ព័ន្ធនឹងបទល្មើសនានាដូចជាចោរលួច ចោរប្លន់ជាដើម និងរំលោភលើគោលនយោបាយភូមិឃុំមានសុវត្ថិភាពរបស់ប្រមុខរដ្ឋាភិបាលផងដែរ។
ជុំវិញករណីនេះដែរ លោក កៀង លក្ខ័ អភិបាល នៃអភិបាលខណ្ឌចំការមន បានថ្លែងឱ្យអង្គភាពកាសែតនគរវត្ត និងនគរដ្រេហ្គន តាមរយៈទូរស័ព្ទនៅរសៀលថ្ងៃអង្គារទី០៧ ខែមីនា ឆ្នាំ២០២៣នេះថា៖ លោកកំពុងជាប់រវល់ប្រជុំសិន។
ដោយឡែកលោក យិន សាន អធិការនគរបាលខណ្ឌចំការមន បានប្រាប់តាមទូរស័ព្ទនៅរសៀលថ្ងៃនេះដែរថា៖ ទីតាំងខាងលេីនេះ លោកធ្លាប់ឱ្យមន្រ្តីរបស់ខ្លួនចុះណែនាំរហូតដល់ចំនួន ០៦ដងមកហេីយ។ ប៉ុន្តែប្រសិនបើនៅលេងដូចប្រជាពលរដ្ឋរាយការណ៍នោះ លោកនិងស្នេីទៅលោកអភបាលខណ្ឌចុះបង្រ្កាប។
គួរជម្រាបផងដែរថា គណៈបញ្ចាការឯកភាពខណ្ឌចំការមន ដែលដឹកនាំដោយលោក កៀង ល័ក្ស អភិបាលខណ្ឌចំការមន បានធ្វើការចុះត្រួតពិនិត្យទីតាំងខាងលេីនេះដែរ ប៉ុន្តែអ្វីជាចម្ងល់របស់មហាជន រាល់ប្រតិបត្តិការរបស់លោកអភិបាល ម្ចាស់ទីតាំងភាគច្រើនតែងតែដឹងខ្លួនមុនជានិច្ច ដែលធ្វើឱ្យអាជ្ញាធរពិបាកមានចំណាត់ការលើមេក្លោងល្បែងស៊ីសងទាំងនេះ ហើយនៅពេលស្ថានភាពស្ងប់ស្ងាត់ទៅវិញ ម្ចាស់ទីតាំងក៏បើកដំណើរការជាធម្មតាទៅវិញ។
ជាមួយគ្នានេះ ប្រជាពលរដ្ឋបានសំណូមពរទៅអាជ្ញាធរពាក់ព័ន្ធ ពិសេសលោក កៀង ល័ក្ស អភិបាលខណ្ឌចំការមន សូមមានវិធានបង្រ្កាបឱ្យមានប្រសិទ្ធភាព រាល់ទីតាំងដែលប្រមូលផ្តុំអ្នកញៀនល្បែងស៊ីសងទាំងនោះ ព្រោះការលេងល្បែងស៊ីសងធ្វើឱ្យពលរដ្ឋបាត់បង់ទ្រព្យសម្បត្តិ អំពើលួច ឆក់ ប្លន់ និងបង្កជាអំពើហិង្សាក្នុងគ្រួសារ និងដេីម្បីពង្រឹងគោលនយោបាយរបស់ប្រមុខរាជរដ្ឋាភិបាលកម្ពុជា ស្តីពីភូមិ-ឃុំ មានសុវត្ថិភាព៕ដោយ៖ជីណា
