ឃើញរូបមួយសន្លឹកនេះ មិននិយាយមិនបាន ។ វាជារូបភាពដ៏ទាក់ទាញ ដែលកុមារកម្ពុជាតូចៗ បង្ហាញភាពហ៊ឺហារ ជាមួយនឹងស្រាបៀរ ហេនណឺកែន ទំនងជានៅក្នុងម៉ាតមួយកន្លែង ។ ទិដ្ឋភាពបែបនេះបង្ហាញឲ្យឃើញពីភាពសម្បូរបែបរបស់កុមារកម្ពុជា ដែលនៅតូចៗ ប៉ុន្តែបានភ្លក្សរសជាតិស្រាបៀរដ៏ល្បីល្បាញទៅហើយ ។ មិនតែប៉ុណ្ណោះ ស្រាបៀរ ហេនណឺកែន បានរួមចំណែកយ៉ាងសំខាន់ក្នុងការពង្វក់ស្មារតីក្មេងៗខ្មែរទាំងនេះ ។
គេមិនអាចហាមប្រាមក្មេងៗទាំងនេះបានទេ ដរាប់ណាមិនមានច្បាប់កំណត់ច្បាស់លាស់ ។ នៅកម្ពុជា អ្នកមានប្រាក់ អាចទិញស្រាបៀរមកផឹកបានគ្រប់ពេលវេលា គ្រប់ទីកន្លែង ។ ជាពិសេសស្រាបៀរ ហេនណឺកែន បានបង្ហាញនូវភាពទាក់ទាញមិនត្រឹមតែមនុស្សចាស់ប៉ុណ្ណោះទេ ប៉ុន្តែសូម្បីក្មេងៗ ដែលទំនងជាសិស្សសាលាថ្នាក់អនុវិទ្យាល័យ ក៏មានមោទនភាពក្នុងការទទួលទានស្រា ហេនណឺកែន នេះដែរ ។ វាជាមោទនភាពដែលមិនមែនសម្រាប់កុមារកម្ពុជាទាំងអស់នេះទេ ប៉ុន្តែគឺសម្រាប់កូនអ្នកមានប្រាក់ ទើបមានលទ្ធភាពផឹកស្រាបៀរ ហេនណឺកែនបាន ។
