ភ្នំពេញ៖ លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអនុញ្ញាតឱ្យលោកវរសេនីយ៍ឯក ស៊ូរ៉ាសាក់ (Surasak) អនុព័ន្ធនគរបាលភូមិន្ទថៃ អមស្ថានទូតថៃប្រចាំកម្ពុជា ចប់អាណត្តិ ចូលជួបសម្តែងការគួរសម និងជម្រាបថា និងឧទ្ទេសនាមលោកវរសេនីយ៍ឯក Piyawat (ភីយ៉ាវ៉ាត់ ) អនុព័ន្ធនគរបាលភូមិន្ទថៃ អមស្ថានទូតថៃប្រចាំកម្ពុជា ដែលទើបទទួលភារកិច្ចថ្មី កាលពីរសៀលថ្ងៃទី០៩​ ខែមីនាម្សិលមិញ​ នៅអគ្គស្នងការដ្ឋាននគរបាលជាតិ។

តាមប្រភពព័ត៍មានពី​អគ្គស្នងការដ្ឋាន​នគរបាលជាតិ​ នៅព្រឹកថ្ងៃ​ព្រហស្បតិ៍​ទី​០៩​ ខែមីនា​ ឆ្នាំ​២០២៣នេះថា៖​ លោកវរសេនីយ៍ឯក ស៊ូរ៉ាសាក់(Surasak) អនុព័ន្ធនគរបាលភូមិន្ទថៃ អមស្ថានទូតថៃប្រចាំកម្ពុជា ដែលចប់អាណត្តិ ជាកិច្ចចាប់ផ្តើម បានថ្លែងអំណរគុណចំពោះ លោកនាយឧត្តមសេនីយ៍នេត សាវឿន អគ្គស្នងការនគរបាលជាតិ ដែលបានផ្តល់កិច្ចសហការគាំទ្រ និងបង្កលក្ខណៈងាយស្រួលដល់កិច្ចសហប្រតិបត្តការរវាងអង្គភាពជំនាញឈានទៅសម្រេចបាននូវលទ្ធផលខ្ពស់ និងល្អប្រសើរ។

ក្នុងជំនួបនោះផងដែរ លោករវសេនីយ៍ឯក ភីយ៉ាវ៉ាត់ (Piyawat) អនុព័ន្ធនគរបាលភូមិន្ទថៃ អមស្ថានទូតថៃប្រចាំកម្ពុជា ដែលទើបទទួលភារកិច្ចថ្មី បានគោរពស្នេីសុំអនុសាសន៍ណែនាំពី លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ សម្រាប់ជាមូលដ្ឋានបន្តកិច្ចសហប្រតិបត្តការរវាងនគរបាលជាតិកម្ពុជា និងនគរបាលភូមិន្ទថៃ នៅក្នុងអាណត្តិនៃការកាន់តំណែងបន្តពី លោកវរសេនីយ៍ឯក ស៊ូរ៉ាសាក់(Surasak) ។

ជាការឆ្លើយតប លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានកោតសរសើរ និងវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តការរវាងនគរបាលជាតិកម្ពុជា និងនគរបាលភូមិន្ទថៃ ទាំងការប្រយុទ្ធប្រឆាំងបង្ក្រាបបទល្មើស ទាំងការតាមចាប់ជនល្មើសរត់គេចខ្លួន ព្រមទាំងការបណ្តុះបណ្តាលសមត្ថភាពជំនាញជូនដល់នគរបាលជាតិកម្ពុជា។

ដៅយឡែកសម្រាប់អនុព័ន្ធនគរបាលភូមិន្ទថៃ អមស្ថានទូតប្រចាំកម្ពុជា ដែលទើបទទួលភារកិច្ចថ្មី លោកនាយឧត្តមសេនីយ៍ សន្តិបណ្ឌិត នេត សាវឿន បានធ្វើការណែនាំអំពីយន្តការនៃកិច្ចសហប្រតិបត្តការរវាងអង្គភាពជំនាញនិងលើកទឹកចិត្តឱ្យបង្កើនកិច្ចសហការនេះកាន់តែជិតស្និតបន្ថែមទៀត ដើម្បីសម្រេចបានលទ្ធផលឱ្យកាន់តែល្អប្រសើរនាពេលខាងមុខ។

ជាចុងក្រោយ លោកនាយឧត្តមសេនីយ៍ សន្តិបណ្ឌិត នេត សាវឿន បានជូនពរលោកអនុព័ន្ធនគរបាលដែលនឹងចប់អាណត្តិ​ និងត្រៀមកាន់តួនាទីថ្មីទទួលបានជោគជ័យក្នុងការបំពេញភារកិច្ចក្នុងអាណត្តិការងាររៀងៗខ្លួន៕ ដោយ​៖ស​ តារា​