ខេត្តកំពង់ឆ្នាំង ៖ ក្នុងឱកាសអញ្ជើញត្រួតពិនិត្យវឌ្ឍនភាពនៃការសាងសង់កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង កាលពីថ្ងៃទី០៩ ខែមីនា ឆ្នាំ២០២៣ ម្សិលមិញ លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ថា ឆ្នាំ២០២៤ខាងមុខនេះ រាជរដ្ឋាភិបាលនឹងរកថវិកាសម្រាប់សាងសង់ស្ពានប្រវែងជាង ៣គីឡូម៉ែត្រ និងសាងសង់ផ្លូវ៥០សេ តភ្ជាប់ខេត្តកំពង់ឆ្នាំង និងខេត្តកំពង់ធំ។
ជាមួយនឹងដំណឹងដ៏រីករាយនេះប្រជាពលរដ្ឋដែលរស់នៅតាមបណ្ដោយផ្លូវ៥០សេ បានសម្ដែងនូវក្ដីរំភើប និងសម្លឹងឃើញពីផលប្រយោជន៍សំខាន់ៗ ដែលនឹងទទួលបានតាមរយៈការកសាងផ្លូវ៥០សេ ពិសេសគឺមានស្ពានឆ្លងទន្លេសាប ដែលវែងជាងគេនៅកម្ពុជា ដើម្បីតភ្ជាប់ខេត្តកំពង់ឆ្នាំង និងខេត្តកំពង់ធំ។
លោកទេសរដ្ឋមន្ដ្រី បន្តថា,នៅឆ្នាំ២០២៤ ខាងមុខនេះរាជរដ្ឋាភិបាលគិតគូរពីថវិកា ដើម្បីសាងសង់ស្ពានប្រវែងជាង ៣គីឡូម៉ែត្រ ឆ្លងទន្លេសាប និងសាងសង់ផ្លូវ៥០សេ តភ្ជាប់ខេត្តកំពង់ឆ្នាំង និងខេត្តកំពង់ធំ។
សូមជម្រាបថា ផ្លូវលេខ៥០សេ មានប្រវែង ៥៣គីឡូម៉ែត ឆ្លងកាត់វាលទំនាបតំបន់បឹងទន្លេសាប ដែលតភ្ជាប់ពីផ្លូវជាតិលេខ៦ នៃខេត្តកំពង់ធំ នៅចំណុចភូមិពោធិតាអ៊ុន សង្កាត់ស្រយ៉ូវ ក្រុងស្ទឹងសែន ទៅកាន់ឃុំកំពង់ហៅ ស្រុកកំពង់លែង ខេត្តកំពង់ឆ្នាំង ហើយត្រូវឆ្លងសាឡាង កាត់ទន្លេសាបទៀតទើបទៅដល់ក្រុងកំពង់ឆ្នាំង។ ប៉ុន្តែតាមរយៈគម្រោងសាងសង់ស្ពានដ៏វែងនេះ ផ្លូវមួយខ្សែនេះ នឹងប្រែក្លាយជាផ្លូវប្រវត្តិសាស្ត្រមិនធ្លាប់មានហើយឆ្លងកាត់កណ្តាលប្រទេសកម្ពុជាតែម្ដង។
សូមបញ្ជាក់ថា, មានផ្លូវ ស្ពាន គឺជាចរន្តសេដ្ឋកិច្ច យ៉ាងសំខាន់ ដល់បងប្អូនប្រជាពលរដ្ឋ ប្រទេសជាតិ ជាមធ្យោបាយ ផ្តល់ភាពងាយស្រួលដល់ប្រជាពលរដ្ឋ ក្នុងការចរាចរ ទំនិញ ការប្រើប្រាស់ពេលវេលា លឿនរហ័ស ទាន់ចិត្ត ហើយបច្ចុប្បន្ននេះ ការដឹកនាំ ដោយ សម្តេចតេជោ ហ៊ុនសែននាយក រដ្ឋមន្ត្រីនៃព្រះរាជាណាចក្រកម្ពុជា ធ្វើអោយប្រទេសជាតិ មានការអភិវឌ្ឍន៍ រីកចម្រើនខ្លាំងលើគ្រប់វិស័យ ហើយការ អភិវឌ្ឍន៍នេះ ក៏អាស្រ័យលើ កត្តា សន្តិភាព ជាចម្បង ៕
ដោយ : សហការី
