ភ្នំពេញ៖ ក្រុមហ៊ុនណាហ្គាវើលតែងតែយកចិត្តទុកដាក់ចំពោះកុមារកំព្រា និងកុមារក្រីក្រនៅក្នុងប្រទេសកម្ពុជា។ នៅថ្ងៃទី២២ ខែកក្កដា ឆ្នាំ២០១៥ ក្រុមស្ម័គ្រចិត្តណាហ្គាវើលបេះដូងសប្បុរសថ្មីៗនេះបានទៅសួរសុខទុកកុមារកំព្រានៅអង្គការមូលនិធិកុមារកម្ពុជា និងបាននាំយកកន្សែងពោះគោចំនួន ៦០០ ដើម្បីចែកជូនដល់កុមារកំព្រាផងដែរ ស្ថិតក្នុងខណ្ឌស្ទឹងមានជ័យ រាជធានីភ្នំពេញ ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា “បុគ្គលិកក្រុមហ៊ុនណាហ្គាវើលបានទៅសួរសុខទុក និងបានឧបត្ថម្ភកន្សែងពោះគោមួយចំនួនដល់កុមារអង្គការមូលនិធិកុមារកម្ពុជា ហើយសង្ឃឹមថាអំណោយបន្តិចបន្តួចទាំងនេះនឹងធ្វើឲ្យកុមារមានភាពកក់ក្តៅក្នុងបេះដូងរបស់ពួកគេ។ ក្រុមហ៊ុនណាហ្គាវើលតែងតែយកចិត្តទុកដាក់ចំពោះកុមារកំព្រា និងកុមារក្រីក្រនៅក្នុងប្រទេសកម្ពុជា ។ បន្ថែមពីលើនេះទៀតអស់រយៈពេល២០ឆ្នាំមកហើយ ក្រុមហ៊ុនណាហ្គាវើលបាននឹងកំពុងតែចូលរួមចំណែកក្នុងការអភិវឌ្ឍន៍សេដ្ឋកិច្ចសង្គមក្នុងប្រទេសកម្ពុជា ។ យើងនឹងបន្តការងារសង្គម និងកិច្ចខិតខំប្រឹងប្រែងរបស់យើងជាមួយនិងអង្គការមិនមែនរដ្ឋាភិបាល និងដៃគូពាក់ព័ន្ធផ្សេងៗទៀតនាពេលអនាគត” ។
លោកបានបន្ថែមទៀតថា “ណាហ្គាវើលបេះដូងសប្បុរសបានរៀបចំផែនការដើម្បីចែកសម្ភារសិក្សាដល់កុមារកំព្រា និងកុមារក្រីក្រនៅចុងឆ្នាំ២០១៥ និងដើមឆ្នាំ២០១៦ នៅតាមបណ្តាខេត្ត និងរាជធានីភ្នំពេញ ក្នុងគោលបំណងដើម្បីគាំទ្រ និងលើកទឹកចិត្តសិស្សានុសិស្សឲ្យខិតខំរៀនសូត្រសម្រាប់អនាគតភ្លឺស្វាងរបស់ពួកគេ និងដើម្បីអនាគតប្រទេសកម្ពុជាផងដែរ។ យើងមានមោទនភាពណាស់ដែលឃើញកុមារកម្ពុជាចេះឲ្យតម្លៃខ្លួនឯង និងភាពជោគជ័យរបស់ខ្លួន” ។
លោក ង៉ុយ ហេន ប្រធានសាខាទី៥នៃអង្គការមូលនិធិកុមារកម្ពុជាមានប្រសាសន៍ថា “យើងរីករាយណាស់ដែលឃើញបុគ្គលិកក្រុមហ៊ុនណាហ្គាវើលមកទីនេះម្តងទៀតដើម្បីជួយគាំទ្រកុមារកំព្រាក្នុងអង្គការរបស់យើង ។ ពួកគេធ្វើឲ្យកុមារមានអារម្មណ៍កក់ក្តៅ និងរំភើបជាខ្លាំង។ នេះជាលើកទី២ហើយដែលបុគ្គលិកក្រុមហ៊ុនណាហ្គាវើលបានមកសួរសុខទុកកុមាររបស់យើងនៅទីនេះ។ លើកទីមួយនៅខែមិនាឆ្នាំ២០១៤។ ពួកគេបានមកសួរសុខទុកនិងបាននាំយកសម្ភារសិក្សាមួយចំនួនធំដើម្បីឧបត្ថម្ភដល់កុមាររបស់យើង ហើយថ្ងៃនេះពួកគេបានមកសួរសុខទុក ហើយព្រមទាំងបាននាំយកកន្សែងពោះគោចំនួន៦០០ដើម្បីចែកជូនដល់កុមាររបស់យើងផងដែរ” ។
គាត់បានបន្តទៀតថា “អង្គការមូលនិធិកុមារកម្ពុជាបានបង្កើតឡើងក្នុងឆ្នាំ២០០៤ ហើយផ្តល់នូវកម្មវិធីអប់រំផ្លាស់ប្តូរជីវិត កម្មវិធីអាហារូបត្ថម្ភ និងការព្យាបាលដល់កុមារដែលងាយរងគ្រោះមកពីសហគមន៍ក្រីក្របំផុតមួយចំនួនក្នុងប្រទេសកម្ពុជា។ នាពេលបច្ចុប្បន្ននេះ យើងថែទាំកុមារជាង ២,០០០នាក់ ។ កុមារទាំងអស់នៅក្នុងអង្គការនេះ គឺជាកុមារកំព្រាមកពីសហគមន៍មូលដ្ឋាន និងរាជធានីភ្នំពេញ។ យើងសូមអរគុណដល់ក្រុមហ៊ុនណាហ្គាវើលសម្រាប់កិច្ចខិតខំប្រឹងប្រែង និងសណ្តានចិត្តទាំងនេះ” ។
កុមារីម្នាក់ដែលបានទទួលកន្សែងពោះគោបាននិយាយថា “ខ្ញុំសប្បាយរីករាយណាស់ ពីព្រោះខ្ញុំមានកន្សែងពោះគោថ្មីដើម្បីប្រើប្រាស់បន្ទាប់ពីងូតទឹករួច។ កន្សែងពោះគោថ្មីទាំងនេះបានឧបត្ថម្ភដោយក្រុមហ៊ុនណាហ្គាវើល ។ ខ្ញុំសូមអរគុណដល់បុគ្គលិកក្រុមហ៊ុនណាហ្គាវើលដែលបានមកសួរសុខទុក និងបានឧបត្ថម្ភកន្សែងពោះគោដល់ពួកយើង ។ ម្យ៉ាងវិញទៀត ពួកគេបានជម្រុញលើកទឹកចិត្តពួកយើងឲ្យខិតខំរៀនសូត្រដើម្បីអនាគតភ្លឺស្វាងរបស់ពួកយើង។ ខ្ញុំស្រឡាញ់ និងត្រូវការពួកគេ” ៕ ស ដារ៉ា
