ខេត្តកំពង់ស្ពឺ : ប្រជាពលរដ្ឋ២នាក់បងប្អូនដែលកំពុងរងការបាត់បង់ដីធ្លីដោយសារឈ្មួញប្រើល្បិចកក់លុយតែ៨០០០$ទិញដី២កន្លែងទំហំ២៤ ហិកតា នៅភូមិអូរតាពូង ឃុំភក្ដី ស្រុកបរសេដ្ឋ ខេត្តកំពង់ស្ពឺ ចំនួន១០ឆ្នាំហើយមិនព្រមឲ្យថ្លៃលក់គ្រប់ចំនួន ដោយសារនៅក្នុងលិខិតទិញលក់មិនបានចែងឲ្យច្បាស់លាស់នៃកាលបរិច្ឆេទដាច់ប្រាក់កក់តាមក្បួនច្បាប់នោះ កំពុងនាំគ្នាខកចិត្តនិងអស់ជំនឿលើលោក ឈឺន សុធន អភិបាលស្រុក បរសេដ្ឋនិយាយលែងចេញ ។

   ការខកចិត្តនិងអស់ជំនឿលើលោក ឈឺន សុធន អភិបាល ស្រុកបសេដ្ឋនេះត្រូវបានពួកគាត់ទម្លាយឲ្យដឹងថា កន្លងមកនៅពេលជួបបញ្ហាឈ្មួញឆបោកទិញដីឱ្យតែប្រាក់កក់មិនព្រមបង់ថ្លៃលក់ឲ្យគ្រប់ចំនួនរយៈពេល១០ឆ្នាំមកហើយនោះ ពួកគាត់បានដាក់ពាក្យបណ្តឹងនិងស្កាត់ទៅលោក អភិបាលស្រុកបរសេដ្ឋ រូបនេះឲ្យជួយរកយុត្តិធម៌និងឲ្យឈ្មួញដោះស្រាយដោសន្តិវិធី ។ ពេលនោះលោក អភិបាលស្រុកបានទទួលពាក្យបណ្តឹងរបស់គាត់ខ្លាំងណាស់ដោយសន្យាថានឹងជួយអន្តរាគមន៍ដោះស្រាយរកយុត្តិធម៌ឲ្យមានតម្លាភាពនិងយុត្តិធម៌ជូនពួកគាត់ទាំង២យ៉ាងអស់ពីចិត្តពីថ្លើម និយាយរួមត្រូវបម្រេី រាស្ត្រ ផ្តល់ភាពយុត្តិធម៌ដល់ប្រជាពលរដ្ឋ ។

    ពួកគាត់បាននិយាយឲ្យដឹងទៀតថា លុះក្រោយមកលោកអភិបាលស្រុកបានកោះហៅភាគីឈ្មួញឈ្មោះ លឹម កាំង ដើម្បីចូលខ្លួនទៅដោះស្រាយបញ្ហានេះធ្វើឱ្យពួកគាត់សង្ឃឹមថានឹងមានដំណោះស្រាយបានសមស្របជាមិនខាន ។ ប៉ុន្តែអ្វីដែលធ្វើឲ្យពួកគាត់ខកបំណងនិងអស់ជំនឿទុកចិត្តនោះគឺបន្ទាប់ពីបានដឹងថាលោកអភិបាលស្រុកបានជួបឈ្មួញរួច ស្រាប់តែប្រែប្រួលឥរិយាបទ 180 អង្សា ដោយពោលប្រាប់ឲ្យពួកគាត់ចែកដីឲ្យឈ្មួញពាក់កណ្តាលទៅទើបដោះស្រាយចេញ ។ 

    ចំណុចនេះត្រូវបានគេឆ្ងល់ថា, ដំណោះស្រាយ យករឿងដើម្បីទាញយកប្រយោជន៍មែន ? 

   បានស្តាប់ដំណោះស្រាយដោយវិធីក្រឡាស់សម្តី១៨០អង្សា គ្មានសុភវិនិច្ឆ័យនិងហាក់ដូចជាត្រូវដងត្រូវផ្លែនឹងឈ្មួញ ឬ បានប្រយោជន៍អ្វីពីឈ្មួញយ៉ាងនេះ តើឲ្យគាត់សង្ឃឹមអីទៀត ? ខំសង្ឃឹមលើអាជ្ញាធរជាម៉ែឪរាស្រ្តឲ្យជួយរកដំណោះស្រាយសមស្រប បែរជាអាជ្ញាធរជាម៉ែឪត្រូវថ្នាំសណ្តំឈ្មួញទៅវិញ តើសមឬទេ ? នេះមិនខុសពីគេនិយាយលេង សើចថា ” បាត់មាន់ខំទៅប្តឹងព្រះឥន្រ្ទ ដឹងអីទៅដល់ឃើញព្រះឥន្រ្ទកំពុងសោយមាន់នោះឡើយ ” ។

     សូមបញ្ជាក់ថាប្រជាពលរដ្ឋ ២នាក់បងប្អូនដែលមានចំណេះដឹងមិនសូវជ្រៅជ្រះបានលក់ដីពីរកន្លែងទៅឲ្យឈ្មួញម្នាក់ឈ្មោះ លឹម កាំង តាំងពីឆ្នាំ 2013ដោយរហូតមកដល់ឆ្នាំ 2023 នេះមានរយៈពេល 10 ឆ្នាំហើយនៅតែមិនទាន់ទទួលបានលុយលក់ដីឲ្យគ្រប់ចំនួនក្រៅពីប្រាក់កក់ចំនួន 8.000 ដុល្លារនោះឡើយ។ ករណីនេះធ្វើឲ្យពួកគាត់ជួបការលំបាកខ្លាំងដោយសារនៅក្នុងលិខិតទិញលក់មិនបានចែងឲ្យច្បាស់លាស់នៃកាលបរិច្ឆេទដាច់ប្រាក់កក់តាមក្បួនច្បាប់ដែលមនុស្សនិងអ្នកច្បាប់ទូទៅសរសេរលើក្រដាស់ស្នាមទិញលក់បានចែងយ៉ាងច្បាស់ពីកាលបរិច្ឆេទនៃការដាច់ប្រាក់កក់ ប្រសិនបើអ្នកទិញមិនបានផ្ដល់ប្រាក់គ្រប់ចំនួនតាមកិច្ចសន្យាទេ។ ជាមួយនឹងផលលំបាកដោយការរង់ចាំយូរឆ្នាំ ពួកគាត់ចង់បង្កបង្កើនផលលើដីនេះបន្តមិនបាន ដោយសារអ្នកទិញបានរៀបចំគម្រោងបោកប្រាស់តាមរយៈប្រើក្រដាសស្នាមទិញលក់ដីធ្លីជាមួយគាត់ទុកជាស្រេច ហើយក្រដាសបោះពុម្ពនោះមិនបានចែងឲ្យច្បាស់លាស់អំពីកាលបរិច្ឆេទដាច់ប្រាក់កក់ក្រៅពីសរសេរថា បានទទួលប្រាក់កក់ចំនួន8.000$ ហើយបង្ខំឲ្យគាត់ជាអ្នកមានការចេះដឹងតិច ផ្តិតមេដៃនោះឡើយ។

  លោក ហួត ធឿន ជាបង និងលោកហួត ពៅ ជាប្អូនរស់នៅភូមិ ដីក្រហម ឃុំ ព្រៃក្មេង ស្រុកភ្នំស្រួច ខេត្តកំពង់ស្ពឺ បានឲ្យដឹងថា នៅឆ្នាំ២០០៣ ខ្ញុំបានទិញដី១កន្លែងទំហំជិត២៤ហិកតានៅភូមិអូរតាពូង ឃុំភក្តី ស្រុក បសេដ្ឋខេត្តកំពង់ស្ពឺ ពីអ្នកភូមិ។ក្រោយមកនៅឆ្នាំ២០១៣ ដោយខ្វះខាតថវិកាចំណាយក្នុងគ្រួសារនិងខ្វះលុយឲ្យកូនរៀនក៏សម្រេចលក់ដីនេះឲ្យឈ្មួញឈ្មោះ លឹម កាំង នៅភ្នំពេញ ក្នុងតម្លៃ12.000$ក្នុង១ ហិកតា ហើយទទួលប្រាក់កក់បានតែ8000$ប៉ុណ្ណោះចាប់ពីពេលនោះមក។

  សូមបញ្ជាក់ថា, កន្លងមកលោកមេភូមិ អូតាពូង ធ្លាប់សារព័ត៌មានថា, ដីនេះពិតជាឈ្មោះរបស់ពីអ្នកបងប្អូនខាងលើមែន តែមានទំនាស់រឿងកក់ប្រាក់យូរឆ្នាំហើយ។ ដោយឡែកលោកមេឃុំភក្តី ប្រាប់អ្នកសារព័ត៌មានថា, គាត់ទើបមកថ្មី ដូច្នេះរឿងនេះបានបញ្ជូនទៅដោះស្រាយនៅស្រុកហើយ និយាយរួមផុតដែគាត់ ។ 

  

  ពាក់ព័ន្ធរឿងរ៉ាវខាងលើនេះលោក ឈឺន សុធន អភិបាលស្រុក បសេដ្ឋ មិនអាចធ្វើការទំនាក់ទំនងបានទេ នៅរសៀលថ្ងៃទី២០ ខែមីនា ឆ្នាំ២០២៣ ប៉ុន្តែកន្លងទៅ

  បានប្រាប់សារព័ត៌មានក្នុងស្រុក តាមទូរសព្ទថា, គាត់ព្យាយាមដោយស្រាយ អោយបានឆាប់ចប់ ។ 

 សូមបញ្ជាក់ថា,   ចំពោះការផ្លាស់ប្ដូរឥរិយាបថរបស់លោកអភិបាលស្រុកបសេដ្ឋ 180 អង្សា យ៉ាងឆាប់រហ័សនេះ អាជ្ញាធរមូលដ្ឋានដែលជាម៉ែឪរបស់ប្រជាពលរដ្ឋគួរតែមានឆន្ទៈដោះស្រាយជូនពួកគាត់ឲ្យមានតម្លាភាពសមស្របផង មិនគួរណាត្រូវដងត្រូវផ្លែនឹងឈ្មួញ បែរជាមកចង់ត្របាក់យកទ្រព្យប្រជាពលរដ្ឋឲ្យឈ្មួញទាំងទទេយ៉ាងដូច្នេះឡើយ។ បើលោកអភិបាលស្រុកលម្អៀងដូច្នេះ តើឲ្យរាស្រ្តសង្ឃឹមអីទានប្រុស ?

បើយោងតាមសំដីម្ចាស់ដី ពីរនាក់ បងប្អូនបាន និយាយថា ,ពេលដែលខាងស្រុកហៅទៅធ្វើការដោះស្រាយជាមួយនឹងឈ្មោះ លឹម កាំង ដែលបានកក់ប្រាក់ដី នៅចំពោះមុខគ្នានោះ បែរជាលោកអភិបាលស្រុកបានបញ្ជាក់ថា ដីនោះលុះត្រាណាតែចែកគ្នាពាក់កណ្ដាលទើបដោះស្រាយចប់ ។ ដូច្នេះពួកគាត់ពីរនាក់បងប្អូនមានចម្ងល់ថា ហេតុអ្វីបានជាដំណោះស្រាយត្រូវយកដីរបស់គាត់ កាត់ពាក់កណ្ដាលទៅឲ្យឈ្មោះ លឹម កាំង នោះទៅវិញ ? 

 លោក លឹម កាំង អង្គភាពមជ្ឈមណ្ឌលព័ត៌មាន” នគរវត្ត” មិនអាចធ្វើការទំនាក់ទំនងសុំការបំភ្លឺបានទេនៅរសៀលថ្ងៃទី 20 ខែមីនា ឆ្នាំ 2023 នេះ ដោយគ្មានលេខទូរសព្ទ។ ប៉ុន្តែកន្លងមក គាត់ធ្លាប់ប្រាប់អ្នកសារព័ត៌មានថា, អ្វីដែលគាត់មិនបានប្រគល់ប្រាក់ឲ្យ ដោយសារតែម្ចាស់ដីបានទទួលប្រាក់កក់ហើយ បើមិនរត់ការកាត់ឈ្មោះមកឲ្យគាត់ ទើបបង្កើតឲ្យមានការរាំងផ្ទះដល់បច្ចុប្បន្ន។

 ក្នុងករណីរឿងនេះដែរ មិនអាចធ្វើការទំនាក់ទំនងសុំការបំភ្លឺ បានទេពី លោក វី សំណាង អភិបាល នៃគណៈអភិបាលខេត្តកំពង់ស្ពឺ នៅរសៀលថ្ងៃទី២០ នេះ ដោយទូរស័ព្ទខលមិនចូល ៕ 

ដោយ : សហការី