ភ្នំពេញ៖ អស់រយៈពេលជិត២ឆ្នាំហើយដែលតារាចម្រៀងប្រចាំផលិតកម្ម Town កញ្ញាសាសាបានបាត់មុខពីសិល្បៈ។ នាងប្រកាសថាបានត្រៀមខ្លួនវិលមកកាន់វិថីសិល្បៈវិញដោយសន្យាថានឹងមានស្តាយប្លែកៗបំពេរទស្សនិកជនឡើងវិញ ក្រោយពីក្លាយខ្លួនជាថៅកែម្ចាស់ក្លឹបហាត់ប្រាណធំមួយនោះ។

សាសាបានស្ងប់ស្ងាត់ពីការងារសិល្បៈមួយដង្ហើមធំព្រោះតែការងារជំនួញនៅក្នុងដៃកំពុងបើកដំណើរការដែលប្រភពពីអ្នកសិល្បៈលើកឡើងថា តារាលេចធ្លោរបស់ផលិតកម្ម Town រូបនេះបានផ្អាកការងារវាយលុកក្នុងសិល្បៈមួយអន្លើព្រោះជាប់ដៃនឹងការបើកដំណើរការអាជីវកម្មក្លឹបហាត់ប្រាណមួយកន្លែងនៅតំបន់ចម្ការដូង ។ ជំនួញថ្មីនោះគឺការបើកក្លឹបហាត់ប្រាណដ៏ធំបែបស្តង់ដាមួយ ហើយគេសង្ស័យថាមានអ្នកជួយនៅពីក្រោយមុខជំនួញមួយនេះ។

ក្នុងជំនួបផ្ទាល់កាលពីពេលថ្មីៗនេះកញ្ញា សាសា ទទួលស្គាល់ថាការបាត់មុខពេលជាច្រើនខែមកនេះនាងបានចំណាយពេលច្រើនលើមុខរបររកស៊ីដោយបានបើកកន្លែងហាត់ប្រាណមួយនៅតំបន់ខាងលើមែន។ នាងថាក្លឹបហាតប្រាណនោះបានស្ថាបនាចេញជារូបរាងនិងដំណើរការទៅមុខជាបណ្តើរៗហើយដែរ។ ទោះជាយ៉ាងណានាងបានឆ្លើយបដិសេធបញ្ជាក់ពីតម្លៃបើកដំណើរការក្លឹបហាត់ប្រាណនេះហើយក៏បដិសេធអំពីការលើកឡើងថា’មានអ្នកជួយទំនុកបម្រុងឲ្យនាងក្លាយជាថៅកែស្រី។ នាងថាអាចមានលទ្ធភាពគ្រប់គ្រាន់ក្នុងការបើកដំណើរការខ្លួនឯងបានដោយមិនពឹងអ្នកដទៃ។ ទោះជាយ៉ាងណានាងបង្ហើបដែរថា មុខរបររកស៊ីរបស់នាងពេលនេះក៏ជាការត្រួសត្រាយផ្លូវឲ្យជាយោបល់ពីសំណាក់បុរសម្នាក់ដែរ ព្រោះគាត់ថាមានតែការរកស៊ីនេះហើយដែលជួយលើកស្ទួយជីវភាពឲ្យរីកចម្រើនបាន។បុរសម្នាក់នោះត្រូវបាននាងបង្ហើបថា កំពុងស្វែងយល់ចិត្តគ្នាដែរ ប៉ុន្តែនាងស្នើមិនបញ្ជាក់អំពីអត្តសញ្ញាណ។ នាងសរសើរបុរសនោះថាជានិច្ចកាលគាត់តែងតែឲ្យយោបល់ថាធ្វើបែបណាល្អចំពោះការរកស៊ីនេះជាការលើកទឹកចិត្តមួយចំពោះនាង។ ទំនាក់ទំនងរបស់នាងនិងសង្សារគឺអាចឈានឡើងល្អដោយមានចាស់ទុំសងខាងបានដឹងឮព្រមទាំងមានសភាពស៊ីសង្វាក់គ្នាល្អដែរ និងគិតថានិងកាន់តែល្អបន្តទៀតក្នុងពេលអ្វីៗកំពុងតែលូតទៅមុខ។

ទាក់ទិននឹងការការងារសិល្បៈវិញនាងថា នឹងវិលមកជាថ្មីក្នុងពេលដ៏ខ្លីខាងមុខនេះដែរ នាងកំពុងតែខំសម្រិតសម្រាំងបទចម្រៀងបែបស្នាដៃកូនខ្មែរបង្កើតថ្មីដើម្បីប្តូររបៀបឡើងវិញជៀសវាងការថតយកបទចម្រៀងរបស់គេដើម្បីវិវត្តន៍ស្នាដៃក្នុងផលិតកម្មយើងដែលមានការគាំទ្រពីមហាជនយ៉ាងលើសលុប។ ទោះបីជាយ៉ាងណានាងក៏មិនទាន់ដឹងថាសន្ទុះការគាំទ្រដូចមុនឬយ៉ាងណាប៉ុន្តែសិល្បៈគឺនាងមានការពេញចិត្តនិងចង់បន្តអាជីពមួយនេះជាបន្តទៀតដោយគ្មានបំណងលាឈប់នោះឡើយគ្រាន់តែរវល់មួយរយៈប៉ុណ្ណោះ៕

ដោយ៖ វឌ្ឍនា