ខេត្តពោធិ៍សាត់៖ កម្លាំងសមត្ថកិច្ចជំនាញ និងកម្លាំងនគរបាលប៉ុស្ដិ៍រដ្ឋបាលកំពុងពោធិ៍ សហការគ្នាព័ទចាប់មុខសញ្ញាចែកចាយជួញដូរដោយខុសច្បាប់នូវសារធាតុញៀនរួមទាំងវត្ថុតាង ។
ប្រតិបត្តិការនេះធ្វើឡើងកាលពីវេលាម៉ោង១៥និង៣០នាទីថ្ងៃទី១៥ ខែមិថុនា ឆ្នាំ២០១៦ នៅក្នុងអធិការដ្ឋាននគរបាលស្រុកក្រគរ ។
លោកវរសេនីយ៍ត្រី ឯម រុន អធិការនគរបាលស្រុកក្រគរ ឲ្យដឹងថា ជនសង្ស័យដែលត្រូវកម្លាំងសមត្ថកិច្ចដេញប្រផាត់ប្រភីងទើបចាប់បានខាងលើឈ្មោះ កយ វុធ ភេទប្រុស អាយុ ៣០ឆ្នាំ មានទីលំនៅភូមិមាត់ព្រៃ ឃុំកំពង់ពោធិ៍ ស្រុកក្រគរ ខេត្តពោធិសាត់ ។
លោកវរសេនីយ៍ត្រីបន្តថា ក្នុងកិច្ចប្រតិបត្តិការបង្រ្កាបជនសង្ស័យមុខសញ្ញាចែកចាយជួញដូរខុសច្បាប់នូវសារធាតុញៀនខាងលើកម្លាំងដកហូតវត្ថុតាងនិងសម្ភាររួមមាន ម្សៅក្រាមសថ្លា, លុយ, ម៉ូតូ ដូចក្នុងរូបភាពខាងក្រោម ។
លោកអធិការបន្តទៀតថា ក្នុងកិច្ចប្រតិបត្តិការបង្រ្កាបជនសង្ស័យខាងលើនេះ កម្លាំងជំនាញ និងកម្លាំងប៉ុស្ដិ៍ពង្រាយពួនស្ទាក់តាមដងផ្លូវជាតិលេខ៥ តាំងពីព្រំប្រទល់ក្រុងពោធិ៍សាត់ ទៅចាប់បាននៅស្រុកក្រគរ បន្ទាប់ពីទទួលបានព័ត៌មានពីកម្លាំងសម្ងាត់របស់សមត្ថកិច្ច ។
លោកបញ្ជាក់ទៀតថា នៅព្រឹកថ្ងៃទី១៦ ខែមិថុនា នេះសមត្ថកិច្ចនគរបាលស្រុកបានបំពេញសំណុំបែបបទបញ្ជូនខ្លួនជនសង្ស័យរួមទាំងវត្ថុតាង និងសម្ភារទៅការិយាល័យជំនាញនៃស្នងការដ្ឋានដើម្បីបន្តតាមនីតិវិធី ៕
ដោយ៖ ប៉ឹម ពិន
