ភ្នំពេញ : ស្នូរគ្រាប់កាំភ្លើងបានបន្លឺឡើង ដោយសារការផ្ទុះអាវុធមួយប្រាវរវាងកម្លាំងនគរបាលព្រហ្មទណ្ឌជាមួយក្រុមចោរនៅខណ្ឌពោធិ៍សែនជ័យ បណ្តាលឱ្យនគរបាលម្នាក់រងរបួស ខណៈចោរ២នាក់ត្រូវចាប់ខ្លួន ក្នុងនោះម្នាក់រងរបួស ប៉ុន្តែសមត្ថកិច្ចគ្រប់គ្រងស្ថានការណ៍បាន ជៀសវាងគ្រោះថ្នាក់ដល់ប្រជាពលរដ្ឋ។

    សូមបញ្ជាក់ថា មានហេតុការណ៍ ផ្ទុះអាវុធបាញ់តដៃគ្នាមួយប្រាវរវាងកម្លាំងនៃស្នងការដ្ឋាននគរបាលរាជធានីភ្នំពេញ ជាមួយក្រុមចោរកាច់កម៉ូតូ និងលួចរថយន្ដ នៅវេលាម៉ោងប្រមាណ១១ព្រឹក ថ្ងៃទី១៨ ខែមេសា ឆ្នាំ២០២៣នេះ ក្នុងភូមិសាស្ដ្រខណ្ឌពោធិ៍សែនជ័យ រាជធានីភ្នំពេញ ។

   ទាក់ទិននឹងហេតុការណ៍នេះ លោកឧត្តមសេនីយ៍ត្រី សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានប្រាប់អ្នកយកព័ត៌មាន ឱ្យដឹងនៅមុននេះបន្ដិចថា មុនឈានដល់ការប៉ះទង្កិចគ្នានេះ កម្លាំងសមត្ថកិច្ចបានក្ដាប់ជាប់នូវមុខសញ្ញាជនល្មើស លុះនៅពេលឡោមព័ទ្ធស្រាប់តែក្រុមជនល្មើសបានបាញ់ស្រោចមកលើសមត្ថកិច្ចតែម្ដង បណ្ដាលឲ្យនគរបាលព្រហ្មទណ្ឌកម្រិតស្រាលម្នាក់រងរបួសចំជើង។ នៅពេលនោះ កម្លាំងនគរបាលជំនាញបានប្រើប្រាស់សិទ្ធិការពារខ្លួននិងបានបាញ់តបតវិញទៅកាន់ក្រុមជនល្មើស បណ្ដាលឱ្យជនល្មើសម្នាក់រងរបួស និងម្នាក់ទៀតត្រូវបានចាប់ខ្លួន។ សរុបជនល្មើស២នាក់ត្រូវបានចាប់ខ្លួន។

សមត្ថកិច្ចនគរបាលខណ្ឌពោធិ៍សែនជ័យ និងសមត្ថកិច្ចនគរបាលនៃស្នងការដ្ឋាននគរបាលរាជធានីភ្នំពេញ កំពុងបន្តនីតិវិធី នាំខ្លួនក្រុមជនសង្ស័យ ធ្វើការសាកសួរ និងជំនួយផ្នែកព្យាបាលជាបណ្ដោះអាសន្ន ដើម្បីបន្តធ្វើការស៊ើបអង្កេតស្រាវជ្រាវ រកមុខសញ្ញាបន្តទៀត ។ ប្រជាពលរដ្ឋមានការភ្ញាក់ផ្អើលយ៉ាងខ្លាំង បន្ទាប់ពីឮស្នូរគ្រាប់កាំភ្លើង ប៉ុន្តែសមត្ថកិច្ចគ្រប់គ្រងស្ថានភាពបានទាន់ពេលវេលា ដោយមិនឱ្យប្រជាពលរដ្ឋរងគ្រោះនោះទេ។ 

    សម្រាប់ព័ត៌មានលម្អិត អង្គភាព មជ្ឈមណ្ឌលព័ត៌មាន”នគរវត្ត” នឹងផ្សាយជូនជាបន្ដបន្ទាប់ ក្រោយពីការបញ្ជាក់ឬទទួលបានរបាយការណ៍ពីសមត្ថកិច្ច ៕

ដោយ : សហការី