ខេត្តបាត់ដំបង៖ កម្លាំងនគរបាលស្រុកភ្នំព្រឹក បានចុះស្រាវជ្រាវរហូតឈានដល់ការបង្រ្កាប និងឃាត់ខ្លួនបុរសចំនួន០២នាក់ក្នុងករណីហិង្សាដោយចេតនាលេីអ្នកដទៃបណ្តាលឱ្យរងរបួសធ្ងន់។ នេះបេីយោងតាមប្រភពព័ត៍មានពីរបាយការណ៍របស់អគ្គស្នងការដ្ឋាននគរបាលជាតិ នៅព្រឹកថ្ងៃអង្គារទី១៦ ខែឧសភា ឆ្នាំ២០២៣។
របាយការណ៍ដដែលបន្តថា លោកវរសេនីយ៍ទោ ហេង បារាំង អធិការនគរបាលស្រុកភ្នំព្រឹកបានដឹកនាំកម្លាំងផ្នែកនគរបាលយុត្តិធម៌ រួមជាមួយកម្លាំងប៉ុស្តិ៍នគរបាលរដ្ឋបាលអូររំដួល នៃអធិការដ្ឋាននគរបាលស្រុក កាលពីថ្ងៃទី១៥ ឧសភាម្សិលមិញនេះ បាននាំខ្លួនជនសង្ស័យចំនួន ០២ នាក់មកកាន់អធិការដ្ឋាននគរបាលស្រុក ដេីម្បីធ្វេីការសាកសួរពាក់ព័ន្ធករណីហិង្សាដោយចេតនា មានស្ថានទម្ងន់ទោស ដោយជនដៃដល់ទី១-ឈ្មោះ ហេង មុត ភេទប្រុស អាយុ ៤២ ឆ្នាំ មានទីលំនៅភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង មុខរបរកម្មករ។ និង២-ឈ្មោះ វ៉ាន់ សាវួនភេទប្រុសអាយុ ៣៣ ឆ្នាំ មានទីលំនៅភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង មុខរបរកម្មករ ។
សូមជម្រាបជូនថា មូលហេតុឈានដល់ការឃាត់ខ្លួននេះគឺយោងតាមពាក្យបណ្តឹងរបស់ជនរងគ្រោះឈ្មោះស៊ន សិលា ភេទ ប្រុស អាយុ៣៥ ឆ្នាំ មានទីលំនៅភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង មុខរបរកម្មករបានប្តឹងជនសង្ស័យខាងលើពីបទហិង្សាដោយចេតនា មានស្ថានទម្ងន់ទោស លើបងថ្លៃ របស់គាត់ ឈ្មោះពិន រោល ហៅ ឆេន ភេទ ប្រុស អាយុ ៤២ឆ្នាំ រស់នៅភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង ដែលបណ្តាលឱ្យរងរបួសធ្ងន់ នៅចំណុច ភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបងកាលពីថ្ងៃទី១៤ ខែឧសភា ឆ្នាំ ២០២៣ វេលាម៉ោង ២៣និង៥០នាទី ដែលជនរងគ្រោះ កំពុងបន្តសំរាកព្យាបាលនៅមន្ទីរពេទ្យបង្អែក ខេត្តបាត់ដំបង ។។
ក្រោយពីបានសាកសួរជនសង្ស័យបានឆ្លើយសារភាពថាខ្លួនគេទាំងពីរ នាក់ពិតជាបានធ្វើសកម្មភាព វាយទៅលើ ជនរងគ្រោះឈ្មោះ ពិន រោល ហៅ ឆេន ភេទ ប្រុស អាយុ ៤២ឆ្នាំ រស់នៅភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង កាលពីថ្ងៃទី១៤ ខែ ឧសភា ឆ្នាំ២០២៣វេលាម៉ោង២៣និង៥០នាទី បណ្តាលឱ្យរងរបួសធ្ងន់ ពិតប្រាកដមែន ហេីយមូលហេតុដែលឈានដល់ករណីហិង្សាបែបនេះគឺដោយសារមានទំនាស់ជាមួយគ្នា ។ ចំណែកវត្ថុតាងដកហូត៖ វែកដែក ដងឈើ ប្រវែងសរុប ៥០ សង់ទីម៉ែត្រ ចំនួន ០១ ។
បច្ចុប្បន្នជនសង្ស័យ ទាំ០២នាក់ រួមទាំងវត្ថុតាងផងសមត្ថកិច្ចបានរៀបចំកសាងសំណុំរឿងបញ្ជូនមកកាន់ការិយាល័យជំនាញអនុវត្តតាមច្បាប់ហើយ៕
ដោយ៖សហការី
