ខេត្តក្រចេះ៖រដ្ឋមន្រ្តីក្រសួងកសិកម្ម រុក្ខា ប្រមាញ់ និងនេសាទ លោក ឌិត ទីណា  បានស្នើរឲ្យមន្រ្តីជំនាញ និងឆ្មាំទន្លេការពារតំបន់អភិរក្យសត្វផ្សោត រិះរកមធ្យោបាយយ៉ាងណាត្រូវការពារសត្វផ្សោតកុំឲ្យបន្តងាប់តទៀត ព្រោះ សត្វផ្សោតទឹកសាបនៅទន្លេមេគង្គប្រទេសកម្ពុជាយើងជារតនសម្បត្តិដ៍ប្រសិដ្ឋមួយកម្របំផុត។

ថ្លែងបែបនេះនៅក្នុងឪកាសដែលលោក និងលោក វ៉ា ថនអភិបាលខេត្ត​​ក្រចេះ ប្រជុំត្រួតពិនិត្យ និងពង្រឹងការងារអភិរក្សសត្វផ្សោតទន្លេមេគង្គ នៅថ្ងៃទី២៣ ឧសភា ២០២៣ នៅស្នាក់ការអភិរក្សសត្វផ្សោត ឃុំសំបុក ស្រុកចិត្របុរី ខេត្តក្រចេះ។​

លោករដ្ឋមន្រ្តីបានលើកឡើងថា៖ យើងត្រូវធ្វើយ៉ាងណាកុំបាត់បង់ផ្សោតតទៅទៀត យើងត្រូវរកវិធីការពារឲ្យបាន ហើយលោកក៍បានកោតសរសើរចំពោះការប្រឹងប្រែងការពាររបស់បងប្អូននាពេលកន្លងមក។ហើយសម្តេចតេជោ ក៏លោកបានដឹងអំពីការខិតខំប្រឹងប្រែងរបស់បងប្អូនផងដែរ ។

លោកបន្ថែមថា៖ ម៉ង ដែលជាឧបករណ៍គ្រោះថ្នាក់ដល់សត្វផ្សោត មិនមែនមងត្រីរៀល ត្រីលិញនោះទេ គឺមងក្រឡាធំ មងក្រឡាធំនេញធ្វើឲ្យប៉ះពាល់ដល់អាយុជីវិតសត្វផ្សោត និងត្រីមេពូជជាខ្លាំង  ជាពិសេសឧបករណ៍ឆក់ ។

ហើយគោលដៅដែលចង់បានគឺការពារផ្សោត ផ្សោតជារតនសម្បត្តិមួយ ហើយយើងត្រូវតែពង្រឹងការពារបន្ថែម ដោយត្រូវកំណត់អត្តសញ្ញាណ ឲ្យច្បាស់លាស់ និងស៉ើបអង្កេតរកឲ្យឃើញជនល្មើសកសាងសំណុំរឿងទៅតុលាការ ហើយមិនចាំបាច់ដេញចាប់ប្រផាតប្រផីងនាំតែគ្រោះថ្នាក់ខ្លួនទេ កំណត់មុខសញ្ញាឲ្យច្បាប់ទៅចាប់ដល់ផ្ទះ ក្រុមអ្នកឆក់ទាំងនោះដេកផ្ទះមិនសុខទេ ។ 

ទាក់ទិនការស្នើរដល់ជំនាញនិងឆ្នាំដើម្បីពង្រឹងការការពារសត្វផ្សោតខាងលើលោក រដ្ឋមន្រ្តីក៍បានផ្ដល់នូវឧបករណ៍សម្ភារះសម្រាប់ល្បាតមួយចំនួន ដូចជាទូកស្មាច់ចំនួន៦គ្រឿង ម៉ាស៊ីនម៉ាក ហីណូតា កម្លាំង២៥សេសចំនួន

៦គ្រឿង កែវឆ្លុះ ២៤គ្រឿង អាវពោងចំនួន៤៤អាវ អាគុយម៉ាកJKកម្លាំង៤០អាំពែ ចំនួន៦គ្រឿង សារ៉ុងចំនួន

៦០សារ៉ុង និងថវិកាចំនួន១០លានរៀល។បន្ថែមពីនេះលោក វ៉ា ថន អភិបាលខេត្តក្រចេះ ក៍បានឧបត្ថម្ភថវិកាចំនួន៥លាន ៥សែនរៀលបន្ថែមផងដែរ។

ក្រោយចប់ការសំណេះសំណាលរវាងមន្ត្រីជំនាញនិងអង្គភាពពាក់ព័ន្ធលោករដ្ឋមន្ត្រីនិងលោកអភិបាលខេត្តក៏បានដុតបំផ្លាញ់ឧបករណ៍នេសាទខុសច្បាប់ កម្ទេចចោលរួមមាន៖ អាំងវែកទ័រឆក់ត្រជាក់ចំនួន១៨គ្រឿង អាំងវែកទ័រឆក់ក្ដៅចំនួន១៩គ្រឿង ម៉ងក្រឡាធំ២៥ត្បូង ប្រវែង ១២៥០ម៉ែត្រ លបប្រើស១០០ចំនួន១៥ខ្សែ ប្រវែង ២៥០ម៉ែត្រ ព្រមទាំងដងឆក់ភ្ជាប់ខ្សែភ្លើងចំនួន១៥គូរផងដែរ៕

ដោយ  ជីវ័ន្ត