ភ្នំពេញ៖ តារាហុងកុង ទាំងពីររូបគឺនាង Nancy Wu និងលោក Vincent Wong បានធ្វើដំណើរទស្សនកិច្ចពិសេសមួយមកកាន់ទីក្រុងភ្នំពេញ ដើម្បីជួបផ្ទាល់

ទីមួយប្រិយមិត្តរបស់ខ្លួននៅកម្ពុជា។ កំពូលតារាភាពយន្តហុងកុងទាំង២ ក៏បានធ្វើឲ្យអ្នកគាំទ្ររបស់ខ្លួននៅកម្ពុជារីករាយជាខ្លាំងជាមួយនឹងការរាំចង្វាក់រាំវង់ ក្នុងកម្មវិធីផ្សាយផ្ទាល់លើកញ្ចក់ទូរទស្សន៍ ភីអិនអិន កាលពីថ្ងៃអាទិត្យទី១៩ មិថុនា។

នាង Nancy Wu និងលោក Vincent Wong បានបង្ហាញខ្លួនក្នុងកម្មវិធីផ្សាយផ្ទាល់របស់ ភីអិនអិន PNN TVB SHOWCASE 2016 កាលពីម៉ោង ៥ ល្ងាច ថ្ងៃអាទិត្យ ទី១៩ ក្នុងស្ទូឌីយ៉ូរបស់ ភីអិនអិន សង្កាត់ព្រែកភ្នៅ។ មានប្រិយមិត្តកម្ពុជាជាច្រើនរយនាក់ បានទះដៃ ស្រែកហ៊ោទទួលស្វាគមន៍ កំពូលតារាហុងកុងទាំង២រូប ហើយអ្វីដែលកាន់តែភ្ញាក់ផ្អើលនោះ ពួកគេពិតជាស្មានមិនដល់ថា នាង Nancy Wu និងលោក Vincent Wong មិនត្រឹមតែស្រស់ស្អាត និងមានទេពកោសល្យក្នុងការសម្តែងខ្សែភាពយន្តនោះទេ ពួកគេថែមទាំងអាចរាំលក្ខណៈប្រពៃណីខ្មែរបានយ៉ាងល្អទៀតផងគឺចង្វាក់រាំវង់។

ជាមួយគ្នានេះ តារាភាពយន្តដ៏ល្បីរបស់  TVB ទាំង២រូប បានកោតសរសើរនូវរសឱជារស នៃមុខម្ហូបខ្មែរ ក៏ដូចជាស្នាមញញឹមរួសរាយរាក់ទាក់របស់ពលរដ្ឋខ្មែរទាំងមូល ជាពិសេសពួកគេបានទាំងនិយាយភាសាខ្មែរទៅកាន់ប្រិយមិត្តខ្លួនទៀតផង។ (បើសិនជាប្រិយមិត្ត មិនទាន់បានទស្សនាការរាំ និងនិយាយភាសាខ្មែរ របស់ នាង Nancy Wu និងលោក Vincent Wong លោកអ្នកអាចទស្សនាឡើងវិញ ដោយគ្រាន់តែចូលក្នុងទំព័រហ្វេសបុក របស់ ភីអិនអិន មានអាស័យដ្ឋាន https://www.facebook.com/PNNDramaFanClub/ ។

អគ្គនាយកស្ថានីយទូរទស្សន៍ ភីអិនអិន លោក Glen Felgate អះអាងថា ទាំង Nancy Wu និង Vincent Wong ពិតជាបានទាក់ចិត្តទស្សនិកជនកម្ពុជាមែនទែន។ ពួកគេទាំង២ ថែមទាំងបានធ្វើឲ្យ ពិធីករ ពិធីការិនីរបស់ ភីអិនអិន តារាចំរៀងក្នុងស្រុក និងភ្ញៀវកិត្តិយសជាច្រើនដែលចូលរួមក្នុងកម្មវិធី ស្លុងចិត្តដិតអារម្មណ៍មិនអាចបំភ្លេចបាន។ ទោះជាចាក់ចេញពីកម្ពុជា ប៉ុន្តែពួកគេពិតជាទទួលបានប្រិយមិត្តគាំទ្រកាន់តែច្រើនថែមទៀត។ បើសិនជាប្រិយមិត្ត មិនទាន់បានទស្សនា ឬចង់ទស្សនាឡើងវិញ នូវការរាំ និងនិយាយភាសាខ្មែរ របស់ នាង Nancy Wu និងលោក Vincent Wong លោកអ្នកអាចទស្សនាឡើងវិញ ដោយគ្រាន់តែចូលក្នុងទំព័រហ្វេសបុកមានអាស័យដ្ឋាន https://www.facebook.com/PNNDramaFanClub/) ។

នាង Nancy Wu តារាភាពយន្តល្បីល្បាញ និងគួរឲ្យស្រលាញ់ របស់ទីក្រុង ហុងកុង និងមានប្រជាប្រិយភាពខ្លាំងនៅកម្ពុជា។ Nancy ល្បីល្បាញដោយសារវត្តមានជាច្រើនរបស់នាង ក្នុងខ្សែភាពយន្តភាគបុរាណចិនរបស់ TVB ហើយក៏ជាម្ចាស់ពានរង្វាន់តារាស្រីឆ្នើមប្រចាំឆ្នាំ២០១៥ រៀបចំដោយ TVB ផងដែរ ជាមួយនឹងការសម្តែងក្នុងខ្សែភាពយន្តរឿង Ghost of Relativity ។ ខ្សែភាពយន្តថ្មី នឹងបញ្ចាំងលើកញ្ចក់ទូរទស្សន៍ ភីអិនអិន នាពេលឆាប់ៗនេះគឺរឿង A Fist Within Four Walls ដោយមានវត្តមាននាង Nancy Wu សម្តែងជាតួអង្គឈ្មោះ Tiu Lan ។

ដោយឡែក សម្រាប់ តារាវ័យ ៣២ឆ្នាំរបស់ទីក្រុងហុងកុង លោក Vincent Wong ក៏ជាតារាភាពយន្តដ៏ល្បីល្បាញមិនចាញ់ នាង Nancy Wu នោះដែរ ថែមទាំងទទួលបានការគាំទ្រខ្លាំងពីប្រិយមិត្តនៅកម្ពុជាដូចគ្នា។ Wong ល្បីល្បាញដោយមានសមត្ថភាពសម្តែងជាច្រើនក្នុងខ្សែភាពយន្តភាគ បែបវាយប្រហាររបស់ TVB។ កាលពីឆ្នាំ ២០១៣ Vincent Wong ធ្លាប់បានឈ្នះពានតារាប្រុសឆ្នើមពីព្រឹត្តិការណ៍ប្រចាំឆ្នាំ របស់ TVB ក្រោយសម្តែងក្នុងខ្សែភាពយន្តភាគជាច្រើនក្នុងឆ្នាំនោះ ដូចជា រឿង Season of Love រឿង Sergeant Tabloid រឿង A Change of Heart ក៏ដូចជារឿង Will Power and Coffee Cat Mama ជាដើម។

លើសពីនេះ Wong ក៏នឹងបង្ហាញខ្លួនក្នុងខ្សែភាពយន្តភាគថ្មី របស់ TVB រឿង Over Run Over សម្តែងជាតួអង្គ Kwan Ting Ming ដែលគ្រោងចាក់ផ្សាយលើកញ្ចក់ទូរទស្សន៍រៀងរាល់ថ្ងៃ វេលាម៉ោង ៦ដល់ម៉ោង ៧យប់ ចាប់ពីថ្ងៃទី ២១ មិថុនាតទៅ។

គួរបញ្ជាក់ដែរថា កាលពីដើមឆ្នាំ២០១៦ ស្ថានីយទូរទស្សន៍ ភីអិនអិន បានចុះកិច្ចព្រមព្រៀង ចាក់ផ្សាយគ្រប់ខ្សែភាពយន្តភាគថ្មីរបស់ TVB កំពុងដាក់បញ្ចាំងក្នុងទីក្រុងហុងកុង។

កិច្ចព្រមព្រៀងនេះ មានតម្លៃរហូតដល់ទៅជាង ១លានដុល្លារ ផ្តល់សិទ្ធិផ្តាច់មុខឲ្យ ភីអិនអិន ចាក់ផ្សាយភាពយន្តភាគចុងក្រោយ និងមុនគេបង្អស់លើកញ្ចក់ទូរទស្សន៍ក្នុងប្រទេសកម្ពុជា ៕

ដោយ៖ វឌ្ឍនា