ប្រេស៊ីលនៅតែមានចេតនាក្នុងការធ្វើឱ្យលោក Carlo Ancelotti ក្លាយជាគ្រូបង្វឹកថ្មីរបស់ខ្លួន និងប្រធានសហព័ន្ធបាល់ទាត់ប្រទេសនេះ (CBF) លោក Ednaldo Rodrigues បាននិយាយថា គាត់នឹងប្រើការប្រកួតមិត្តភាពរបស់ក្រុមជម្រើសជាតិនៅអឺរ៉ុបដើម្បីនិយាយជាមួយគ្រូបង្វឹកក្រុម Real Madrid ។
លោក Rodrigues បានបន្តថា គាត់ក៏នឹងទៅជួបប្រធានក្លិបអេស្ប៉ាញលោក Florentino Perez ហើយបានពណ៌នាថា លោកAncelotti ជាជម្រើសដំបូងរបស់ពួកគេដើម្បីជំនួសលោក Tite ដែលបានចាកចេញពីក្រុមប្រេស៊ីលបន្ទាប់ពីប្រេស៊ីលបរាជ័យក្នុងវគ្គ១/៤ចុងក្រោយនៅ World Cup ក្នុងប្រទេសកាតាកាលពីខែវិច្ឆិកា។
លោក Rodrigues បាននិយាយកាលពីថ្ងៃអង្គារក្នុងព្រឹត្តិការណ៍សារព័ត៌មាននៅទីស្នាក់ការកណ្តាល CBF ក្នុងទីក្រុង Rio de Janeiro ថា “គាត់នៅតែជាផែនការ A ហើយនៅក្នុងការធ្វើដំណើរនេះជាមួយនឹងការជ្រើសរើសនៅអឺរ៉ុប យើងអាចមានភាពច្បាស់លាស់ជាងមុន”។ ប្រេស៊ីល នឹង ប្រកួត ជាមួយ ហ្គីណេ នៅ អេស្ប៉ាញ នៅ ថ្ងៃ ទី១៧ ខែ មិថុនា និងប៉ះ សេណេហ្គាល់ នៅទីក្រុង Lisbon ប្រទេស ព័រទុយហ្គាល់ នៅ ថ្ងៃ ទី២០ មិថុនាខាងមុខ។
លោក Rodrigues បានបន្ថែមថា “ដំណើរប្រកួតនឹងមានសារៈសំខាន់សម្រាប់ពួកយើង (ដើម្បីសម្រេចចិត្តគ្រូបង្វឹកនាពេលអនាគត)។ ខ្ញុំមានបំណងនិយាយទៅកាន់លោក Ancelotti និងប្រធានក្លិប Real Madrid។ មានតែបន្ទាប់ពីនោះវានឹងអាចនិយាយបានថា តើវានឹងកើតឡើងឬអត់” ។
គ្រូ បង្វឹក សញ្ជាតិ អ៊ីតាលី មាន កុងត្រា ជាមួយក្លិប Real Madrid ដល់ ឆ្នាំ២០២៤ ជាមួយ នឹង ការ ពិន័យ ព្យួរ នៅ ក្នុង កិច្ចព្រមព្រៀង។ យោងតាមលោក Rodrigues នេះមិនគួររារាំងកិច្ចព្រមព្រៀងដែលអាចកើតមានជាមួយប្រេស៊ីលនោះទេ។
លោក Rodrigues បញ្ជាក់ ថា “ បញ្ហា ប្រាកដ ណាស់ មិន មែន ជា ការ ផាក ពិន័យ ទេ បញ្ហា គឺ កិច្ចសន្យា ហើយ គ្មាន អ្នក ណាចង់ បំបែក វា ទេ ។ យើង ត្រូវ បាន វិនិយោគ លើ គំនិត នេះ ហើយ យើង កំពុង ធ្វើ អ្វី គ្រប់ យ៉ាង ក្នុង អំណាច របស់ យើង ដើម្បីធ្វើ ឱ្យ វា ដំណើរការ និង ក្លាយ ជា ការ ពិត”។
កាលពីខែមុនលោក Ancelotti បានច្រានចោលចំណាប់អារម្មណ៍របស់ប្រេស៊ីល ដោយនិយាយថា គាត់នឹងគោរពដល់ឆ្នាំចុងក្រោយនៃកិច្ចសន្យារបស់គាត់ជាមួយក្លិប Real Madrid ។
គួរបញ្ជាក់ថា ក្រុមជម្រើសជាតិប្រេស៊ីលគ្មានគ្រូបង្វឹកចាប់តាំងពីការធ្លាក់ចេញពីព្រឹត្តិការណ៍ World Cup ហើយបានចាញ់ការប្រកួតមិត្តភាពលើកដំបូងរបស់ខ្លួនក្នុងលទ្ធផល ២–១ ក្រោមថ្វីជើងក្រុមម៉ារ៉ុក កាលពីខែមីនា ដែលដឹកនាំដោយគ្រូបង្វឹក U-20 លោក Ramon Menezes ដែលនឹងត្រលប់មកវិញសម្រាប់ការប្រកួតមិត្តភាពក្នុងការប្រកួតនៅលើទឹកដីអឺរ៉ុបក្នុងខែនេះ ៕ (រូបភាព៖ Reuters/CNA)
