ភ្នំពេញ : ក្នុងឱកាសដ៏មហានក្ខត្តឫក្សឧត្តុង្គឧត្តមនៃព្រះរាជពិធីបុណ្យចម្រើនព្រះជន្មគម្រប់ ៨៧ យាងចូល ៨៨ព្រះវស្សា របស់ សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលនឹងប្រព្រឹត្តទៅនៅថ្ងៃទី ១៨ ខែមិថុនា ឆ្នាំ២០២៣នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃសុក្រ ថ្ងៃទី ១៦ ខែមិថុនា ឆ្នាំ២០២៣នេះ បានចាត់ឱ្យថ្នាក់ដឹកនាំ និងមន្ត្រីកាកបាទក្រហមកម្ពុជាចំនួន ៦ក្រុម ធ្វើជាតំណាង អញ្ជើញបូជាទៀន ធូប ផ្កាភ្ញី ថ្វាយព្រះពុទ្ធប្បដិមា និងនាំយកទេយ្យវត្ថុ គ្រឿងអដ្ឋបរិក្ខារ និងបច្ច័យ បវារណាថ្វាយ និងប្រគេនចំពោះ សម្តេចព្រះមហាសង្ឃរាជ និងសម្តេចព្រះសង្ឃ ដែលជាព្រះចៅអធិការនៅវត្តចំនួន១១ ក្នុងរាជធានីភ្នំពេញ និងខេត្តកណ្តាល។

ទីអារាមព្រះពុទ្ធសាសនាទាំង១១ ដែលទទួលបានទេយ្យទាន គ្រឿងអដ្ឋបរិក្ខារ និងបច្ច័យជាសទ្ធាជ្រះថ្លា របស់កាកបាទក្រហមកម្ពុជា នាថ្ងៃអភិមង្គលដ៏វិសេសវិសាលនេះ រួមមាន ៖

១. វត្តបុទុមវតីរាជវរារាម (គណៈធម្មយុត្តិកនិកាយ និងគណៈមហានិកាយ) ស្ថិតនៅរាជធានីភ្នំពេញ ដែលសម្តេចព្រះអភិសិរីសុគន្ធា មហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា និងសម្តេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយក នៃគណៈមហានិកាយ និងសម្តេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណៈសង្ឃនាយក និងជាអគ្គលេខាធិការរង ថេរសភានៃពុទ្ធសាសនា បានប្រោសព្រះរាជានុញ្ញាតដល់គណៈប្រតិភូដឹកនាំដោយ លោកស្រី អាន្នី សុខអាន អនុប្រធានកាកបាទក្រហមកម្ពុជា និងលោកស្រី ពេជ សោភ័ន សមាជិកាបម្រុងកាកបាទក្រហមកម្ពុជា ចូលក្រាបថ្វាយបង្គំគាល់ និងថ្វាយទេយ្យវត្ថុ។

២. វត្តមុន្នីសុវណ្ណ (ហៅវត្តចំពុះក្អែក) ស្ថិតនៅរាជធានីភ្នំពេញ ដែលសម្តេចព្រះពោធិវ័ង្ស កិត្តិបណ្ឌិត អំ លឹមហេង សម្តេចព្រះសង្ឃនាយករងទី១ នៃគណៈមហានិកាយ និងជាព្រះប្រធានថេរសភានៃពុទ្ធសាសនា បានព្រះអនុញ្ញាតដល់គណៈប្រតិភូកាកបាទក្រហមកម្ពុជា ដឹកនាំដោយ លោកស្រីកិត្តិបណ្ឌិត អ៊ុក ម៉ាលី អគ្គហេរញ្ញិកកាកបាទក្រហមកម្ពុជា ចូលថ្វាយបង្គំ និងប្រគេនទេយ្យវត្ថុ។

៣. វត្តព្រះឥន្ទ្រសាមគ្គីធម៌ ស្ថិតនៅស្រុកអង្គស្នួល ខេត្តកណ្តាល ដែលសម្តេចព្រះមង្គលទេព្វាចារ្យ វង្ស អានេតា សម្តេចព្រះសង្ឃនាយករង នៃគណៈធម្មយុត្តិកនិកាយ ព្រះមេគណគណធម្មយុត្តិកនិកាយខេត្តកណ្តាល បានព្រះអនុញ្ញាតដល់គណៈប្រតិភូកាកបាទក្រហមកម្ពុជា ដឹកនាំដោយ លោកវេជ្ជ. អ៊ុយ សំអាត នាយកនាយកដ្ឋានគ្រប់គ្រងគ្រោះមហន្តរាយ ចូលថ្វាយបង្គំ និងប្រគេនទេយ្យវត្ថុ។

៤. វត្តចន្ទបុរីវង្ស ស្ថិតនៅរាជធានីភ្នំពេញ ដែលសម្តេចព្រះវនរ័ត កិត្តិបណ្ឌិត ណយ ច្រឹក សម្តេចព្រះសង្ឃនាយករងទី២ នៃគណៈមហានិកាយ និងជាព្រះអនុប្រធានអចិន្ត្រៃយ៍ថេរសភានៃពុទ្ធសាសនា បានព្រះអនុញ្ញាតដល់គណៈប្រតិភូកាកបាទក្រហមកម្ពុជា ដឹកនាំដោយ លោកស្រី ម៉ែន នារីសោភ័គ អគ្គលេខាធិការរងទី១ ចូលថ្វាយបង្គំ និងប្រគេនទេយ្យវត្ថុ។

៥. វត្តមុនីប្រសិទ្ធីវង្ស ស្ថិតនៅរាជធានីភ្នំពេញ ដែលសម្តេចព្រះឧត្តមវង្សា កិត្តិបណ្ឌិត មួង រ៉ា សម្តេចព្រះសង្ឃនាយករងទី៣ នៃគណៈមហានិកាយ ព្រះអនុប្រធាន និងជាអគ្គលេខាធិការថេរសភានៃពុទ្ធសាសនា បានព្រះអនុញ្ញាតដល់គណៈប្រតិភូកាកបាទក្រហមកម្ពុជា ដឹកនាំដោយ លោកស្រី ម៉ែន នារីសោភ័គ អគ្គលេខាធិការរងទី១ ចូលថ្វាយបង្គំ និងប្រគេនទេយ្យវត្ថុ។

៦. វត្តមហានន្ទិយនេរញ្ចរារាមនិវេទ (ហៅវត្តព្រែកប្រាំង) ខេត្តកណ្តាល ដែលសម្តេចព្រះឧត្តមបញ្ញា កិត្តិបណ្ឌិត ដូង ផង់ នន្ទិយោ ព្រះអនុប្រធានថេរសភានៃពុទ្ធសាសនា បានព្រះអនុញ្ញាតដល់គណៈប្រតិភូកាកបាទក្រហមកម្ពុជា ដឹកនាំដោយ លោក យូ ឡាណា អគ្គលេខាធិការរងទី២ ចូលថ្វាយបង្គំ និងប្រគេនទេយ្យវត្ថុ។

៧. វត្តសុវណ្ណវារី (ហៅវត្តព្រែកតាទែន) ស្ថិតនៅខេត្តកណ្តាល ដែលសម្តេចព្រះឧត្តមមុនី ជា សំអាង សមាជិកថេរសភានៃពុទ្ធសាសនា ព្រះមេគណខេត្តកណ្តាល បានព្រះអនុញ្ញាតដល់គណៈប្រតិភូកាកបាទក្រហមកម្ពុជា ដឹកនាំដោយ លោក យូ ឡាណា អគ្គលេខាធិការរងទី២ ចូលថ្វាយបង្គំ និងប្រគេនទេយ្យវត្ថុ។

៨. វត្តឧណ្ណាលោម ស្ថិតនៅរាជធានីភ្នំពេញ ដែលព្រះធម្មឃោសាចារ្យ ជួន សាវឿន ព្រះគ្រូសូធ្យស្តាំ ព្រះរាជតំណាង សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃគណមហានិកាយ នៃព្រះរាជាណាចក្រកម្ពុជា បានព្រះអនុញ្ញាតដល់គណៈប្រតិភូដឹកនាំដោយលោកស្រី អាន្នី សុខអាន និងលោកស្រី ពេជ សោភ័ន ចូលក្រាបថ្វាយបង្គំគាល់ និងថ្វាយទេយ្យវត្ថុ។