ម្ចាស់ក្លិប Chelsea បានយល់ព្រមលើកិច្ចព្រមព្រៀងទិញភាគហ៊ុនភាគច្រើននៅក្នុងក្លិប Strasbourg នៃក្របខ័ណ្ឌ Ligue 1 របស់បារាំង។ ប្រធានក្លិបលោក Todd Boehly ធ្លាប់បាននិយាយថា គំរូពហុក្លិបគឺជាផ្លូវដ៏ល្អសម្រាប់កីឡាករវ័យក្មេងដើម្បីទទួលបានបទពិសោធន៍។
ទំហំនៃភាគហ៊ុនមិនត្រូវបានគេដឹងនោះទេ ប៉ុន្តែវាត្រូវបានគេរាយការណ៍ថា ក្រុមតោខៀវនឹងចំណាយប្រាក់៧៥លានអឺរ៉ូ (៦៥លានផោន) សម្រាប់កម្មសិទ្ធិជិត១០០% ។ ប្រធានក្លិប Strasbourg លោក Marc Keller បាននិយាយថាវាជា ថ្ងៃដ៏សំខាន់សម្រាប់Strasbourg ។ អតីតខ្សែបម្រើ West Ham រូបនេះបានបន្ថែមថា ខណៈពេលដែលមិនមានភាពបន្ទាន់ផ្នែកហិរញ្ញវត្ថុចំពោះកិច្ចព្រមព្រៀងនេះ ម្ចាស់ភាគហ៊ុនបានដឹងថា ក្លិបបានឈានដល់កម្រិតនៃគំរូរបស់យើង ហើយត្រូវការការវិនិយោគដើម្បីអភិវឌ្ឍមហិច្ឆតារបស់ពួកគេ។
លោក Keller បាននិយាយថា “នេះគឺជាថ្ងៃដ៏សំខាន់សម្រាប់ការប្រណាំងប្រជែងវិស័យកីឡាបាល់ទាត់។ វាជាអ្វីដែលមិត្តភក្តិម្ចាស់ភាគហ៊ុនរបស់ខ្ញុំ ហើយខ្ញុំបានគិតក្នុងរយៈពេលពីរឆ្នាំកន្លងមកនេះ។ យើងបានសាងសង់ក្លិបដែលមានសុខភាពល្អគ្រប់កម្រិតនិងគ្រប់គ្រងបានល្អ”។
BlueCo ដែលជាក្រុមហ៊ុនដឹកនាំដោយ American Boehly ដែលបានទិញ Chelsea ក្នុងតម្លៃ៤.២៥ពាន់លានផោនជាមួយក្រុមហ៊ុនមូលធនឯកជន Clearlake Capital ក្នុងឆ្នាំ២០២២ បាននិយាយថា “វាជាកិត្តិយសសម្រាប់ពួកយើងដែលជាផ្នែកមួយនៃក្លឹបប្រវត្តិសាស្ត្រនេះ។ យើងប្តេជ្ញាថែរក្សាមរតករបស់ Racing ហើយផ្តោតលើការធ្វើការយ៉ាងជិតស្និទ្ធជាមួយ Marc និងក្រុមការងារគ្រប់គ្រងរបស់គាត់ដើម្បីបន្តការងារដ៏ល្អដែលពួកគេបានធ្វើ។ ការវិនិយោគជាយុទ្ធសាស្រ្តនេះនឹងបន្ថែមវត្តមានរបស់យើងនៅក្នុងបាល់ទាត់អឺរ៉ុប រួមជាមួយនឹងភាពជាម្ចាស់របស់ Chelsea របស់យើង។ យើងជឿជាក់ថាវានឹងបង្កើតឱកាសដ៏ធំក្នុងការចែករំលែកចំណេះដឹង និងជំនាញ“។
ក្លិប Strasbourg បានចេញសេចក្តីថ្លែងការណ៍ថា BlueCo មានបំណងធ្វើឱ្យការរួមចំណែកយ៉ាងសកម្ម ដោយការវិនិយោគនៅក្នុងក្រុមបុរស និងស្ត្រី បូករួមទាំងសាលាបណ្តុះបណ្តាលយុវជន។ ភាគីបារាំងក៏អាចផ្លាស់ប្តូរយោបល់ និងជំនាញជាមួយChelsea និងក្រុមផ្សេងទៀតដែលម្ចាស់ពាក់ព័ន្ធ។
គួរបញ្ជាក់ថា ក្រុមតោខៀវបានស៊ូទ្រាំនឹងរដូវកាលដំបូងដ៏លំបាកក្រោមការកាន់កាប់ថ្មីរបស់ពួកគេ ដោយបណ្តេញអ្នកចាត់ការ២នាក់និងបញ្ចប់ក្នុងចំណាត់ថ្នាក់លេខ១២ដែលជាតំណែងដ៏អាក្រក់បំផុតរបស់ពួកគេនៅ Premier League អស់រយៈពេលជិត៣០ឆ្នាំ។ចំណែកក្លិប Strasbourg ក៏បានរកឃើញថា ខ្លួនមានការលំបាកក្នុងអំឡុងរដូវកាល២០២២–២០២៣ដែរ ហើយបានបញ្ចប់ក្នុងចំណាត់ថ្នាក់ទី១៥ ក្នុងក្របខ័ណ្ឌកំពូលរបស់បារាំង ៕ (រូបភាព ៖ BBC Sport)
