ខេត្តក្រចេះ៖ ផ្ទះប្រជាពលរដ្ឋចំនួន៤ល្វែងត្រូវបានអគ្គីភ័យលេបត្របាក់អស់ទាំងស្រុងខូចខាតសម្ភារៈសរុបជាង៣០មុឺនដុល្លារ។
ហេតុការណ៍
អគ្គីភ័យឆាបឆេះផ្ទះប្រជាពលរដ្ឋចំនួន៣ល្វែងនោះបានកើតឡើងនៅ
វេលាម៉ោង០១.១០នាទីរំលងអាធ្រាត្រ ឈានចូលថ្ងៃទី២៤ ខែមិថុនា ឆ្នាំ២០២៣ត្រង់ចំណុចគីឡូម៉ែត្រ១២៣ (ផ្សារកាបី) ស្ថិតក្នុងភូមិសែនអភិវឌ្ឍន៍ ឃុំគ្រញូងសែនជ័យ ស្រុកស្នួល
ខេត្តក្រចេះ។
ម្ចាស់ផ្ទះឈ្មោះ កែវ ឈាន ភេទប្រុស អាយុ៥៣ឆ្នាំ ជនជាតិខ្មែរ មុខរបរ ជាសមាជិកក្រុមប្រឹក្សាឃុំគ្រញូងសែនជ័យនិងប្រពន្ធឈ្មោះ ណៃ យាត ។
ក្នុងហេតុការណ៍ភ្លើងកំពុងតែឆាបឆេះផ្ទះប្រជាពលរដ្ឋយ៉ាងដន្ធោសន្ធៅនោះគេសង្កេតឃើញវត្តមានលោក សាម ណាល់ អភិបាលស្រុកស្នួលក៏បានចុះទៅដល់ទីតាំងកើតហេតុដឹកនាំកម្លាំងជួយអន្តរាគមន៍បាញ់ទឹកពន្លត់អគ្គិភ័យរហូតដល់រលត់អស់ទាំងស្រុង។
ប្រភពពីសមត្ថកិច្ចបានឲ្យដឹងថា ផ្ទះដែលភ្លើងឆាបឆេះនោះធ្វើអំពីឈើលើថ្មក្រោមប្រក់សង្កសីចំនួន៤ល្វែង ហើយត្រូវបានខូចខាតទ្រព្យសម្បត្តិទាំងស្រុងសរុបជាទឹកប្រាក់ប្រហែលជាង ៣០០.០០០ម៉ឺនដុល្លារ(សាមសិបម៉ឺនដុល្លារ)។
ការឆាបឆេះនោះមូលហេតុបណ្តាលមកពីផ្ទុះស្សេខ្សែភ្លេីងចេញពីបន្ទប់ស្តុកអីវ៉ាន់ ។
ក្នុងករណីអគ្គីភ័យខាងលេីពុំបណ្តាលឱ្យមានគ្រោះ ថ្នាក់ដល់អាយុជីវិតមនុស្សនោះទេហើយក៏មិនបណ្តាលអោយមានការរាលដាលទៅដល់លំនៅដ្ឋានផ្សេងទៀតដែរ។
ក្នុងហេតុការណ៍សមត្ថកិច្ចប្រើប្រាស់រថយន្តពន្លត់អគ្គីភ័យចំនួន៥គ្រឿងក្នុងនោះរថយន្តរបស់ស្នងការដ្ឋាននគរបាលខេត្តក្រចេះចំនួន ២គ្រឿង រថយន្តរបស់អធិការដ្ឋាននគរបាលស្រុកស្នួលចំនួន១គ្រឿង រថយន្តរបស់អធិការដ្ឋាននគរបាលស្រុកកែវសីម៉ាចំនួន០១គ្រឿង និងរថយន្តរបស់អធិការដ្ឋាននគរបាលស្រុកមេមត់ចំនួន១គ្រឿងទៀតផងដែរ។
ការពន្លត់អគ្គីភ័យនោះប្រើប្រាស់ទឹកអស់ចំនួន១២រថយន្ត ទើបអាចគ្រប់ គ្រងស្ថានការណ៍បានជាស្ថាពរនៅវេលាម៉ោង៤.៥៥នាទីទៀបភ្លឺ៕
ដោយ ៖ ជីវ័ន្ត
