​ ភ្នំពេញ​ ៖​ គ្រោះអគ្គិភ័យមួយបានឆាបឆេះផ្ទះប្រជាពលរដ្ឋចំនួនមួយខ្នងដែលបេីកកាត់ដេរសំលៀកបំពាក់​ និងរាលដាលឆេះម៉ូតូចំនួន០២គ្រឿង​ រួមទាំងរថយន្តមួយគ្រឿងរងការខូចខាត​ ដោយបង្កការភ្ញាក់ផ្អេីល​នៅវេលាម៉ោង១​និង២០នាទីយប់រំលងអាធ្រាតឈានចូលថ្ងៃទី២២​ ខែកក្កដា​ឆ្នាំ២០២៣​ នៅចំណុចផ្ទះលេខ ១២E0ផ្លូវ៣១៨​ ក្រុម១៩​ ភូមិ០៣​ សង្កាត់ទួលស្វាយព្រៃទី០១​ ខណ្ឌបឹងកេងកង​ ។

​ សមត្ថកិច្ចបានឱ្យដឹងថា​ ម្ចាស់ទីតាំងខាងលេីមានឈ្មោះ អៀន សុខម (ម្ចាស់ផ្ទះជួល) ភេទ ស្រី អាយុ ៥៨ឆ្នាំ ជនជាតិខែ្មរ មុខរបរ: អ្នកកាត់ដេរសំលៀកបំពាក់ ។
​ តាមប្រភពព័ត៌មានពីប្រជាពលរដ្ឋដែលនៅក្បែរកន្លែងកេីតបានឱ្យដឹងថា​ នៅមុនពេលកើតហេតុគេឭស្នូសំលេងផ្ទុះចេញពីផ្ទះកើតហេតុខាងលើ​ និងឆេះចេញជាអណ្តាលភ្លើងសន្ធោសន្ធៅតែម្ដង​។ ភ្លាមៗអ្នកជិតខាងក៏បានទាញទុយោទឹកនិងបំពង់ពន្លត់អគ្គិភ័យជាច្រើនបំពង់ជួយបាញ់ពន្លត់ដេីម្បីទប់ស្កាត់​ ព្រមទាំងទាក់ទងទៅសមត្ថកិច្ចមូលដ្ឋានឱ្យជួយយករថយន្តពន្លត់អគ្គិភ័យមកបាញ់ទឹកពន្លត់បន្ថែម។
​ បន្ទាប់ពីទទួលបានព័ត៌មានខាងលេីនេះភ្លាម​ កម្លាំងសមត្ថកិច្ចមូលដ្ឋាន​ និងមន្ត្រីជំនាញ​បង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យជាច្រេីនគ្រឿងមកជួយអន្តរាគមន៍បាញ់ទឹកពន្លត់យ៉ាងញាប់ដៃជេីង​ ។
​ ក្នុងប្រតិបត្តិការ​បង្ការ​ និងសង្គ្រោះអគ្គិភ័យខាងលេីនេះ​ កម្លាំងជំនាញបានប្រើប្រាស់រថយន្តការិ.​អគ្គិភ័យ​ :​ ចំនួន១៣គ្រឿង ប្រើប្រាស់ទឹកអស់ចំនួន ១៣ឡាន ស្មើរនឹង ៥២ម៉ែត្រគូប ក្នុងនោះក៏មានរថយន្តជំនួយរបស់ក្រុមហ៊ុនឯកជនមួយចំនួនផងដែរ​ ដោយពន្លត់ចប់​នៅម៉ោង ២:២៥នាទី នាថ្ងៃខែឆ្នាំដដែល។
​ គួរបញ្ជាក់ថា​ គ្រោះអគ្គិភ័យឆាបឆេះផ្ទះកាត់ដេសំលៀកបំពាក់ខាងលើនេះបានបណ្ដាលឱ្យមានបុរសម្នាក់រងរបួសធ្ងន់ តែមិនមានអ្នកស្លាប់បាត់បង់ជីវិតនោះទេ​ និងមានការខូចខាតសម្ភារមួយចំនួនធំ​ និងម៉ូតូចំនួន០២គ្រឿង​ រថយន្តម៉ាក Toyotavitzមួយគ្រឿងផងដែរ​ ។ ចំពោះមូលហេតុនៃការឆាបឆេះនេះ​ នៅមិនទាន់ដឹងនៅឡេីយទេ​ ខណៈសមត្ថកិច្ចជំនាញបន្តស្រាវជ្រាវបន្ថែម​ ៕​ ដោយ​ ៖​ ភារ៉ា​ ដង្កោ