ភ្នំពេញ : នៅថ្ងៃទី 2 ខែសីហា ឆ្នាំ 2023 ក្រសួងសាធារណការ និងដឹកជញ្ជូន បានបង្ហាញនូវផ្លាកសញ្ញាចរាចរណ៍នៅលើដងផ្លូវ ដើម្បីជាប្រយោជន៍ឲ្យប្រជាពលរដ្ឋបានយល់។

ក្រសួងសាធារណការ និងដឹកជញ្ជូនបញ្ជាក់ថា : ផ្លាកសញ្ញាផ្លូវធំមានសិទ្ធិ៖ ប្រើសម្រាប់សម្គាល់ ផ្លូវធំមានផ្លូវតូចឆ្លងកាត់នៅខាងមុខ ដូចនេះអ្នកបើកបរដែលចេញពីផ្លូវតូច ត្រូវទុកសិទ្ធិអាទិភាពឱ្យអ្នកបើកបរមកពីផ្លូវធំទៅមុន។

ក្រសួងសូមស្នើសុំការសហការពីបងប្អូនប្រជាពលរដ្ឋ ក្នុងការរាយការណ៍តាមរយៈកម្មវិធីថែទាំផ្លូវ ( ROAD CARE Mobile App) ករណីឃើញមានគំនូសសញ្ញាចរាចរណ៍រលុប ឬផ្លាកសញ្ញាមានការបាក់បែក ដើម្បីអាចឱ្យមន្រ្តីជំនាញ ឬមន្ត្រីពាក់ព័ន្ធធ្វើការត្រួតពិនិត្យ និងចាត់វិធានការទាន់ពេលវេលា។

លើសពីនេះទៅទៀតបងប្អូនប្រជាពលរដ្ឋក៏អាចចូលរួមសហការរាយការណ៍ពីផ្លូវដែលត្រូវជួសជុលថែទាំ និងសញ្ញាចរាចរណ៍បានផងដែរ។

សូមបងប្អូនប្រជាពលរដ្ឋមេត្តាចូលរួមគោរពច្បាប់ចរាចរណ៍ទាំងអស់គ្នា និងជួយថែរក្សាផ្លូវថ្នល់របស់យើង ដើម្បីធ្វើដំណើរបានងាយស្រួល និងមានសុខសុវត្ថិភាព៕

ដោយ : សហការី