ខេត្តឧត្តរមានជ័យ៖ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តឧត្តរមានជ័យ នៅរសៀលថ្ងៃទី០២ ខែសីហា ឆ្នាំ២០២៣នេះ បានឱ្យដឹងថា ករណីក្រុុមក្មេងទំនើង ០៨នាក់ ពាក់ព័ន្ធករណីគប់ និងវាយកញ្ចក់រថយន្តអ្នកដំណើរតាមដងផ្លូវ ត្រូវសមត្ថកិច្ចឃាត់ខ្លួនយកមកសាកសួររហូតបញ្ចប់នីតិវិធី ហេីយបានបញ្ជូនខ្លួនពួកគេ រួមនឹងវត្ថុតាងទៅតុលាការ ដេីម្បីចាត់ការតាមច្បាប់។
លោកស្នងការខេត្ត បានបន្ដថា កម្លាំងជំនាញអធិការដ្ឋាននគរបាលស្រុកត្រពាំងប្រាសាទ បានចុះស្រាវជ្រាវ និងឃាត់ខ្លួនក្មេងទំនើងចំនួន ០៨នាក់ ក្រោយទទួលបានព័ត៏មានពីជនរងគ្រោះ ថ្ងៃទី២៩ ខែកក្កដា ឆ្នាំ២០២៣ ពាក់ព័ន្ធករណី យកដុំថ្មគប់ និងវាយបំបែកកញ្ចក់រថយន្ត បណ្តាលឱ្យជនរងគ្រោះដែលកំពុងធ្វើដំណើរនៅលើដងផ្លូវ រងរបួសស្រាលចំនួន ០២នាក់ ករណីនេះកើតឡើងនៅវេលាម៉ោង ១៧និង៤៥នាទី ថ្ងៃទី២៨ ខែកក្កដា ឆ្នាំ២០២៣ ត្រង់ចំណុចផ្លូវបំបែកភូមិតាសំ ឃុំអូរស្វាយ ស្រុកត្រពាំងប្រាសាទ ។
ក្នុងប្រតិបត្តិការនេះ សមត្ថកិច្ចជំនាញបានដកហូតវត្ថុតាងរួមមាន៖ម៉ូតូ ០៣គ្រឿង, ដុំថ្ម និងកាំបិតផ្គាក់ ០១ ។
បច្ចុប្បន្នក្មេងទំនើងទាំង ០៨នាក់ រួមនឹងវត្ថុតាងខាងលើ ជំនាញ បញ្ជូនខ្លួនទៅតុលាការចាត់ការតាមនីតិវិធី៕
ដោយ៖អរុណរះ
