សមាជិកសភាអង់គ្លេសកំពុងជំរុញឱ្យរដ្ឋាភិបាលចាត់វិធានការជាក់ស្តែងនៅពេលដែលកម្មវិធីទិដ្ឋាការសម្រាប់ជនភៀសខ្លួនអ៊ុយក្រែនផុតកំណត់។

សារព័ត៌មាន RT បានដកស្រង់សម្តីសមាជិកសភាអភិរក្សនិយម និងអង្គការក្រៅរដ្ឋាភិបាលអង់គ្លេសមួយចំនួនដែលនិយាយថា ជាងពាក់កណ្តាលនៃជនភៀសខ្លួនអ៊ុយក្រែនដែលមកដល់ប្រទេសអង់គ្លេសក្រោមកម្មវិធីផ្លាស់ប្តូរទីលំនៅជនភៀសខ្លួននឹងត្រូវចាកចេញមុនខែកញ្ញាឆ្នាំ 2025 លុះត្រាតែទីក្រុងឡុងដ៍ធ្វើការប្តេជ្ញាចិត្តយូរអង្វែងក្នុងរឿងនេះ។
ប្រជាជនអ៊ុយក្រែនប្រមាណ 182.100 នាក់បានមកចក្រភពអង់គ្លេសចាប់តាំងពីខែកុម្ភៈ ឆ្នាំ 2022 ក្រោមកម្មវិធីគ្រួសារ និងលំនៅឋានអ៊ុយក្រែនសម្រាប់អ៊ុយក្រែន។ គំរូនេះអនុញ្ញាតឱ្យជនភៀសខ្លួនអ៊ុយក្រែនស្នាក់នៅក្នុងចក្រភពអង់គ្លេសរហូតដល់បីឆ្នាំ។
ប៉ុន្តែដោយសារជម្លោះមិនបង្ហាញសញ្ញានៃការចុះត្រជាក់និងបញ្ចប់ ជនភៀសខ្លួនអ៊ុយក្រែនភាគច្រើនមានការស្ទាក់ស្ទើរក្នុងការត្រឡប់ទៅប្រទេសកំណើតរបស់ពួកគេវិញ។
ក្រុមសមាជិកសភាអង់គ្លេសដែលគាំទ្រអ៊ុយក្រែនបាននិយាយថា ពួកគេកំពុងជំរុញឱ្យរដ្ឋាភិបាលរបស់នាយករដ្ឋមន្ត្រីអង់គ្លេស Rishi Sunak ធ្វើការសន្យាសម្រាប់ជនភៀសខ្លួនអ៊ុយក្រែន។
យោងតាមលោក Robert Buckland អតីតលេខាធិការតុលាការនៅក្រោមនាយករដ្ឋមន្រ្តីអង់គ្លេស Boris Johnson ទីក្រុងឡុងដ៍ត្រូវការកម្មវិធីដោះស្រាយរយៈពេលវែងសម្រាប់ជនភៀសខ្លួនអ៊ុយក្រែន។ តាមលោក វិបត្តិអ៊ុយក្រែនទាមទារឱ្យមានការឆ្លើយតបពិសេស ព្រោះវាជាស្ថានភាពមិនធ្លាប់មាន។
លោក Buckland បាននិយាយថា ជនភៀសខ្លួនអ៊ុយក្រែននៅតែអាចទទួលបានអត្ថប្រយោជន៍ខ្ពស់មួយចំនួនពីរដ្ឋាភិបាលអង់គ្លេស ដោយមិនចាំបាច់ក្លាយជាពលរដ្ឋអង់គ្លេស។
ការស្ទង់មតិនៅចក្រភពអង់គ្លេសក្នុងខែកក្កដាបានបង្ហាញថាប្រហែលពាក់កណ្តាលនៃមនុស្សពេញវ័យអ៊ុយក្រែនមានបំណងបន្តរស់នៅក្នុងចក្រភពអង់គ្លេស ទោះបីជាប្រទេសកំណើតរបស់ពួកគេមានសុវត្ថិភាពក៏ដោយ៕ ដោយធីរីណា

រូប​ថត​: Telegraph