ភ្នំពេញ៖ រនាំងដែកពុះចែកទ្រួងផ្លូវចំនួន៣ផ្ទាំង ត្រូវរងការខូចខាតបាក់រាបស្មើដល់ដី ដោយសារតែបុរសជនជាតិចិនម្នាក់បើករថយន្តឡិចស៊ីស RX300 ស្ថិតក្នុងស្ថានភាពស្រវឹងបានបុករះ កាលពីវេលាម៉ោង១១និង៣០នាទីយប់ថ្ងៃទី២៨ ខែមិថុនា ឆ្នាំ២០១៦ នៅចំណុចមុខស្ថានីយប្រេងឥន្ទះលិមឡុង តាមបណ្តោយផ្លូវមហាវិថីសហព័ន្ធរូស្សី ស្ថិតក្នុងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។

តាមសាក្សីនៅកន្លែងកើតហេតុបានអោយដឹងថា នៅមុនពេលកើតហេតុ គេបានឃើញរថយន្តឡិចស៊ីស RX ៣00 ពណ៍ទឹកប្រាក់ ពាក់ស្លាកលេខភ្នំពេញ ២G ២៨៤២ បើកបរដោយបុរសជនជាតិចិនម្នាក់ស្ថិតក្នុងស្ថានភាពស្រវឹង ហើយបើកល្បឿនលឿនទិសដៅពីកើតទៅលិច ខណៈមកដល់ចំណុចកើតហេតុ ក៏បានរេចង្កូតទៅបុករះរនាំងដែកពុះចែកទ្រូងបណ្តាលអោយបាក់អស់៣ផ្ទាំង រាបស្មើដល់ដី ចំណែករថយន្តបង្កបានបែកកង់ខាងមុខផ្នែកខាងឆ្វេងទៅមុខលែងរួច ។

ក្រោយពេលកើតហេតុ សមត្ថកិច្ចបានចុះមកដល់ចំណុចកើតហេតុ និងឃាត់ម្ចាស់រថយន្ត រួមទាំងទំនាក់ទំនងទៅនគរបាលការិយាល័យចរារណ៍ជើងគោកដើម្បីស្ទូចយកទៅរក្សាទុករង់ចាំដោះស្រាយពេលក្រោយ ៕

ដោយ៖ សុខាសែនជ័យ